Ölkəmizin sıx əməkdaşlıq etdiyi beynəlxalq qurumlardan biri də BMT-nin Ərzaq və Kənd Təsərrüfatı Təşkilatıdır (FAO). Azərbaycan bu təşkilata 1995-ci ildə üzv olub.
Həmin tarixdən ölkəmizdə FAO milli, regional və qlobal layihələr həyata keçirir.   İcra edilən layihələrin əsas məqsədi kənd təsərrüfatının inkişafı, ərzaq təhlükəsizliyinin gücləndirilməsi, potensialın artırılması, resursların idarə edilməsi, həmçinin heyvan və bitki xəstəliklərinə qarşı mübarizə, təchizat və texniki yardımların göstərilməsidir.
Bu təşkilatın rəhbərliyi dəfələrlə Azərbaycanla əməkdaşlıqdan məmnun olduğunu bildirmiş, ölkəmizi etibarlı tərəfdaş kimi yüksək qiymətləndirərək üzərinə götürdüyü öhdəlikləri layiqincə yerinə yetirdiyini vurğulamışdır. O üzdən Azərbaycanla beynəlxalq təşkilat arasında olan əlaqələr ildən-ilə genişlənərək daha çox sahələri əhatə etməyə başlamışdır. 
2009-cu ildə Azərbaycan Hökuməti ilə BMT-nin Ərzaq və Kənd Təsərrüfatı Təşkilatı aqrar sahənin inkişafında texniki yardımın göstərilməsi üçün dəstək proqramının hazırlanması prosesinə start vermişdir. Xüsusi olaraq Azərbaycan üçün FAO-nun Milli Ortamüddətli Prioritetlər üzrə 2016-2020-ci illəri əhatə edən Çərçivə Sənədi hazırlanmışdır və bu sənəd müntəzəm surətdə ölkəmizin prioritetlərinə uyğun olaraq yenilənməkdədir. Sözügedən sənəd hökumətin mövcud milli siyasəti və planları çərçivəsində kənd təsərrüfatı üzrə inkişaf prioritetlərinin həyata keçirilməsində müəyyən olunmuş səviyyədə xidmətlər göstərilməsini nəzərdə tutur. Sənədin əsas mahiyyəti ölkədəki vəziyyətin qısa təhlili və növbəti 3-4 il müddətində yardım üçün prioritet tədbirlərin həyata keçirilməsindən ibarətdir.
Bakıda 2012-ci il aprelin 16-da  FAO  və qeyri-hökumət təşkilatlarının Avropa üzrə regional müşavirəsi, həmin ayın 17-18-də Kənd Təsərrüfatı üzrə Avropa Komissiyasının 37-ci sessiyası, 19-20-də isə FAO-nun 28-ci Avropa Regional Konfransı keçirilmişdir.  Bu tədbirlər təşkilatın ölkəmizlə əməkdaşlıqdan razı qalmasının göstəricisidir. 
"Azərbaycan Hökuməti və FAO arasında tərəfdaşlıq və əlaqələndirmə ofisinin yaradılması və texniki yardımın göstərilməsi haqqında Saziş" və "Azərbaycan Hökuməti və FAO arasında FAO-Azərbaycan Tərəfdaşlıq Proqramı haqqında Saziş" təşkilatın baş direktoru Qratsiano da Silvanın Azərbaycana səfəri zamanı 2015-ci il mayın 25-də imzalanmış, 2015-ci il oktyabrın 12-də Prezidentin fərmanı ilə təsdiq edilmişdir.
2015-ci ildə "Ətraf Mühitin Mühafizəsi naminə Beynəlxalq Dialoq" (IDEA) İctimai Birliyinin təsisçisi, Heydər Əliyev Fondunun vitse-prezidenti Leyla Əliyeva FAO-nun xoşməramlı səfiri seçilmişdir. Bundan sonra Heydər Əliyev Fondunun maliyyə dəstəyi ilə BMT-nin Ərzaq və Kənd Təsərrüfatı Təşkilatının Romadakı baş ofisində "Azərbaycan otağı" təsis edilmişdir. Burada MDB ölkələri arasında ilk dəfə məhz Azərbaycanın adını daşıyan otaq yaradılmışdır. Otağın tərtibatında Azərbaycanın milli ornamentlərindən, musiqi alətlərindən və xalçalarından istifadə edilmişdir.
Bu günlərdə BMT-nin Ərzaq və Kənd Təsərrüfatı Təşkilatının Avropa və Mərkəzi Asiya üzrə Regional nümayəndəsi Viorel Gutunun rəhbərlik etdiyi nümayəndə heyətinin ölkəmizə səfəri zamanı təşkilatla Azərbaycan arasında ikitərəfli əlaqələrin daha da genişləndirilməsi müzakirə olunmuşdur. Kənd Təsərrüfatı Nazirliyində görüş zamanı qonaqların nəzərinə çatdırılıb ki, aqrar sahədə qabaqcıl təcrübənin ölkəmizdə tətbiqi məqsədilə beynəlxalq təşkilatla əməkdaşlıqda maraqlıyıq.
Məlum olduğu kimi, Azərbaycan  növbəti bir beynəlxalq tədbirə evsahibliyi edəcək. Prezident İlham Əliyev dünya ölkələrinin yekdilliklə COP29-un ölkəmizdə keçirilməsinə razılıq verməsini Azərbaycana göstərilən böyük etimad olduğunu bildirmişdir. Ölkəmizdə COP29-un keçirilməsini dəstəkləyən beynəlxalq qurumlardan biri də BMT-nin  Ərzaq və Kənd Təsərrüfatı Təşkilatıdır. Bu mötəbər təşkilatın Avropa və Asiya üzrə Regional nümayəndəsi Viorel Gutun Kənd Təsərrüfatı Nazirliyində keçirilən görüşdə BMT-nin İqlim Dəyişiklikləri üzrə Çərçivə Konvensiyasının 29-cu sessiyasının Azərbaycanda yüksək səviyyədə keçirilməsinə hər cür dəstək verməyə hazır olduğunu bildirmişdir. 

Rüstəm KAMAL,
"Azərbaycan"