Xalqımız həmişə dinə hörmətlə yanaşıb. Bu, bir inanc, bir qəlb, bir ruh məsələsidir. Ölkəmizin bölgələrindəki tarixi dini məbədlər, məscidlər qorunur, islam dininə və digər tolerant inanclara hörmət göstərilir. Təbiidir ki, bu gün müstəqil respublikamızda yaşayan azsaylı xalqlar da sərbəst şəkildə dini sitayişlərini edirlər.
Lakin bəzən qarşılaşdığımız hallar bizdə böyük təəssüf hissi yaradır. Birini misal gətirmək istərdim. Paytaxtdan Qusar istiqamətinə gedən yoldan hər gün minlərlə insan istifadə edir. Yolun abadlığına söz ola bilməz, rahat və demək olar ki, maneəsizdir. Lakin Siyəzən rayonu ərazisində yerləşən "Beşbarmaq" pirinin magistral yolda olan hissəsində xoşagəlməz hal yaşanır. Məlumdur ki, hər həftənin şənbə və bazar günləri Quba, Qusar və Xaçmaza yol alan turistlərin sayı daha çox olur. Burada maşınlarını saxlayanlar ilk növbədə natəmizliklə və qanunsuz küçə ticarəti ilə üzləşirlər.
Yəqin ki, hər axşam kommunal xidmət işçiləri ərazidə təmizlik işləri aparırlar. Amma nə fayda? Az qala səhərdən ətrafı bürüyən manqal tüstüsü, ticarət qaydalarına uyğun olmayan satış köşkləri ərazidə dözülməz mənzərə yaradır. Qaynayan qarğıdalı qazanları, məktəbyaşlı uşaqların müştəri səsləmələri ötən əsrin əvvəllərində kinolarda gördüyümüz mənzərəni xatırladır.
Xarici ölkələrdən gələn turistlərə məlumat verilir ki, bura müqəddəs bir ərazidir. Onlar da aralıdan zirvədəki möhtəşəm qayalıqlarla yanaşı, ərazidə təsvir etdiyimiz mənzərəni də lentə köçürürlər.
Təəssüf ki, "Beşbarmaq"dakı bu cür vəziyyət uzun illərdir yaşanır. Başa düşürük ki, insanlar burada ticarəti ailələrinin dolanışığı üçün edirlər. Lakin bunu normal qaydada, müasir tələblərə cavab verən formada etmək olmazmı? Yəqin ki, olar, sadəcə, istək və bir də dini inanc yerlərinə hörmətlə yanaşmaq lazımdır.
Həmid QULİYEV,
Sabirabad rayon sakini
