"Ermənistanın ABŞ başda olmaqla, Qərbin Cənubi Qafqaz üçün çox təhlükəli geosiyasi ambisiyalarının həyata keçirilməsinin bələdçisinə çevrildiyi getdikcə daha aydın müşahidə edilir. ABŞ-nin ən böyük səfirliyi İraqdan sonra Ermənistandadır. Heyətinin sayı 2500-ə yaxın olan səfirlik Ermənistan ərazisindən bütün regionu əhatə edən təhlükəli bir strategiyanı həyata keçirməklə məşğuldur".
Bu fikirləri "Azərbaycan" qəzetinə açıqlamasında Milli Məclisin deputatı Elşad Mirbəşiroğlu deyib. O bildirib ki, Amerikanın Ermənistandakı səfirliyinin tərkibində 800 nəfərə qədər ABŞ-nin "dəniz pişikləri" adlanan qoşun növünün hissəsi də mövcuddur. ABŞ özünün hərbi mövcudluğunu Ermənistanda artıq təmin edib. Son vaxtlarda iki hərbi təyyarənin Ermənistana gəlməsi, onun yükünün silahlardan və ABŞ hərbçilərindən ibarət olması bir daha göstərir ki, Vaşinqton Ermənistan vasitəsilə bu regionda gərginlik yaratmağı qarşısına məqsəd kimi qoyub. "Ermənistan son günlərdə Azərbaycan mövqelərini intensiv atəşə tutur. KİV-də gedən məlumatlara görə, Kəlbəcər istiqamətində mövqelərimiz atəşə tutularkən ABŞ-yə məxsus hərbi təlimatçılar da burada iştirak ediblər. Deməli, Amerika regionda gərginliyin artması məqsədilə özü üçün yol xəritəsi də hazırlayıb. Bunun icraçısı rolunda Ermənistan və ABŞ hərbçiləri birgə hərəkət edirlər", - deyə deputat əlavə edib.
Bu il aprelin 5-də Brüsseldə Ermənistan baş naziri, ABŞ dövlət katibi və Avropa Komissiyasının rəhbəri arasında keçirilmiş görüşü xatırladan E.Mirbəşiroğlu bildirib ki, Avropa rəsmiləri əvvəl məqsədin Ermənistana əlavə təhlükəsizlik təminatlarının verilməsi imkanlarının müzakirəsi olacağını etiraf etsələr də, Azərbaycan və Rusiyanın sərt reaksiyasından sonra görüşün məqsədini fərqli izah etməyə başlayıblar. Guya Ermənistanda sosial-iqtisadi inkişafa dəstək veriləcəkmiş. Amma sonradan məlum oldu ki, görüşdə hərbi-texniki sahədə əməkdaşlıq, ermənilərə əlavə təhlükəsizlik təminatının verilməsi məsələləri müzakirə olunub. Görüşün ardınca Ermənistan Fransa tərəfindən intensiv silahlandırılmağa başladı. Bununla bərabər Hindistan da Ermənistana silahlar daşımağa başladı. Onların verdiyi silahlar da Fransa lisenziyasında istehsal olunanlar idi.
Deputat qeyd edib ki, Ermənistan ABŞ ilə öz ərazilərində hərbi təlimlər keçirir, NATO-nun Cənubi Qafqazda mövcudluğunu, demək olar ki, təmin edib: "Ermənistanın ərazisində Avropa İttifaqının mülki missiyası da mövcuddur. Yaxşı bilirik ki, bu missiyanın tərkibi Almaniyanın, Fransanın güc strukturlarının təmsilçilərindən ibarətdir. Onlar Azərbaycan başda olmaqla, Cənubi Qafqaz ölkələrinə qarşı kəşfiyyat fəaliyyəti həyata keçirirlər. Bu proseslərin mərkəzində dirijor rolunda ABŞ çıxış edir. Məqsəd ondan ibarətdir ki, regionda yenidən ciddi gərginlik yaradılsın. Münaqişə elementlərinin yaradılması Qərbin beynəlxalq mexanizm adlandırdığı alətlərin tətbiqinə imkan verəcək. Bunun da mahiyyəti ondan ibarətdir ki, həmin qüvvələr Cənubi Qafqaz regionunda özünün hərbi və siyasi mövcudluğunu təmin etsinlər".
E.Mirbəşiroğlu vurğulayıb ki, Cənubi Qafqaz regionu həmçinin Rusiyaya qarşı ikinci cəbhə kimi də nəzərdə tutulur. ABŞ-nin əsas geosiyasi hədəfi odur ki, Rusiyanın regionda mövcudluğuna son qoysun. Elə bunun müqabilində də Ermənistana dəstək verir. Ermənistana verilən vədlər içərisində həm də Azərbaycana qarşı revanşa hazırlanma və itirmiş olduğu mövqelərini geri qaytarma var. Ermənistan deklorativ şəkildə sülh istəklərini sərgiləsə də, amma nə konstitusiyasında dəyişlik edir, nə də ATƏT-in Minsk qrupunun fəaliyyətinin dayandırılmasını istəyir. "Bütün bunlar onu göstərir ki, Ermənistan üçün münaqişə lazımdır. O, Azərbaycana olan ərazi iddialarından geri çəkilmək niyyətində deyil. O, ABŞ-dən dəstək almaqla təxribatçı cəhdlərini davam etdirmək qərarındadır. Son dövrlərdə Azərbaycan mövqelərinin atəşə tutulmasının əsas məqsədi də münaqişənin davam etdiyi təəssüratını yaratmaqdır və belə olan halda Minsk qrupunun aktuallığını gündəmdə saxlamaqdır. Azərbaycan tərəfi isə bildirir ki, münaqişə başa çatıb və biz torpaqlarımızı işğaldan azad etmişik. Odur ki, ATƏT-in Minsk qrupuna ehtiyac yoxdur. Bu qurum heç vaxt münaqişənin tənzimlənməsi ilə məşğul olmayıb, sadəcə, Ermənistanın xeyrinə münaqişəni idarə edib. Biz də bunun qarşısını almışıq. Azərbaycan region üçün həm unikal təhlükəsizlik mühiti yaradıb, həm də səmərəli əməkdaşlıq imkanlarını formalaşdırıb", - deyə müsahibimiz əlavə edib.
Deputat vurğulayıb ki, ABŞ isə bunu istəmir, çünki Cənubi Qafqazda yaranan yeni reallıqlar və formalaşan imkanlar onun maraqları ilə ziddiyyət təşkil edir. Çünki regionda münaqişə yoxdursa, ABŞ bura müdaxilə edə bilməyəcək. Konstruktiv dialoq üçün Azərbaycan regionda maraqları olan bütün subyektləri uzlaşdırmağa hazır olan dövlətdir. Azərbaycanın istəyi odur ki, Cənubi Qafqaz regionu təhlükəsizlik coğrafiyasına çevrilsin və geniş əməkdaşlıq platforması yaransın. Prezident İlham Əliyev bu istiqamətdə strateji baxışlara sahibdir və buna uyğun da təsirli addımlar atır. Bu addımların qarşısını alacaq bir güc isə yoxdur.
Ə.QARDAŞXANOVA,
"Azərbaycan"
jpg_1773406632.jpg)
jpg_1773404787.jpg)
