Son illər kənd təsərrüfatının inkişafına dövlət səviyyəsində göstərilən diqqət və verilən dəstək sayəsində gədəbəylilər də aqrar sektorda bir sıra uğurlara nail olurlar. Xüsusilə kartofçuluq sahəsində qazanılan nailiyyətlər hər cəhətdən daha səmərəlidir.
Keçən il rayonda 10 min 44 hektarda kartof əkən təsərrüfat sahibləri 126 min 556 ton məhsul götürüblər. Lakin Gədəbəy Aqrar İnkişaf Mərkəzinin direktoru Asəf Nağıyevin sözlərinə görə, bu il məhsuldarlıq daha çox olacaq: "Bunun əsas səbəbi kartof əkildikdən sonra uzun müddət yağışların yağmasıdır. Yağışlar torpağa can verdi. İndi rayonda kartof əkən bütün təsərrüfat sahiblərinin üzü gülür. Bilirlər ki, əvvəlki illərdən fərqli olaraq bu il sahələrdən bol məhsul götürəcəklər. Elə bir kəndimiz yoxdur ki, orada kartof əkilməsin. Slavyanka, Zəhmət, Söyüdlü, Saratovka, Qızıltorpaq və başqa kəndlərdə bol məhsul yetişmişdir. Hazırda kartofun ziyanvericilərdən qorunması üçün mübarizə tədbirləri görülür".
Gədəbəylilər, əsasən, "Telman", "Əmiri", "Ağçiçək" sortlarına üstünlük verirlər. Təsərrüfat sahibləri deyirlər ki, Gədəbəy torpaqlarında bu kartof sortları məhsuldar olur. Keçən il hər hektardan 130 sentner məhsul götürülsə də, cari il fermerlər bu göstəricini 150 sentnerə çatdırmaq istəyirlər.
Azərbaycanda əsas kartofçuluq rayonu sayılan Gədəbəydə seleksiya işləri də aparılır. İki ildir ki, Azərbaycan Elmi Tədqiqat Tərəvəzçilik İnstitutunun alimləri rayon ərazisində daha məhsuldar kartof sortlarının yetişdirilməsi ilə məşğuldurlar. Aparılan seleksiya işlərinin nəticələri müsbətdir. Slavyanka kəndi ərazisində aparılan seleksiya işləri nəticəsində yeni məhsuldar "Çənlibel", "Vaqif", "Uğur" və "Turan" sortları yetişdirilib. Xəstəliklərə qarşı davamlı olan həmin sortların məhsuldarlığı 250 sentnerə çatır. Hazırda rayonun bir neçə təsərrüfat sahibi həmin kartof sortlarından əkmişdir.
Saratovka kəndinin sakini Əli İsmayılov kartofçuluq sahəsində zəngin təcrübə toplayıb. Hər il 20 hektardan çox sahədə məhsul yetişdirir. Bu sahələrdən 300 tona yaxın məhsul götürən fermer deyir ki, istehsal etdiyi kartofun satışında elə bir problem yaşamır. Məhsulun yarıdan çoxunu yüksəkkeyfiyyətli olduğu üçün elə sahədəcə satır.
Onu da deyək ki, Əli İsmayılov kartofun əkinindən tutmuş yığımınadək bütün işləri texnika ilə həyata keçirir. Fermerin təsərrüfatında kartof toxumunun çeşidlənməsi üçün lazım olan aqreqatlar və çeşidlənmiş toxumluq kartofu saxlamaq üçün anbar var.
Gədəbəydə kartofçuluqda zəngin təcrübə qazanan fermerlərdən söz düşəndə Saratovka kəndinin sakini Ramiz Əliyevin, Daşbulaq kəndinin sakini Hafiz Fətəliyevin, Düz Rəsullu kəndinin sakini İmran Həsənovun da adlarını çəkirlər. Onlar hər il hektardan 250 sentnerədək məhsul götürürlər. Bu işinə görə Hafiz Fətəliyev dövlət başçısının sərəncamı iə II dərəcəli “Əmək” ordeninə layiq görülüb. Hazırda Gədəbəydə kənd təsərrüfatı işlərinin qızğın çağıdır. Xüsusilə əkin sahələrində ən çox gözə dəyən kartof becərənlərdir. Onlar yetişdirdikləri məhsulu qoruyub saxlamaq və daha çox məhsul istehsalına nail olmaq üçün var qüvvələrini əsirgəmirlər.
Sabir ƏLİYEV,
"Azərbaycan"
