Fransa Prezidenti Emmanuel Makron və Baş nazir Fransua Bayru V Respublika tarixində ən az bəyənilən lider tandemi adlandırılıb. Bu barədə IFOP institutunun “Journal du Dimanche” qəzeti üçün apardığı sorğunun nəticələrində məlumat verilir.
AZƏRTAC xəbər verir ki, sorğunun nəticələrinə görə, Prezident Emmanuel Makron cəmi 19 faiz, Baş nazir Fransua Bayru isə 18 faiz ictimai dəstəyə malikdir. Beləliklə, onların birlikdə qazandığı ümumi razılıq səviyyəsi 37 faizi keçmir. Bu göstəricilər Fransa cəmiyyətində icra hakimiyyətinə qarşı dərin narazılıq və ümumi məyusluğun bariz ifadəsidir.
Hətta François Hollande və Manuel Valls dövründə belə xalq arasında bu qədər aşağı dəstək qeydə alınmayıb. Həmin vaxtda Valls 38 faiz dəstəyə sahib idi və bu, ümumi razılıq səviyyəsini 51 faizə çatdırırdı. İndiki rəqəmlər isə V Respublika tarixində ən zəif hökumət dəstəyi kimi qiymətləndirilir.
Aprel ayında Donald Trampın gömrük rüsumlarına dair açıqlamalarından sonra Prezident Emmanuel Makronun reytinqi 28 faiz səviyyəsində idi. Lakin son sorğuda onun populyarlığı ilk dəfə olaraq 20 faizdən aşağı düşüb. Halbuki Makron “sarı jiletlilər” böhranı zamanı belə 23 faiz, Barnier hökumətinin parlamentdəki məğlubiyyətində isə 21 faiz dəstək səviyyəsini qorumağı bacarmışdı. Bu isə onun hazırkı mövqeyinin əvvəlki siyasi sarsıntılara nisbətən daha zəif olduğunu göstərir.
Makronu 2022-ci ildə dəstəkləmiş seçicilər arasında belə narazılıq artır. Hazırda onların cəmi 49 faizi Prezidentin fəaliyyətindən razıdır – bu da 12 faiz azalmanı göstərir. Seçicilərindən əlavə, Makrona dəstəyin menecerlər arasında 8 bənd, iş adamları arasında isə 18 bənd azalması qeydə alınıb.
Sorğu, həmçinin göstərir ki, Fransua Bayru V Respublika tarixində ən qeyri-populyar Baş nazir hesab olunur. Xüsusilə Bayrunun Pasxa və 8 May tətil günlərini ləğv etmək təklifi, onun nüfuzuna daha da zərbə vurub.
