Birləşmiş Millətlər Təşkilatının Ərzaq və Kənd Təsərrüfatı Təşkilatına (FAO) görə, tədrici yaxşılaşmaya baxmayaraq, dünya dəniz balıq ehtiyatlarının 35 faizindən çoxu həddən artıq ovlanır.
AZƏRTAC təşkilatın məlumatına istinadla xəbər verir ki, bu rəqəm iyunun 11-də BMT-nin okeanlarla bağlı konfransında açıqlanan “Dünya dəniz balıqçılıq resurslarının vəziyyəti” adlı 2025-ci il üzrə icmalda açıqlanıb. Hesabatda göstərilib ki, dəniz balıq ehtiyatlarının 64,5 faizi bioloji cəhətdən dayanıqlı hədlər daxilində istismar edilsə də, onların 35,5 faizi həddindən artıq balıq ovu təzyiqləri ilə üzləşir.
FAO vurğulayıb ki, son illərdə qlobal miqyasda ifrat dərəcədə balıq ovu ildə təxminən 1 faiz artıb. Bununla belə, uzunmüddətli, elmi əsaslı balıqçılıq idarəçiliyi strategiyalarından istifadə edən regionlar nəzərəçarpacaq irəliləyişlər əldə ediblər. Bu göstərici Sakit okeanın şimal-şərqində 92,7 faiz, cənub-qərb akvatoriyasında isə 85 faiz təşkil edir.
Bunun əksinə olaraq, davamlılıq digər sahələrdə narahatlıq doğurur. Sakit okeanın şimal-qərbində balıq ehtiyatlarının yalnız 46 faizi, şərqi-mərkəzi Atlantikada isə 47,4 faizi davamlı şəkildə ovlanır. Antarktika bölgəsində qiymətləndirilən balıq ehtiyatları arasında 100 faiz davamlılıq var.
FAO-nun baş direktoru Qu Donqyu bildirib: “Effektiv idarəetmə balıqçılıq resurslarının mühafizəsi üçün ən güclü vasitə olaraq qalır. Bu icmal dəqiq məlumatlara əsaslanaraq daha konkret qərarların qəbul edilməsinə imkan verən hərtərəfli anlayışı təmin edir. Son hesabat hökumətlərə siyasət formalaşdırmaq və ardıcıl şəkildə əlaqələndirmək üçün lazım olan sübutlar verir”.
Hesabatın hazırlanmasında 92 ölkədən 650-dən çox ekspert iştirak edib və qlobal miqyasda 2570 balıq ehtiyatının davamlılığı qiymətləndirilib.
jpeg_1766065291.jpeg)
