"Caspian Agro" və "InterFood Azerbaijan" sərgilərində 30-dan çox ölkədən 450-dək şirkət iştirak edir
"Bakı-Ekspo" Mərkəzi bu dəfə qapılarını 18-ci Azərbaycan Beynəlxalq Kənd Təsərrüfatı "Caspian Agro"sərgisinin üzünə açıb. Bu, aqrar sahədə Xəzər regionunun ən böyük sərgisidir. Bununla yanaşı, "Bakı-Ekspo" Mərkəzində 30-cu Yubiley Azərbaycan Beynəlxalq Qida Sənayesi "InterFood Azerbaijan" sərgisi də keçirilir. Sərgilər buradakı bütün pavilyonları və açıq sahəni əhatə edib.
Bu sərgilərin coğrafiyası ildən-ilə genişlənir. İndi burada Azərbaycanla yanaşı, Almaniya, ABŞ, Belarus, Belçika, BƏƏ, Çin, Cənubi Koreya, Fələstin, Finlandiya, Gürcüstan, Hindistan, İordaniya, İran, İspaniya, İsrail, İsveç, İtaliya və digər ölkələr təmsil olunurlar. Bu il sərgilərdə Almaniya, Belarus, Cənubi Koreya, Gürcüstan, İtaliya, Niderland, Şri-Lanka, eləcə də ilk dəfə olaraq Misir milli qruplar şəklində iştirak edirlər.
"Caspian Agro" kənd təsərrüfatı texnikası, obyektləri və avadanlıqları, suvarma sistemi, qablaşdırma, kənd təsərrüfatında innovasiya texnologiyaları, heyvandarlıq və quşçuluq, baytarlıq, bitkiçilik, meyvə və tərəvəzlərin yetişdirilməsi, gülçülük, tullantıların emalı, logistika, elektron kənd təsərrüfatı kimi sahələri əhatə edir. Bu tədbir yenidən kənd təsərrüfatı sənayesinin aparıcı iştirakçılarını, yerli və xarici ekspertləri, o cümlədən idxalçılar, ixracatçılar, kənd təsərrüfatı məhsullarının distribütorları, topdan və pərakəndə ticarət nümayəndələri, həmçinin fermerlər də daxil olmaqla minlərlə peşəkar auditoriyasını bir araya toplayıb. Sərgidə "Smart Agro" istiqaməti üzrə süni intellekt, "ağıllı kənd", startaplar, İT xidmətləri, robototexnika, pilotsuz uçuş aparatları və "green agro" bölmələri də var. Bir sözlə, "Caspian Agro"da fermerlər, sahibkarlar, investorlar və mütəxəssislər kənd təsərrüfatı və qida sənayesinin aktual məsələləri barədə fikir mübadiləsi aparmaq, biznes əlaqələri qurmaq və müasir innovasiyalarla tanış olmaq imkanı qazanıblar.
"InterFood Azerbaijan" və "Caspian Agro" sərgilərində 30-dan çox ölkədən 450-dək şirkət iştirak edir. Xatırladaq ki, bu il "InterFood Azerbaijan" sərgisinin 30 illik yubileyi qeyd olunur. Ötən dövr ərzində bu sərgi 50-dək ölkədən 3000-dən çox şirkət və 150 mindən çox ziyarətçini qəbul edib. Onun təqdim etdiyi yeni texnologiyalar və innovativ həllər qida sənayesi sahəsinin inkişafına və biznes əlaqələrinin genişləndirilməsinə böyük dəstək verib. Bununla da həmin tədbir səmərəli biznes platforması kimi tanınıb.
"InterFood Azerbaijan"da qida sənayesi, içkilər, şirniyyat, süd məhsulları, qənnadı və un məmulatları, meyvə-tərəvəz, qablaşdırma, qida texnologiyaları nümayiş etdirilir. Burada həmçinin halal qida və digər bölmələr üzrə məhsul və xidmətlər təqdim olunur.
Hər iki sərgi "Made in Azerbaijan" brendinin təşviqi üçün geniş bir məkandır. İştirakçılar bu brend altında məhsullarını nümayiş etdirirlər. Bu, qlobal kənd təsərrüfatı və qida sənayesində yerli istehsalın inkişafının və rəqabət qabiliyyətinin parlaq nümunəsidir.
Dünən 18-ci Azərbaycan Beynəlxalq Kənd Təsərrüfatı "Caspian Agro" və 30-cu Yubiley Azərbaycan Beynəlxalq Qida Sənayesi "InterFood Azerbaijan" sərgilərinin açılışındakı çıxışında kənd təsərrüfatı nazirinin müavini Elçin Zeynalov bu tədbirlər barədə belə deyib: "Fermerlərimizin müasir kənd təsərrüfatı texnikası, dəqiq əkinçilik sistemləri, rəqəmsal idarəetmə vasitələri və ekoloji təmiz istehsal texnologiyaları ilə tanış olması üçün imkanlar yaradılıb. Bu il sərgidə süni intellektin tətbiqinə əsaslanan yeni həllər, "ağıllı idarəetmə sistemi"nə əsaslanan avtomatlaşdırılmış texnologiyalar, enerji və resursqoruyucu texnologiyalar, alternativ enerji mənbələrindən istifadə edən avadanlıqlar, iqlim dəyişikliyinə davamlı kənd təsərrüfatı məhsulları və dayanıqlı təsərrüfatçılıq həlləri xüsusi vurğulanır. İqlim dəyişikliklərinin təsirlərini azaltmaq, torpaq və su ehtiyatlarından səmərəli istifadəni genişləndirmək və kənd təsərrüfatını daha ekoloji və səmərəli hala gətirmək üçün biz innovativ yanaşmalar tətbiq edirik. Daha çox rəqəmsal həllərin tətbiqi, elektron kənd təsərrüfatı platformalarının genişləndirilməsi, aqrar sahədə çalışan sahibkarlar üçün maliyyə və sığorta alətlərinin əlçatanlığının artırılması da bu sahədə əsas hədəflərdəndir. Ölkəmizdə yeni bitki sortlarının və heyvandarlıqda məhsuldar cinslərin tətbiqi, müasir texnologiyalar əsasında təsərrüfat modellərinin formalaşdırılması və istehsal proseslərinin avtomatlaşdırılmasının aqrar sektorun inkişafına müsbət təsir göstərəcəyinə inanırıq".
Deyilənlərə onu da əlavə edək ki, tədbirlər Kənd Təsərrüfatı Nazirliyinin təşkilati dəstəyi ilə keçirilir. Həmçinin Qida Təhlükəsizliyi Agentliyi (AQTA), Kiçik və Orta Biznesin İnkişafı Agentliyi (KOBİA), Azərbaycan Respublikasının İxracın və İnvestisiyaların Təşviqi Agentliyi (AZPROMO), Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK), Azərbaycan Qida və İçki Sənayeçiləri Assosiasiyası (AQİSA), BMT-nin Ərzaq və Kənd Təsərrüfatı Təşkilatı (FAO) və Azərbaycan Sərgi Təşkilatçıları Assosiasiyası (ASTA) "Caspian Agro" və "InterFood Azerbaijan" sərgilərini fəal şəkildə dəstəkləyirlər.
Flora SADIQLI,
"Azərbaycan"
jpeg_1766151155.jpeg)
