“Rəqəmsal dövlət maliyyəsi” informasiya sisteminin yaradılması Azərbaycanda dövlət maliyyəsinin idarə edilməsində keyfiyyətcə yeni mərhələnin başlanğıcıdır.
Bu barədə AZƏRTAC-a açıqlamasında Rəqəmsal İnkişaf və Nəqliyyat Nazirliyinin İctimai Şurasının üzvü, İT üzrə mütəxəssis Fərid Kazımov bildirib.
Fərid Kazımov xatırladıb ki, Prezident İlham Əliyevin 2026-cı il 26 yanvar tarixli Fərmanı ilə “Rəqəmsal dövlət maliyyəsi” informasiya sisteminin (RDMİS) Əsasnaməsi təsdiq edilib və bu sistemə ölkədə uzun müddətdir ciddi tələbat vardı. Onun sözlərinə görə, sistemin məhz bu mərhələdə yaradılması onun tam müasir texnoloji trendlərə uyğun qurulmasına imkan verəcək: “2026–2027-ci illərdə formalaşdırılacaq bu sistem süni intellekt texnologiyalarının tətbiqini də nəzərdə tutur. Bu isə mövcud sistemlərdən fərqli olaraq, əlavə uyğunlaşdırma xərclərinə ehtiyac olmadan daha çevik və effektiv idarəetmə imkanı yaradacaq”.
Ekspert qeyd edib ki, RDMİS dövlətin xərclərini və gəlirlərini daha dəqiq proqnozlaşdırmağa şərait yaradacaq: “Bu gün müxtəlif tarif dəyişiklikləri və iqtisadi qərarlar ayrı-ayrı sektorlarla məhdudlaşmır, dolayı yolla digər sahələrə də təsir edir. Yeni sistem bu qarşılıqlı təsirləri real vaxt rejimində analiz etməyə və qərarların nəticələrini əvvəlcədən görməyə imkan verəcək”.
O qeyd edib ki, sistem vasitəsilə dövlət qurumlarının bütün xərcləri və gəlirləri vahid platformada şəffaf şəkildə izləniləcək, mümkün risklər, kənarlaşmalar və plan dəyişiklikləri operativ müəyyən ediləcək.
Fərid Kazımov əlavə edib ki, süni intellekt alətlərinin tətbiqi dövlət maliyyəsinin idarə edilməsində analitikanı yeni səviyyəyə yüksəldəcək: “Bu texnologiyalar vasitəsilə müxtəlif ssenarilər üzrə, məsələn 2026–2030-cu illər üçün xərclərin və gəlirlərin iqtisadiyyata təsiri əvvəlcədən modelləşdirilə biləcək. Bu da daha əsaslandırılmış və strateji qərarların qəbuluna xidmət edəcək”.
Mütəxəssis vurğulayıb ki, “Rəqəmsal dövlət maliyyəsi” sistemi Azərbaycanın dövlət maliyyəsinin idarə edilməsində vaxtında atılmış addımdır və ölkənin iqtisadi dayanıqlığının gücləndirilməsinə əhəmiyyətli töhfə verəcək.
jpg_1775197912.jpg)
jpg_1775165689.jpg)
