Prezident İlham Əliyevin Milli Məclisdə səsləndirdiyi fikirlər Ermənistanda böyük narahatlığa səbəb olub
Prezident İlham Əliyevin yeddinci çağırış Azərbaycan Respublikası Milli Məclisinin ilk iclasında çıxışı zamanı Ermənistanla bağlı səsləndirdiyi fikirləri İrəvanda da xüsusi diqqət mərkəzindədir. Dövlət başçısının verdiyi açıq mesajlar həm də erməni sosial şəbəkə istifadəçilərinin də nəzərindən qaçmayıb.
Xəbər portallarının rusdilli versiyasında dövlətimizin başçısının parlamentdəki çıxışından yayılan hissələrin, videoçarxların təqdim olunaraq müzakirəyə çıxarılması məğlub ölkədə ictimai çaşqınlığı və bunun artıq xaosa çevrildiyini göstərir. Bu fonda erməni cəmiyyəti Sarkisyan-Koçaryan rejimindən sonra Paşinyanı da artıq Ermənistanın əsas bəlası saymağa başlayıb.
Ermənilərin sosial şəbəkələrdəki statusları, şərhləri göstərir ki, onlar ölkələrinin məhvə doğru getməsi, İlham Əliyevin Ermənistan üzərində üstünlüyünün artması barədə ortaq rəydədirlər. Erməni istifadəçilər tərəfindən yazılan status və şərhləri oxucuların diqqətinə çatdırırıq.
Siyasi ekspert Artyom Qazaryan yazır ki, 2024-cü ili də ağır hisslər və əhvali-ruhiyyə ilə başa vurmaq üzrəyik. 30 ildən sonra 44 günlük müharibə məğlubiyyətinə və minlərlə gənc həyatların ağır itkilərinə sahibik: "Otuz ildən sonra ermənilər Ermənistanı təhdid edən güclü problemlər qarşısında, demək olar, gücsüz vəziyyətə düşüblər. İndi danışmaq hədsiz dərəcədə çətindir. Bəlkə də danışmaq lazım deyil. Gənclərimizin itkisinə sakitcə yas tutmaq, digər müharibə itkilərini güclə daşımaq və iş görmək - dövləti bu çuxurdan çıxarmaq və suverenlik, müasirlik yoluna qoymaq üçün iş görmək lazımdır. Amma görülmür. Biz bu gedişlə Qarabağdan əlavə, Ermənistanı da itirə bilərik. Çünki insanlarda heç bir inam qalmayıb".
Raçik Nalbandiyan "VKontakte" sosial şəbəkəsində Prezident İlham Əliyevin açıqlamalarının yer aldığı xəbərin rəy bölümündə Paşinyanın şəklini paylaşaraq "Ermənistanı sizinlə daha parlaq gələcək gözləyir" şərhi çoxsaylı tənqidlərə, təhqirlərə tuş gəlib. Karen Melikyan adlı istifadəçinin bu fotoya şərhi isə daha çox bəyənmə toplayıb: "İlham Əliyev bizim Paşinyanı informasiya müharibəsində də məğlub etməkdə davam edir. Müxtəlif sosial qruplarda "klaviatura qəhrəmanları" çoxsaylı statuslar və şərhlərlə bildirirlər ki, belə çıxış etməklə Nikolu Əliyev qarşısında çox aşağı səviyyəyə salırsınız. Vətənə xəyanət edirsiniz. Vətənə biz yox, Paşinyan və onu burada müdafiə edənlər xəyanət edirlər. Neyləməliyik? Ermənistan məhv olur, susmalıyıq?"
Tatevos Şaumyan adlı istifadəçi "X"də Prezident İlham Əliyevin " Ermənistan, əslində, sülh istəmir, vaxt uzatmaq, bu vaxtdan istifadə edərək, xarici himayədarların dəstəyi ilə hərbi potensial qurmaq istəyir. Artıq bəzi Avropa ölkələrinin və təkcə Avropa deyil, digər Qərb ölkələrinin nümayəndələri Ermənistan ordusunda işə başlayıblar" sözlərinə belə reaksiya verib: "Bir neçə dəfə bu cür statuslarıma görə, tənqid edilib, hətta döyülmüşəm. Bizim başqalarının torpaqlarında nə işimiz var, axı? Özüm də Zəngəzurdanam. Zəngəzur bu anda regionun geosiyasi mərkəzidir. İlham Əliyev Ermənistanı sülhə çağırır, Paşinyan isə yalançı vədlərlə yeni ordu yaradır. Fransa başda olmaqla, bir çoxları öz maraqlarını güdürlər. Mənim kimi minlərlə erməni sülh müqaviləsinin imzalanmasını çox böyük səbirsizliklə gözləyir. Bu, biz bədbəxt erməniləri bəlkə də ağ günə çıxardar".
"İravnuk" qəzetinin "İnstaqram" səhifəsində Azərbaycan Prezidentindən sitat gətirilən "...Dırnaqarası "Avropa Sülh Fondu". Silah üçün nəzərdə tutulan fond, ona Sülh Fondu deyirlər, Ermənistan ondan istifadə edir, Fransadan pulsuz silah alır. Ermənistanı silahlandıranlar bilməlidirlər ki, bütün gələcək hadisələrə birbaşa onlar cavabdehlik daşıyacaqlar" başlığı daha çox diqqət çəkib. Rəy bildirənlərdən Boris Safaryanın fikirləri isə, əslində, həqiqəti göstərir: "Bizi İlham Əliyevə xidmətdə, onu sevməkdə günahlandırırlar. Heç bir erməni o Prezidenti sevmir və sevə də bilməz. Onun ölkəsi də, xalqı da düşməndir, özü də düşməndir. Amma axı ağıllı düşməndir. Bizim ağılsız keçmiş prezidentlərimiz və hazırkı baş nazirimiz kimi öz xalqını ac qoymur, müharibədə fərarilik etmir. Görün Azərbaycan hansı səviyyədədir. 28 il əvvəl az qala Bakıya çatırdıq. Amma indi görün nə gündəyik. Artıq İrəvanda da qorxaraq oturmuşuq. Ağıllı düşmən ağılsız baş nazirimizi və bədbəxt dövlətimizi məhv edir, budur reallıq. Fransa bizim hansı durumumuza gün ağlayır?"
Arşalyus Saakyan adlı "Feysbuk" istifadəçisi isə 2018-ci ildə Xankədidə çəkdirdiyi şəkli paylaşaraq vahimə dolu status paylaşıb: "Nə vaxta qədər belə davam edəcək? Azərbaycanlıların Qarabağa qayıdışı yuxularımızı qaçırdıb. Müharibədə Azərbaycana uduzduğumuzu görmüşdük, indi isə psixologiyamız pozulub. Belə qorxu ilə yaşamaq istəmirik".
Profilinə baxdıqda illər öncə Xankəndidə yaşadığı qeyd edilən Roza Marqaryan adlı "Feysbuk" istifadəçisi paylaşdığı statusda bildirib ki, xalqın yalançı Paşinyana artıq inamı tamamilə tükənib: "Fransaya inanmaq olmaz. Makronla tez-tez görüşəndən sonra Qarabağda bir erməni belə qalmadı. Hamımız qaçdıq".
Vazgen Tsarukyan adlı "Feysbuk" istifadəçisi isə paylaşımında daha bədbin şərh verib: "Dostlar, Paşinyan Ermənistanı satır, ayılın! Xəbəriniz varmı ki, İlham Əliyev yavaş-yavaş Sünikə, İrəvana doğru irəliləyir. Məni qınasanız da deyəcəm: Övladlarıma, mənə müharibə və "Artsax" (Qarabağ-red.) lazım deyil. Paşinyan da Sarkisyanın tayıdır. Çox qorxulu bir vəziyyətdir. Sülh istəyirik, sülh!"
Bütün bunlar əsl həqiqətlərin nədən ibarət olduğunun artıq erməni cəmiyyəti tərəfindən də dərk olunduğunu aydın nümayiş etdirir. İndi anlamağa başlayıblar ki, Ermənistanın acınacaqlı vəziyyətə düşməsinin əsas səbəbi 30 ilə yaxın davam edən işğalçılıq siyasəti və buna görə Azərbaycanın gördüyü tədbirlərdir.
Elçin CƏFƏROV,
"Azərbaycan"
