Ətirli və dadlı heyvanın insan orqanizminə faydaları da saymaqla bitmir. Hüceyrələri sərbəst radikalların zədələnməsindən qoruyan bu meyvə zəngin antioksidant mənbəyidir. 
Elmi araşdırmalar göstərir ki, heyvanın tərkibindəki antioksidantlar iltihabı azaldır, ürək xəstəliyi kimi xroniki xəstəliklərdən insanı qoruyur.
Həmçinin tərkibindəki yüksək antioksidant və vitaminə görə dərinin sağlam və gənc qalmasına fayda verir, qırışları azaldır, ləkələri aradan qaldırır, sərbəst radikalların dəri hüceyrələrinə vurduğu zərəri aradan qaldıraraq dərini ultrabənövşəyi şüaların təsirindən qorumağa kömək edir.
Heyva allergik reaksiyaları idarə etmək qabiliyyətinə görə də seçilir. Dəriyə məlhəm və ya gel kimi tətbiq edildikdə, atopik dermatit (dərinin xroniki iltihabi xəstəliyi) və buna bənzər dəri xəstəliklərinin sağalmasına fayda verir. 
Onun zəngin mineral tərkibinə dəmir, mis və sink daxildir. Bu üç mineral qırmızı qan hüceyrələrinin istehsalı üçün vacibdir. Qırmızı qan hüceyrələrinin istehsalı yüksək olduqda bədəndə daha çox oksigen daşınır və bunun sayəsində qan dövranı artır. Eyni zamanda bu, başın dərisinə artan qan axınını təmin edir, saç folikullarının sağlamlığını yaxşılaşdırır. 
Heyva ishal, mədə ağrılarına və ürək bulanmasına müsbət təsir göstərir. Bu meyvənin şirəsinin mədə xoralarına kömək etdiyi və mədə-bağırsaq traktını sakitləşdirdiyi də məlumdur. O həmçinin pis xolesterin olaraq bilinən LDL xolesterinindən və damar tıxanması kimi ürək-damar xəstəliklərindən qoruyur.