"Beynəlxalq "Astana" forumu ənənəvi olaraq Mərkəzi Asiyada müasir gündəmin əsas məsələləri üzrə məzmunlu dialoq üçün aparıcı beynəlxalq platformalardan biridir. Bu forum siyasi, iqtisadi, sosial və mədəni sahələrdə regional və qlobal mövzuların müzakirəsi üçün mühüm bir məkandır. Azərbaycan bu forumun təqdim etdiyi imkanlardan qlobal transformasiyalar fonunda beynəlxalq arenada öz ideya və mövqelərini çatdırmaq üçün fəal şəkildə istifadə edir".
Bunu AZƏRTAC-a forum zamanı STEM Analitik Mərkəzinin direktoru Orxan Yolçuyev söyləyib.
Onun sözlərinə görə, hazırkı mərhələ dünyada yüksək qeyri-müəyyənliklə xarakterizə olunur.
"Bu gün biz artıq aktuallığını itirmiş köhnə dünya nizamından hələ tam formalaşmamış yeni nizama keçidin şahidiyik. Bu boşluq sabitliyi pozur və münaqişələrə yol açır. Qlobal turbulentlik şəraitində dərin proseslərin təhlilinə və dərk olunmasına şərait yaradan forumlar xüsusi əhəmiyyət kəsb edir. Belə tədbirlər siyasi liderlər, ekspertlər və ictimai rəy liderləri arasında qarşılıqlı əlaqə üçün bir platforma yaradır və potensial münaqişələrin qarşısının alınmasına xidmət edir", - deyə həmsöhbətimiz bildirib.
Azərbaycanın iştirakına gəlincə, Yolçuyev qeyd edib ki, ölkəmiz forumda geniş nümayəndə heyəti ilə təmsil olunub. Bu da fəal dialoqa sadiqliyin göstəricisidir.
STEM mərkəzinin direktoru Azərbaycan-Qazaxıstan münasibətlərinin inkişafına ayrıca diqqət ayıraraq bildirib ki, iki ölkə arasında əməkdaşlıq bütün səviyyələrdə sürətlə inkişaf edir. Bu kontekstdə o, ölkə liderləri arasında formalaşmış xüsusi münasibətlərin rolunu vurğulayaraq qeyd edib ki, məhz şəxsi etimada əsaslanan əlaqələr Azərbaycan-Qazaxıstan əməkdaşlığının bütün kompleksinə xüsusi dinamika və davamlılıq qazandırır.
Ekspert Cənubi Qafqazla Mərkəzi Asiya ölkələrini birləşdirən Orta dəhlizin strateji logistika arteriyası kimi roluna diqqət çəkib.
"Orta dəhliz birgə planların həyata keçirilməsində xüsusi rol oynayır. O, yalnız iqtisadiyyatları deyil, cəmiyyətləri də birləşdirir, sosial, siyasi və mədəni sahələrdə qarşılıqlı fəaliyyətin genişlənməsinə töhfə verir", - deyə analitik bildirib.
Onun sözlərinə görə, hər iki ölkənin logistika infrastrukturu paralel və bir-birini tamamlayan şəkildə inkişaf edir.
"Azərbaycanın Ələt limanının inkişafı Qazaxıstanda Aktau və Kurık limanlarının tikintisini stimullaşdırdı və əksinə. Ələt olmasaydı, Xəzərin şərq sahilində yeni imkanlara ehtiyac da olmazdı. Bu isə regional inteqrasiyanın sistemli xarakter daşıdığını sübut edir", - deyə Yolçuyev qeyd edib.
O həmçinin humanitar və təhsil sahələrində əməkdaşlığın xüsusi əhəmiyyət daşıdığını və bu istiqamətdə qarşılıqlı əlaqələrin yaxın gələcəkdə daha da güclənəcəyini vurğulayıb.
"Bu gün Azərbaycanın Qazaxıstandakı və Qazaxıstanın Azərbaycandakı səfirliklərinin fəal dəstəyi ilə qarşılıqlı fəaliyyətin yeni istiqamətləri formalaşır. Səfirliklər ikitərəfli gündəliyin inkişafına və yüksəksəviyyəli münasibətlərin qorunub saxlanmasına mühüm töhfə verir", - deyə ekspert yekunlaşdırıb.
