Baş nazir Nikol Paşinyan Rusiyanın ən varlı ermənisini həbs etdirib
Ermənistanda iqtidar və müxalifətin bir-birinə qarşı kompromat xarakterli hücumlarının artması, gözdənsalma kampaniyasını genişləndirməsi vəziyyəti daha kritik həddə çatdırıb. İndi həm hakimiyyət, həm də revanşistlər 2026-cı ilin parlament seçkilərinə hazırlaşırlar. Bu isə qarşıdakı dövrdə Ermənistanda xaosun qaçılmaz olduğunu deməyə əsas verir.
Proseslər göstərir ki, keçmiş hərbi xunta vəziyyətdən yararlanıb kilsəni də siyasi proseslərə cəlb edərək ölkədəki xaosu daha da dərinləşdirməyə çalışır.
Bu günlərdə İrəvanda rusiyalı erməniəsilli tanınmış iş adamı Samvel Karapetyan hüquq-mühafizə orqanları tərəfindən saxlanılıb. Karapetyan son günlər Ermənistan hakimiyyətinin Apostol Kilsəsinə qarşı apardığı kampaniyanı kəskin tənqid edib və açıq şəkildə Erməni Apostol Kilsəsinə dəstəyini ifadə edib. Müxalifətə yaxın dairələr onun məhz bu bəyanatları fonunda hədəfə alındığını bildiriblər.
Xəbər verildiyi kimi, bir neçə gün əvvəl hökumətlə kilsə arasında gərginlik artmışdı. Paşinyan kilsənin siyasi təsirini qırmaq üçün kampaniyaya başlamış, bu isə ictimaiyyətdə və elita daxilində narazılığa səbəb olmuşdu. Məhz bu fonda baş verən son hadisələr Paşinyanın sistem daxilindəki "təmizləmə" əməliyyatını sürətləndirdiyini göstərir.
Samvel Karapetyan Rusiyada "Tashir Group" adlı iri biznes imperiyasının rəhbəri kimi tanınır. O, uzun illərdir Ermənistanın iqtisadi və ictimai layihələrinə maliyyə dəstəyi göstərib. Hadisə Ermənistan cəmiyyətində və diasporunda ciddi rezonansa səbəb olub.
S.Karapetyan Ermənistanın energetika sektorunda - xüsusilə elektrik şəbəkələrində mühüm paya sahibdir və Kremlə yaxınlığı ilə tanınır. Onun evində xüsusi əməliyyat keçirilib və iki güc strukturu - Milli Təhlükəsizlik Xidməti (MTX) və Daxili İşlər Nazirliyi (DİN) bu prosesdə iştirak ediblər. Mənbələrin bildirdiyinə görə, MTX rəhbəri Armen Abazyan Paşinyanın Karapetyanın həbsi ilə bağlı əmrini yerinə yetirməkdən imtina edib və bu səbəbdən səhər saatlarında işdən çıxarılıb. Bu isə Abazyanın sistem içində müstəqil və ya balanslaşdırıcı fiqur olduğunu və Paşinyanın planlarına müqavimət göstərdiyini təsdiqləyir.
Abazyanın yerinə gətirilən şəxs - Andranik Simonyan təhlükəsizlik sistemində olmayan bir şəxsdir. Bu fakt Ermənistanda ciddi müzakirə mövzusudur. Ekspertlər bildirirlər ki, Simonyanın MTX rəhbəri təyin olunması Paşinyanın artıq hüquq-mühafizə orqanlarını tamamilə öz adamları ilə doldurduğunu göstərir. Bu şəxslər nəinki sistemdən kənardadır, həm də birbaşa Paşinyanın siyasi iradəsinə tabe olmağa hazır adamlardır.
Ermənistanın baş naziri Nikol Paşinyan "Feysbuk" səhifəsində sual ünvanlayıb ki, kilsəyə, yoxsa onun müqəddəsliklərini ləkələyənlərə qarşı çıxmışam?: "Erməni Apostol Kilsəsi Ermənistan Ədliyyə Nazirliyində qeydiyyatdan keçmiş nizamnaməsində təsdiq edir ki, onun nizamnaməsi kilsə rəsmiləri və dindarlar üçün hüquqi qüvvəyə malikdir. İndi bu suallara cavab verərkən mən kilsəyə qarşı mübarizə aparıram, yoxsa Erməni Apostol Kilsəsinin dəyərləri uğrunda mübarizə aparıram? Mən kilsəyə, yoxsa onun müqəddəsliklərini ləkələyənlərə qarşı çıxmışam? Təbii ki, mən kilsəmizin müqəddəsliyini ləkələyənlərə qarşı çıxmışam, sadiq üzvü olduğum Erməni Apostol Kilsəsi və onun sadiq davamçıları naminə mübarizə aparıram".
"California Courier" qəzetinin redaktoru Harut Sasunyan isə bildirib ki, 2026-cı ilin iyununda keçiriləcək parlament seçkiləri ərəfəsində reytinqlərinin kəskin aşağı düşməsi fonunda baş nazir Nikol Paşinyan bütün ermənilərin katolikosunu hədəfə alır. Onun sözlərinə görə, Paşinyan istər Ermənistanda, istərsə də diasporda ermənilərin əksəriyyətinin Erməni Apostol Kilsəsinə sadiq qalmasına məhəl qoymayaraq, ictimai dəstək qazana biləcəyini yanlışlıqla düşünür: "Ötən həftə Paşinyan katolikos II Qaregini daha itaətkar ruhani ilə əvəzləmək niyyətində olduğunu bəyan edərək, ruhanilərin subaylığını bəhanə edib". Sasunyan bildirib ki, Paşinyanın kilsəyə hücumları Ermənistanda vətəndaş müharibəsinə səbəb ola bilər.
Göründüyü kimi, Ermənistan sonu görünməyən daxili siyasi böhrana qədəm qoymaqdadır.
Elçin CƏFƏROV,
"Azərbaycan"
