Və həbsinə hazırlaşır
Son dövrdə Hayastan və Rusiya arasında münasibətlərin kifayət qədər pisləşməsi, iki ölkənin əlaqələrinin kəskin ziddiyyətlər mərhələsinə qədəm qoyması müşahidə olunmaqdadır. Hayastan Qərbin verdiyi vədlərə arxayın olaraq müttəfiqi Rusiyaya qarşı çıxır. Hər halda Paşinyan hakimiyyətinin nümayiş etdirdiyi xarici siyasət də onun konkret seçim etdiyini göstərir, Rusiyanın xeyrinə olmayan istiqamətdə israrlı davranmağa çalışır. Yəni, Qərb qarşısında götürdüyü öhdəlikləri yerinə yetirir.
Bütün bunların fonunda Roma Əsasnaməsinin (Roma Statutu) qəbul edilməsi Ermənistan və Rusiya arasındakı münasibətlərin daha da gərginləşməsi anlamına gəlir. Belə ki, dünən Hayastan parlamenti 62 səs lehinə olmaqla Roma Statutunu ratifikasiya edib. Parlamentin müxalif "Hayastan" və "Patev unem" fraksiyalarının üzvləri səsvermədə iştirak etməyiblər.
Beləliklə, rəsmi İrəvan Beynəlxalq Cinayət Məhkəməsinin öhdəliklərini öz üzərinə götürərək, Rusiya prezidenti Vladimir Putinin bu ölkəyə səfəri çərçivəsində onu həbs etmə hüququna malik olub.
Ümumiyyətlə, Nikol Paşinyanın Rusiyanı Hayastanın təhlükəsizliyinə qarant dura bilməməkdə, üçtərəfli anlaşmaların mövcud öhdəliklərinin icrasından məqsədli şəkildə yayınmaqda suçlaması Kremlin səbrini ciddi şəkildə sınağa çəkib. "4rd.am" nəşri yazıb ki, Nikol Paşinyan hökuməti üçün havada bir təhlükə var. Qeyd olunub ki, Hayastanda həm hakimiyyət, həm müxalifət, həm də ictimaiyyətin geniş təbəqələri bundan danışır. Təhlükənin haradan gəldiyi hələ görünməsə də, faktdır ki, müxalifətçilərin gözləntiləri, Nikol Paşinyan və komanda yoldaşlarının təşviş və qorxusu var. Geniş ictimaiyyət isə yaxın gələcəkdə kimin kimlə əvəzlənəcəyini gözləyir.
Qeyd olunub ki, Nikol Paşinyan Hayastanda öz yerinə rusiyayönlü fiqurun gələcəyindən ehtiyat edərək, hələ də Qərbdən dəstək almağa, hakimiyyətini saxlamağa çalışır. İndi bütün komanda təbliğat-təşviqat kampaniyası, səs toplamaq ilə yanaşı, həm də məktub və zənglərlə məşğuldur ki, Nikol Paşinyanın getməsinin Hayastanda Rusiyanın güclənməsi anlamına gəldiyini müxtəlif paytaxtlara başa salsınlar.
Diplomatik korpusa Paşinyan hakimiyyətinin üzləşdiyi təhlükələr barədə müxtəlif kanallar vasitəsilə müxtəlif ölkələrin hakimiyyət orqanlarını məlumatlandırmaq da tapşırılıb. Bir vaxtlar Rusiyada Hayastana lobbiçilik edən qüvvələr də indi tamam əks mövqe sərgiləyirlər. Əsas səbəb kimi də o göstərilir ki, Paşinyan anti-Rusiya siyasəti yürüdür və Qərbdən gələn göstərişlər əsasında hərəkət edir. Açıq qeyd olunur ki, Paşinyan Hayastanın ənənəvi strateji müttəfiqi olan Rusiya ilə münasibətləri korlamaq xəttini seçib.
Məlumdur ki, Rusiyanın orbitindən uzaqlaşmaq, ərazisindəki rus hərbi bazalarını çıxarmaq baş nazir Nikol Paşinyanın qarşısında duran prioritet məsələ olub və indi də nəyin bahasına olursa-olsun, bu tələbi reallaşdırmağa çalışır. Şübhəsiz, bu istiqamətdə ilk addım da Kollektiv Təhlükəsizlik Müqaviləsi Təşkilatından (KTMT) çıxmaq qərarıdır. Baş nazir Nikol Paşinyan təşkilatı tərk etmək barədə Qərbin qoyduğu tələbi artıq reallaşdırmaq üzrədir.
Bir neçə gün bundan öncəki açıqlamalarında Hayastan baş naziri bir çox problemlərin yaranmasında Rusiyanı günahkar hesab edərək deyib ki, Moskvanın hərbi mövcudluğu İrəvanın təhlükəsizliyinə təhdid yaradır.
Dünən Kremlin sözçüsü Dmitri Peskov da Ermənistanın son qərarına münasibətini açıqlayıb: "Kreml istəməzdi ki, Vladimir Putin nə vaxtsa Ermənistana səfərdən imtina etməli olsun. Kreml Ermənistanın Roma Statutunu ratifikasiya etməsini ikitərəfli münasibətlər baxımından yanlış addım hesab edir və Ermənistanın Roma Statuna qoşulmasından sonra Rusiya diplomatik həll yolu tapmağa çalışacaq".
Peskov vurğulayıb ki, Kreml İrəvanın ikitərəfli mexanizmlər və KTMT-ni tənqid etməsi ilə razılaşmır və Ermənistanın bu mexanizmlərdən yaxşı heç nəyi yoxdur. "Rusiya Qarabağ ermənilərinə humanitar yardım göstərməkdə davam edir. Bugünkü Qarabağ ətrafında vəziyyət Paşinyanın özünün verdiyi qərar idi", - deyə o qeyd edib.
Beləliklə, bütün bunlar onu deməyə əsas verir ki, İrəvan bu istiqamətdə yaxın vaxtlarda kəskin addımlar ata bilər. Görünən odur ki, Hayastanda anti-Rusiya ritorika və bəyanatları artmaqda davam edəcək.
Elçin CƏFƏROV,
"Azərbaycan"
