Halal zəhmət, xoş güzəran

Maraqlı insandır, həyata öz baxışları var, söhbətləri şirindir, tez-tez atalar sözlərindən misal çəkir. Deyir ki, hər kəs bacardığı işin arxasınca getsə yaxşıdır. Onun fikrincə, hər işi yönündə-yöndəmində görməsən, zəhmət çəkib tər axıtdığın işdən xeyir görə bilməzsən.

Ağcabədidə hamı onu "geroy Tofiq” kimi tanıyır. Rayonun sayılıb-seçilən pambıqçılarındandır. Yeni Qaradolaq kəndində doğulub boya-başa çatan Tofiq İsmayılov 40 ildən çoxdur ki, pambıqçılıqla məşğuldur. Mehr saldığı, ülfət bağladığı torpaq çəkdiyi zəhmətin əvəzində onun üzünü hər zaman el-oba, ailə-uşaq yanında əkib-becərdiyi pambıq kimi ağ edib. Əmək ətirli ömür yolundan, bu yolda qazandığı uğurlardan söhbət düşəndə Tofiq İsmayılov deyir:

- Pambıq bu yerlərin şöhrəti, çörək təhnəsidir. Hələ sovet hakimiyyəti dövründə kolxozda çalışan kənd adamları pambıqdan yaxşı qazanırdılar. Halal zəhməti hesabına əldə etdiyi qazancla kimi geniş ev-eşik tikdirir, kimi maşın alırdı. Dolanışıq sarıdan demək olar ki, heç kim heç nədən korluq çəkmirdi. 90-cı illərdə nədənsə pambığa münasibət dəyişdi. Bu gəlirli sahə başlı-başına buraxıldı. Torpaqdan küsdürülən kəndli tarlanı çayxana ilə dəyişdi. Həmin illər faydalı bir işin qulpundan yapışmalı, işləyib pul qazanmalı, ailəsinin xoş güzəranını təmin etməli olan əmək qabiliyyətli kişilər çayxanalarda lövbər salıb, günlərini nərd, domino oynamaqla keçirirdilər. Kəndlərimizin ürək dağlayan bu mənzərəsi Prezident İlham Əliyevin kənd təsərrüfatında ənənəvi sahələri, o cümlədən pambıqçılığı inkişaf etdirmək, bu sahədə əvvəlki şöhrəti qaytarmaq barədə tarixi çağırışınadək davam etdi. Bu çağırışdan sonra elə bil kəndlərimizin üstünə gün doğdu. "Ağ qızıl”ın yenidən ağ günləri başladı. O vaxt rayon icra hakimiyyətində yaradılan, həm də səmərəli fəaliyyət göstərən qərargah Prezidentin tapşırıq və tövsiyələrini yerinə yetirmək üçün bütün imkan və ehtiyat mənbələrini səfərbər etmişdi.

Qarşıya çıxan irili-xırdalı problemlərin həlli üçün etdiyimiz müraciətlər rayon rəhbərliyi səviyyəsində operativ həllini tapırdı.

Tofiq İsmayılovun rəhbərlik etdiyi fermer təsərrüfatı bu il 40 hektar sahədə pambıq əkib becərmişdir. Artıq yavaş-yavaş ağ örpəyə bürünən tarlalar bol məhsuldan xəbər verir. Bütün varlığı ilə bağlandığı bərəkətli torpaq, halal zəhmət Tofiq İsmayılovu ildən-ilə zirvələrə ucaldır, uğurlara qovuşdurur. Belə illər sırasında keçən ilin nəticələri daha fərəhli oldu. 2018-ci ildə 285 ton "ağ qızıl” istehsal olunmuş, məhsuldarlıq 57 sentnerə yüksəlmişdir. Tofiq kişi deyir ki, bu nailiyyəti dövlətin güclü dəstəyi sayəsində qazanıblar:

- Amma bu, son deyil. Cari ilin hədəfləri daha yüksəkdir. Çünki boynumda Prezidentin haqqı var. Həyatımın ən əziz və unudulmaz anı Prezident İlham Əliyevin "Birinci dərəcəli əmək ordeni”ni mənə təqdim etməsidir. Dövlət başçısı ordeni döşümə sancıb "Təbrik edirəm, bu, sənin halal zəhmətinin haqqıdır” dedi. Həyəcanlı olsam da, özümü toparlayıb deyə bildim ki, sağ olun, cənab Prezident, bu uğurları Sizin böyük qayğınız sayəsində qazanmışıq. Söz verdim ki, bundan sonra daha böyük məsuliyyətlə çalışacaq, nailiyyətləri artıracağıq. Nəticə göz qabağındadır. Məhsulumuz bu il də boldur.

Söhbət bu məqama çatanda Tofiq kişidən xahiş etdik ki, pambıqçılıqdan qazandığı gəlirdən də danışsın. Məmnuniyyətlə razılaşdı: "Keçən il 50 hektarda pambıq əkib-becərdik. İl ərzində çəkdiyimiz bütün xərcləri çıxandan sonra xalis qazancımız 70 min manatdan çox oldu. Buna 10 hektar sahədə əkdiyimiz taxıldan, yüksək məhsuldar qaradolaq cinsli qoyunçuluq təsərrüfatından əldə etdiyimiz gəliri də əlavə etsək, böyük bir rəqəm alınar. Bu isə yaxşı yaşamaq üçün təbii ki, yetərlidir”.

Tofiq İsmayılov bacarıqlı təsərrüfatçı olmaqla yanaşı, həm də köhnə kişilərdəndir - mehriban bir ailənin başçısıdır. İki qız, bir oğul atası, səkkiz nəvənin babasıdır. Oğlu Fəqan Moskvada bizneslə məşğuldur. Köçürdüyü qızları Göyçək Bakıda, Rəsmiyyə Moskva şəhərində yaşayır. Hər il yayda nəvələri hər cür şəraiti olan doğma ocağa yığışır. Tofiq kişi son olaraq dedi ki, bizi belə xoş günlərə qovuşduran dövlətimizin dəstəyi və halal zəhmətimizdir.

Lazım QULİYEV,

"Azərbaycan”