Azərbaycan musiqi mədəniyyətinin işıqlı gələcəyinin təminatçısı olan gənclərimizdən biri də "İlin Gənci" mükafatına layiq görülmüş Yusif Cəfərbəylidir.
Əsası Ulu Öndər Heydər Əliyev tərəfindən qoyulan gənclər siyasəti Prezident İlham Əliyevin diqqət və qayğısı sayəsində mövcud ənənələr zəminində daha da təkmilləşdirilir. Azərbaycanın Birinci vitse-prezidenti Mehriban xanım Əliyevanın rəhbərlik etdiyi Heydər Əliyev Fondu tərəfindən gənclərin istedad və bacarıqlarının üzə çıxarılması istiqamətində həyata keçirilən layihələr yetişməkdə olan nəslin gələcəyinə etibarlı zəmin yaradır. Eləcə də Heydər Əliyev Fondunun vitse-prezidenti Leyla Əliyevanın təşəbbüsü ilə xaricdə və ölkəmizdə reallaşan layihələr Azərbaycanın uğurlarının təbliğində, gənclərimizin fəallığının artırılmasında və onların fəaliyyətlərinin əlaqələndirilməsində mühüm rol oynayır. Bu ali diqqət və qayğını daim öz üzərində hiss edən Azərbaycan gəncliyi göstərilən etimadı layiqincə doğrultmağa çalışır. Bu yüksək münasibətə cavab olaraq Azərbaycanın parlaq gələcəyinin təminatçısı olan gənclər bütöv və müstəqil dövlətimiz naminə bütün güclərini səfərbər edir, Vətənin inkişafı üçün səylə çalışır, öz siyasətində onlara arxalanan Prezident İlham Əliyevin uğurlu daxili və xarici siyasətini dəstəkləyirlər.
Belə gənclərimizdən biri də, qeyd etdiyimiz kimi, Gənclər Günü münasibətilə "İlin Gənci" mükafatına layiq görülmüş Yusif Cəfərbəylidir. Xalqımızın milli-mədəni irsini yaşadanlardan və inkişaf etdirənlərdən biri olan Yusif hələ orta məktəb illərindən musiqiyə, muğam sənətinə böyük maraq göstərib. Bu zaman həm də Bakı şəhəri, Niyazi adına 22 saylı Musiqi məktəbinin əvvəlcə tar, sonra xanəndəlik siniflərində oxuyub. Məktəb özfəaliyyət dərnəyinin üzvü kimi tədbirlərdə və bayram şənliklərində ifaları sevilərək qarşılanıb. O illərin ən yaddaqalan anlarından biri də Yusif musiqi məktəbinin son sinfində oxuyarkən respublika Elm və Təhsil Nazirliyinin və Estetik Tərbiyə üzrə Respublika Tədris-Metodik Mərkəzinin (2016) birgə təşkilatçılığı ilə Bakı və Gəncə şəhərlərində klassik Azərbaycan ədəbiyyatının görkəmli nümayəndəsi və mütəfəkkiri Nizami Gəncəvinin 875 illik yubileyinə həsr olunmuş baxış-müsabiqədə "Nizami yaradıcılığı və musiqi" nominasiyasına "N.Gəncəvinin sözlərinə ən yaxşı muğam ifası"na görə layiq görülməsidir.
Yusif orta məktəbi bitirdikdən sonra Azərbaycan Dövlət İqtisad Universitetinin İqtisadiyyat fakültəsində dünya iqtisadiyyatı ixtisası üzrə bakalavr təhsili almışdır. Universitetin ictimai-mədəni tədbirlərinin iştirakçısı, habelə təhsil ocağının nəzdində fəaliyyət göstərən İqtisadçı Vətənpərvərlər Təşkilatının sədri olmuşdur. O, tələbə-gənclərin boş vaxtlarının səmərəli keçməsində və onların əsl vətənpərvər kimi cəmiyyətə inteqrasiya olunmasında əlindən gələni etmişdir. Universiteti müvəffəqiyyətlə bitirən Yusif Cəfərbəyli daha sonra Azərbaycan Dövlət Mədəniyyət və İncəsənət Universitetində magistratura təhsili almışdır.
O, ali təhsilini başa vurduqdan sonra 2023-2024-cü illərdə Azərbaycan Respublikası Dövlət Sərhəd Xidmətinin (DSX) Sərhəd Qoşunlarında müddətli həqiqi hərbi xidmətdə olmuşdur. Əslən laçınlı olan Yusif sıravi sərhədçi əsgər olaraq təlim məşqlərində komandirlərinin tapşırıqlarını vaxtında və yüksək səviyyədə yerinə yetirməklə yanaşı, 2024-cü il ərzində Gənclər və İdman Nazirliyinin təşkilatçılığı ilə həyata keçirilən "Poliqon" gənclərin hərbi-vətənpərvərlik düşərgələrində bədii proqramların təşkilatçısı olmuşdur.
Vətən borcunu ləyaqətlə yerinə yetirdikdən sonra Y.Cəfərbəyli ölkəmizdə geniş vüsət almış könüllülük hərəkatının da fəal iştirakçısı olub. Təsadüfi deyil ki, Yusif Cəfərbəyli 2019-cu il martın 27-dən mayın 27-dək Bakı şəhər İcra Hakimiyyətində İctimai-siyasi, humanitar məsələlər və dini qurumlarla iş şöbəsində könüllü olaraq təcrübə proqramında iştirak edərək şəhadətnamə ilə təltif edilmişdir. Daha sonra Azərbaycan Respublikası Müdafiə Nazirliyi və UNEC-in birgə təşkilatçılığı ilə "Səninlə fəxr edirik, Azərbaycan əsgəri!" devizi altında keçirilən Azərbaycan Ordusuna mənəvi dəstək aksiyasının təşkilində, Azərbaycan Ordusunun şəxsi heyətinin mənəvi-psixoloji hazırlığının, vətənpərvərlik ruhunun yüksəldilməsində göstərdiyi xidmətlərə görə respublika Müdafiə Nazirliyinin mükafatına layiq görülmüşdür.
Ölkəmizin ictimai-siyasi həyatında gənclik eşqi ilə qurub-yaratmağa çalışan Yusif respublika Gənclər və İdman Nazirliyinin dəstəyi ilə 2019-cu ildə "Tələbə Baharı" tələbələrin XII Ümumrespublika yaradıcılıq festivalında "Muğam" musiqi nominasiyasında II yer, 2020-ci ildə "Tələbə Baharı" tələbələrin XIII Ümumrespublika yaradıcılıq festivalında "Muğam" musiqi nominasiyasında I yerə layiq görülmüşdür.
Prezident İlham Əliyevin sərəncamı ilə 2019-cu ilin "Nəsimi ili" elan olunması münasibətilə UNEC Yaradıcılıq Mərkəzi ilə birgə Türkiyənin paytaxtı Ankara şəhərində Nəsimiyə həsr olunmuş tamaşada xanəndə obrazında çıxış etmiş və Nəsiminin qəzəllərini muğam üstə ifa etmişdir. Yüksəksəviyyəli ifalara görə Azərbaycanın Türkiyədəki səfirliyi tərəfindən təşəkkürnamə və üzərində Nəsiminin rəsmi olan bürünc xatirə pul nişanı ilə təltif olunmuşdur. Bundan başqa, Gənclər və İdman Nazirliyinin, Heydər Əliyev Mərkəzinin birgə layihəsi olan "Heydər Əliyev siyasi məktəbini öyrənirik - 2020" Gənc Liderlər Proqramının icrasında fəallığı ilə seçilmişdir. O, gənc muğam ifaçısı kimi 2021-ci il oktyabrın üçüncü ongünlüyündə Azərbaycan Respublikasının Gənclər Fondu, Naxçıvan Muxtar Respublikasının Gənclər Fondu və Türkiyə Gənclik Vəqfinin (TÜGVA) birgə təşkilatçılığı ilə Türkiyənin Qaziantep şəhərində keçirilən "Beynəlxalq Zəfər Düşərgəsi"nin iştirakçısı olmuşdur.
Respublikanın Əməkdar artisti, muğam ustası Təyyar Bayramovun rəhbərliyi ilə muğam sənətinin ən incə məqamlarını dərindən öyrənməklə sevdiyi sənətə böyük məsuliyyət və istək hissi ilə yanaşan gənc xanəndə Yusif Cəfərbəyli 2021-2023-cü illərdə Azərbaycan Dövlət Mədəniyyət və İncəsənət Universitetinin Kulturologiya fakültəsinin Menecment (musiqi sahəsi üzrə) ixtisası üzrə magistr təhsili alaraq, "Azərbaycan milli musiqi potensialının tanınmasında müasir menecment metodlarından istifadə" mövzusunda magistr dissertasiyası işini müdafiə etmişdir.
İstedadla zəhmət bir-birini tamamlayanda uğurlar insana daha yaxın olur. Belə bir uğura gənc muğam ifaçısı Yusif Cəfərbəyli Bakıda "Xurşidbanu Natəvanın 190 illiyinə həsr edilmiş "Milli Musiqi" müsabiqəsi" layihəsi ilə "İdeyanı Reallaşdır 2022" Gənclərin Fərdi Layihələri üzrə Qrant müsabiqəsinin qalibi kimi nail olmuşdur.
Gənc müğənni ötən il dekabr ayının əvvəllərində musiqi mədəniyyətimizin beşiyi olan Şuşa şəhərində Azərbaycan Respublikası Gənclər və İdman Nazirliyinin İslam Əməkdaşlıq Təşkilatı Gənclər Forumu (ICYF) və Azərbaycan Respublikasının Mədəniyyət Nazirliyi ilə birgə həyata keçirdiyi "Şuşa - İslam Əməkdaşlıq Təşkilatının Gənclər Paytaxtı 2024" Beynəlxalq Proqramının bağlanış mərasimində muğam kompozisiyası ilə çıxış etmişdir. Bu möhtəşəm mərasimdə gənc xanəndə Yusif Cəfərbəylinin ifa etdiyi "Qarabağ şikəstəsi" muğamı və "Sarı gəlin" xalq mahnısı dinləyicilər, xüsusilə xarici ölkələrdən gəlmiş qonaqlar tərəfindən böyük rəğbətlə qarşılanmışdır.
Rəhman SALMANLI,
"Azərbaycan"
