Ermənistanı revanşizmə həvəsləndirənlər bu ölkəni uçuruma sürükləyirlər
"Ermənistanın sülhlə bağlı mövqeyi imitasiyadır. Sülhdən danışmaq hələ sülh istəmək deyil. Sülhdən danışıb sərhəddə təxribatlar törətmək, silahlanma siyasətini davam etdirmək isə qəbuledilməzdir".
Bu sözləri qəzetimizə açıqlamasında Milli Məclisin deputatı Nigar Məmmədova deyib. Deputat bildirib ki, Azərbaycanın irəli sürdüyü şərtlər ətrafında manipulyasiya etmək Ermənistanın sülhdən yayındığını bir daha sübut edir. Ermənistan rəsmiləri israrla müqavilənin imzalanacağı yer və vaxt barədə sorğu edir, amma anlamırlar ki, məkan və zamanı müəyyən etmək ən sonuncu prosesdir. "Ona qədər isə Ermənistan konstitusiyası dəyişdirilməli, ATƏT-in Minsk qrupu ləğv edilməlidir. Yalnız bundan sonra sülh sazişinin imzalanması, iki ölkə arasında dövlətlərarası münasibətlərin qurulması yolunda hər hansı bir maneə olmayacaq. Biz sülh sazişinə köklənsək də, Ermənistan konstitusiyasında ziddiyyətli məqamlar var, onlar aradan qaldırılmalıdır. Azərbaycanın bu tələbi beynəlxalq hüququn norma və prinsiplərinə tam uyğundur", - deyə o əlavə edib.
Deputat xatırladıb ki, sülh və əməkdaşlıq təklifi ilk dəfə Azərbaycan tərəfindən irəli sürülüb. Müharibə başa çatdıqdan dərhal sonra - 2021-ci ildə məhz düşmənçilik səhifəsini bağlamağı təklif etdik. 2022-ci ilin ilk aylarında sülh razılığının beş əsas bəndi Ermənistana təqdim edilib. Təsadüfi deyil ki, sülh sazişinin ilk layihəsi də Azərbaycan tərəfindən yazılıb və Ermənistana verilib. Təxminən iki il yarımdan sonra, yəni bir ay əvvəl müzakirələr başa çatıb və mətnlə bağlı razılıq əldə olunub. Təbii ki, sazişin mətninin razılaşdırılması hələ onun imzalanması demək deyil. Ermənistan özünü "sülh göyərçini" kimi təqdim etməyə çalışsa da, Fransa və Hindistanın verdiyi pulsuz silahlar, Yunanıstandan aldığı "S 300" raket kompleksləri, Sülh fondu vasitəsilə silah-sursat, hərbi texnikaların alınması onun müharibəyə hazırlaşmasından xəbər verir. Avropa İttifaqının Sülh fondunun Ermənistana dəstəyi İrəvanı revanşizmə həvəsləndirib.
N.Məmmədova qeyd edib ki, bir neçə gün əvvəl Antalya Diplomatik Forumunda xarici işlər nazirləri çərçivəsində keçirilən üçtərəfli görüş, eyni zamanda Tbilisidə nazir müavinləri səviyyəsində baş tutan təmaslar müsbət haldır: "Amma Ermənistan praktik addımlar atmalıdır, yalnız bəyanat və görüşlərlə iş bitmir. Azərbaycanın şərtləri mütləq yerinə yetirilməlidir. Prezident İlham Əliyevin də bəyan etdiyi kimi, "top Ermənistan tərəfdədir"".
Ə.QARDAŞXANOVA,
"Azərbaycan"
jpg_1775472819.jpg)
