Azərbaycan dünyada həm də xeyirxah və mərhəmətli ölkə kimi tanınır
Humanitar yardımın əsas məqsədi insana, insanlığa xidmət etməkdir. Dünyanın müxtəlif yerlərində baş verən təbii fəlakətlərin, törədilən faciələrin fəsadlarının aradan qaldırılması və zərərçəkən insanların yaşam şəraitinin bərpa edilməsi humanitar yardımın vəzifəsidir. Başqa sözlə, təbii fəlakətlər və faciələr nəticəsində ortaya çıxan riskin azaldılması humanitar yardım sistemi ilə həyata keçirilir. Beynəlxalq Qırmızı Xaç Komitəsi, Beynəlxalq Miqrasiya Təşkilatı, digər beynəlxalq qurumlar, donor agentliklər və qeyri-hökumət təşkilatları bu sistemin vacib iştirakçılarıdır.
Son 10-15 ildə Azərbaycan humanitar yardım siyasətinin önəmli iştirakçılarından birinə çevrilib. Ölkəmizdə dövlət siyasətinin mərkəzində insan amili dayandığı üçün humanitar yardım da qaçılmazdır. Azərbaycan təbii fəlakətlərdən, müharibələrdən əziyyət çəkən ölkələrə ilk yardım edən dövlətlər sırasındadır. Maddi yardım göstərmək təkcə siyasi idarəçilik deyil, həm də şəfqətdir, mərhəmətdir. Azərbaycan dövləti bu mərhəməti və şəfqəti pandemiya dövründə sərgiləmişdir. Qoşulmama Hərəkatının Sədri olan Prezident İlham Əliyev həmin vaxt təklif etmişdi ki, BMT Baş Assambleyasının hökumət və dövlət başçıları səviyyəsində xüsusi sessiyası çağırılsın. Videokonfrans şəklində keçirilən bu sessiyada dünyanın 130-dan çox dövləti iştirak edirdi və onların hamısı Azərbaycan Prezidentinin təklifini qəbul etdi. Bu, həm də o zaman idi ki, peyvəndlərlə bağlı ikili standartlar açıq-aydın hökm sürürdü. Ona görə də İlham Əliyev sözügedən videokonfransda həmin ayrı-seçkiliyə qarşı etirazını da bildirmişdi.
Dövlətimizin başçısı bir neçə gün öncə X Qlobal Bakı Forumunun açılışındakı çıxışında da ozamankı fikirlərini təkrar dilə gətirdi: "Biz pandemiyanın ilk aylarında peyvənd millətçiliyinə və peyvəndlərin qeyri-bərabər paylanılmasına etiraz səsimizi ucaltdıq. Biz COVID 19-dan sonrakı dövr məsələsinə diqqət yönəltdik. Bununla yanaşı, biz əksəriyyəti Qoşulmama Hərəkatına üzv olan 80-dən artıq ölkəyə maliyyə və humanitar yardım etdik. Biz koronavirusla mübarizəni dəstəkləmək üçün Ümumdünya Səhiyyə Təşkilatına 10 milyon ABŞ dolları həcmində birbaşa ianə etdik".
Vaxt var idi Azərbaycan xarici ölkələrdən maddi dəstək alır, beynəlxalq humanitar təşkilatların yardımına möhtac olurdu. Amma bu gün tam əksinədir. Azərbaycan özü imkansız ölkələrə humanitar yardımlar göstərir, əl tutur. Bu cür yardımlar 2011-ci ildən Asiya, Afrika, Latın Amerikası ölkələrinin bir çoxuna edilib. 2014-cü ildə leysan yağışları üzündən daşqınlara məruz qalan Serbiya, Bosniya və Herseqovinaya da Azərbaycan humanitar yardımlar göndərib. Təkcə bunlarmı? Yox, əlbəttə. Ötən il Ukrayna xalqına göstərilən humanitar yardımı qeyd edə bilərik. Ümumi çəkisi 170 tondan artıq olan həmin humanitar yardıma 3,37 milyon manatlıq dərman vasitələri və tibbi sərfiyyat malları, eləcə də 1 milyon manatlıq ərzaq məhsulları daxil idi. Bundan başqa, Ukraynadakı vəziyyətlə əlaqədar ölkə rəhbərliyinin tapşırığı ilə Azərbaycan tərəfindən Moldovaya pənah aparan ukraynalı qaçqınlar üçün ümumi məbləği 23,2 milyon manatdan artıq olan 550 tona yaxın humanitar yardım göndərilmişdir.
Fevralın 6-da qardaş Türkiyədə baş verən dəhşətli zəlzələ nəticəsində çoxlu sayda insan tələfatının olması ölkəmizdə böyük kədərlə qarşılandı. Hər kəsin içində baş qaldıran yardım hissi, kömək duyğusu anındaca insanları və dövləti səfərbər etdi. Təsadüfi deyil ki, Türkiyəyə qardaş yardımı ilə ilk çatan Azərbaycan oldu. Prezident İlham Əliyevin sərəncamı ilə Fövqəladə Hallar Nazirliyinin xüsusi riskli axtarış və qəza-xilasetmə dəstələri təcili surətdə Türkiyəyə göndərildi. Dövlətimizin, eləcə də Heydər Əliyev Fondunun qardaş ölkəyə yardımı bu gün də davam edir.
Vətən, xalq, millət, qardaş sevgisi hər bir Azərbaycan vətəndaşının qanında, canında daşıdığı bir dəyərdir. Bu dəyərin nə qədər böyük bir sərvət olduğunu bəzən anlaya bilmirik. Bəzən də o dəyərin içində itib-batırıq, sərvətin üstünə sərvət əlavə edirik - qardaş Türkiyədə zəlzələ fəlakətinin içinə düşmüş qardaşlarımızın yardımına ilk qaçdığımız kimi. Qardaşın qardaşa olan sevgisi heç vaxt tükənməz, bitməz. Çünki sevgi Allahın lütfüdür. Bu qardaş sevgisini həmin günlərdə bütün dünya gördü. Bundan şok olan da tapıldı, heyrətdən gözləri bərələni də gördük.
Humanitar yardım insanların milliyyətinə, irqinə, cinsinə, dini etiqadına, siyasi mənsubiyyətinə və baxışlarına görə edilmir. Humanitar yardım zərərçəkmiş insanların həyatlarının yenidən qurulmasına dəstəkdir, həmin ölkə ilə həmrəylik nümayiş etdirməkdir. Məhz bu dəstək beynəlxalq arenada Azərbaycanın nüfuzundan, siyasi gücündən xəbər verir.
Amma bu da bir faktdır ki, Azərbaycan dövlətinin humanitar yardım siyasəti xalqın iradəsinə və milli-mənəvi dəyərlərinə bağlı olduğu qədər də iqtisadiyyatının imkanından asılıdır. Bu gün iqtisadiyyatımız elə bir zirvəyə qədəm qoyub ki, Azərbaycan bütün dünyada ehtiyacı olana əl tuta, köməyinə çata bilir.
Züleyxa ƏLİYEVA,
"Azərbaycan"
