Birinci vitse-prezident Mehriban xanım Əliyeva tibb işçilərinin maddi rifahının yaxşılaşdırılması, sosial təminatının daha da gücləndirilməsi və əməyinin yüksək qiymətləndirilməsi ilə bağlı təşəbbüslə çıxış edib. Bu təşəbbüs, eyni zamanda, səhiyyə sektorunda insan kapitalının gücləndirilməsinə yönəlib. Ümumilikdə, Mehriban xanım Əliyevanın humanitar və sosial istiqamətlərdə irəli sürdüyü təşəbbüslər vətəndaşların sosial rifahının yaxşılaşdırılmasına və dövlət qayğısının artırılmasına xidmət edir.
Bu sözləri AZƏRTAC-a deputat Vüqar Bayramov deyib.
Deputat qeyd edib ki, Prezident İlham Əliyev də bu təşəbbüsü müsbət qarşılayaraq onun icrası ilə bağlı müvafiq tapşırıqlar verib. Məhz həmin tapşırığa uyğun olaraq tibb işçilərinin əməkhaqlarının artırılması həyata keçirilib. Bu addım səhiyyə sektorunun inkişafını bir neçə mühüm istiqamətdə stimullaşdıracaq. İlk növbədə, sosial təminatın gücləndirilməsi və əməkhaqlarının artırılması sektorda çalışanların peşəkar inkişafına və əmək fəaliyyətinə müsbət təsir göstərəcək. Digər tərəfdən, səhiyyə sistemində həyata keçirilən islahatlar dövlət büdcəsindən ayrılan vəsaitlərin strukturuna da təsir edib. İslahatlar nəticəsində vəsaitlərə qənaət olunması və humanitar, sosial təşəbbüslərin dəstəklənməsi üçün maliyyə bazasının formalaşdırılması təmin edilib. Beləliklə, bir tərəfdən islahatlar səhiyyə sektorunun institusional və kadr baxımından yenilənməsinə, digər tərəfdən isə əməkhaqqı artımları bu sahədə çalışanların sosial rifahının daha da yaxşılaşdırılmasına imkan yaradır.
“Digər mühüm məqam isə bu addımın xüsusilə bölgələrdə kadr çatışmazlığının, o cümlədən ixtisaslı kadr ehtiyacının qarşılanmasına təsiridir. Səhiyyə sektorunda regionlarda kadr çatışmazlığı əsas çağırışlardan biri kimi qiymətləndirilirdi. Əməkhaqlarının artırılması bölgələrdə ixtisaslı kadrların səhiyyə sektorunda çalışmasına əlavə imkanlar yaradacaq. Eyni zamanda, regionlarda çalışan tibb işçilərinin əməkhaqlarına 1,3 əmsalının tətbiqi onların daha yüksək əməkhaqqı almasına şərait yaradacaq.
Bu, həmçinin ölkə üzrə ümumi əməkhaqqı məbləğinə təsir göstərəcək addımdır. Hər hansı sektorda əməkhaqqı artımı baş verdikdə, ölkə üzrə ümumi əməkhaqqı məbləğində də müvafiq artım müşahidə olunur. Eyni zamanda, bu addım sosial təminatın gücləndirilməsi ilə bağlı dövlətimizin başçısının rəhbərliyi ilə həyata keçirilən siyasətin davamlı xarakter daşıdığını göstərir. Ölkədə mütəmadi olaraq sosial paketlərin təqdim olunması, eləcə də müxtəlif sektorlarda əməkhaqlarının artırılması istiqamətində tədbirlər həyata keçirilir”, - deyə V.Bayramov əlavə edib .
