Ölkəmizdə kənd təsərrüfatının inkişafına dövlət tərəfindən göstərilən diqqət və verilən dəstək ildən-ilə artır. Ərzağa olan daxili tələbatın, əsasən, yerli istehsal hesabına ödənilməsi üçün fermer və sahibkarlara hər cür şərait yaradılır.
Kənd təsərrüfatı rayonlarından olan Ağstafada da aqrar sektorun inkişafına xüsusi münasibət, yanaşma var. İlk növbədə kənd təsərrüfatı məhsulları istehsalının artırılması rayonda strateji hədəf kimi diqqətdə saxlanılır ki, bunun da nəticəsində əhəmiyyətli göstəricilərə nail olunur, başqa sözlə, həyata keçirilən tədbirlər sayəsində kənd təsərrüfatı məhsullarının istehsalında dinamik artım müşahidə edilir.
İqtisadiyyatının əsasını aqrar sahə təşkil edən Ağstafada əvvəlki illərdə olduğu kimi, keçən il də uğurlu göstəriciyə nail olunmuşdur. Təsərrüfat sahiblərinin gərgin əməyi nəticəsində rayon üzrə məhsul istehsalının həcmi əvvəlki illərə nisbətən artmışdır. 8512,1 hektarda taxıl yetişdirən əkinçilər hər hektar buğda sahəsindən 34,2, arpa sahəsindən 26,1, qarğıdalı sahəsindən 45,6 sentner məhsul götürmüşlər. Digər sahələrdə də yüksək göstəricilərə nail olunmuşdur: günəbaxan, bostan, tərəvəz və yonca bitkilərinin istehsalı xeyli artmışdır. Kartof istehsalı da nəzərdə tutulduğundan çox olmuş, məhsuldarlıq 266 sentnerə çatmışdır.
Hazırda rayon üzrə 500,9 hektar üzüm bağı var ki, onun da 484 hektarı barverəndir. Keçən il üzüm bağlarının hər hektarından 160 sentner məhsul yığılmışdır. Hətta rayonda elə kəndlər var ki, orada məhsuldarlıq daha yüksəkdir. Poylu kəndindən Səməndər Vəliyev, Qurban Aslanov, Vəli Vəliyev və Mətləb İslamzadə hər il daha yüksək məhsuldarlığa nail olurlar.
Məhsuldarlıqdan söz düşmüşkən, Ağstafanın meyvə bağlarında da yüksək məhsuldarlıq qeydə alınır. Hazırda rayon üzrə 1389,1 hektar meyvə bağı mövcuddur və həmin bağların 1304,7 hektarı meyvə verəndir. Keçən il bağbanlar hər hektardan 117 sentner meyvə götürmüşlər.
Barama istehsalı da artır. Ötən mövsümə 110 qutu baramaqurdu götürən 60 kümçü 3267,30 kiloqram yaş barama təhvil verərək əvvəlki ildəki göstəricini üstələmişlər. Rayonda bu sahədə yüksək göstəricilərə nail olan çox sayda kümçü var. Sakit İsgəndərov, Pərviz Məmmədov, Nəsibi Səmədov belə kümçülərdəndir.
Hazırda yaz tarla işlərinin qızğın çağıdır. Təsərrüfat sahibləri keçən ilki göstəriciləri yeniləmək və daha çox kənd təsərrüfatı məhsulları istehsal etmək üçün var qüvvələrini əsirgəmirlər. Havaların yağmurlu keçməsi işləri bir qədər yubatsa da, təsərrüfat sahibləri bütün imkanlardan maksimum istifadə etməyə çalışırlar. İndiyədək 324 hektarda karof, 179 hektarda qarğıdalı, 1206 hektarda günəbaxan, 30 hektarda soğan, 40 hektarda bostan, 220 hektarda tərəvəz bitkiləri əkilmişdir. Səpin davam edir. Bundan başqa, 267 hektarda yeni meyvə bağı salınmışdır. Fermerlər bu bağları xəstəlik və zərərvericilərdən qorumaq üçün kimyəvi mübarizə işləri həyata keçirirlər. Üzüm bağlarının sahəsi də 8 hektara yaxın genişləndirilmişdir.
Yaz tarla işləri çərçivəsində taxıl sahələrinə də diqqətlə qulluq göstərilir. Bu il əkilmiş 7929 hektar taxılın 5188,5 hektarı buğda, 2740,5 hektarı arpadır. Yağıntının çox olması əkin sahələrində taxılın sürətli inkişafına səbəb olmuşdur. Mütəxəssislərin fikrincə, bu il əvvəlki illərə nisbətən rayonda daha çox taxıl istehsalına nail olunacağı gözlənilir.
Sabir ƏLİYEV,
"Azərbaycan"
jpeg_1766151155.jpeg)
