16 Noyabr 2023 10:10
657
SİYASƏT
A- A+

Dövlətin qayğısı şəhid ailələrində və qazilərdə böyük məmnunluq doğurur

 

"Mən çox şadam ki, son illər ərzində Azərbaycanda vətənpərvər, güclü, milli ruhda tərbiyə almış gənc nəsil yetişib… Bu illər ərzində yetişən insanlar bu torpaqları azad etdilər. Bütün nəsillərdən olan vətəndaşlarımızın bu qələbədə böyük zəhməti var, payı var. Ancaq onu da bildirməliyəm ki, əsas yükü, əsas vəzifəni gənc nəsil yerinə yetirdi". 
Tarixi qələbəmizdən sonra Qarabağa ilk səfəri zamanı Azərbaycan Prezidenti İlham Əliyev gənclərimizin Vətən müharibəsindəki qəhrəmanlıqlarını yüksək dəyərləndirərək bu sözləri demişdir. 
Vətən müharibəsi Azərbaycan gəncliyini dünyaya tanıtdı. Dövlət müstəqilliyimizin həyatımıza bəxş etdiyi ən böyük nailiyyətlərdən biri də onların milli ruhda tərbiyəsi, hərtərəfli inkişafı üçün yaranmış mühitdir. Bu gün gənc nəsil cəmiyyət həyatının bütün sahələrində mühüm rol oynayır. Eyni zamanda ulularımızdan bizə miras qalmış milli-mənəvi dəyərlərimizə hörmət ruhu da uğurla davam etdirilir. Dövlət rəhbərimizin də çıxışlarında bəyan etdiyi kimi, nəsillərarası münasibət, qırılmaz bağlılıq Azərbaycanı öz hədəflərinə daha da yaxınlaşdırmışdır. Vətən müharibəsindəki qələbəmiz bunun tarixi sübutudur. 
Azərbaycanda şəhid ailələrinə, qazilərə, əlillərə həm dövlətin, həm də cəmiyyətin xüsusi diqqət və qayğısı hər addımda hiss olunur. Təbiidir ki, bu belə də olmalıdır. Çünki erməni işğalçıları üzərində tarixi qələbə unudulmaz şəhidlərimizin, qazilərimizin qanı, canı və qəhrəmanlığı sayəsində qazanıldı. Azərbaycan Ordusunun sıralarında xidmət edən zabit və əsgərlərimiz 44 gün davam edən Vətən müharibəsində böyük igidlik, hünər göstərdilər. Buna görə də hamımız torpaqlarımızın azad olunmasının sevincini bizə yaşadan şəhidlərimizə və qazilərimizə borcluyuq.
Azərbaycan Prezidenti, Ali Baş Komandan İlham Əliyevin və Birinci vitse-prezident Mehriban xanım Əliyevanın müvafiq göstərişlərinə əsasən dövlət qurumları bu kateqoriyadan olan insanların problemləri ilə yaxından maraqlanır, onların ehtiyaclarının ödənilməsi üçün müvafiq tədbirlər həyata keçirirlər. Prezident İlham Əliyevin tapşırığına əsasən, aidiyyəti qurumlar tərəfindən İkinci Qarabağ müharibəsində şəhid olmuş qəhrəmanlarımızın ailə üzvlərinə və qazilərə qayğı  daim artırılır. Dövlət başçısının "Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin və şəhid ailələrinin sosial-məişət şəraitinin yaxşılaşdırılması ilə bağlı bir sıra tədbirlər haqqında" sərəncamı ilə həyata keçirilən tədbirlər şəhid ailələrində və qazilərdə böyük məmnunluq doğurur. 
Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev çıxışlarında gənclərin cəmiyyətdəki rolundan, onların Vətən müharibəsində göstərdiyi qəhrəmanlıqdan danışır. Dövlət başçısı 8 Noyabr  Zəfər Günündə Xankəndidə keçirilən hərbi paraddakı çıxışı zamanı da şəhidlərə göstərilən böyük ehtiramı xüsusi olaraq vurğuladı: "Əlbəttə ki, ordu quruculuğu birinci nömrəli vəzifə idi. Maddi-texniki təchizat, silah-sursatla təchizat, ordumuzun döyüş qabiliyyətinin qaldırılması və ilk növbədə, gənclərimizin vətənpərvərlik ruhunda tərbiyə edilməsi - budur, qələbəyə aparan əsas amillər. Nə qədər sənin silahın, sursatın olsa belə, nə qədər müasir hərbi texnologiyalardan istifadə etsən belə, qələbəni əldə edən əlində silah əsgərdir, zabitdir. O, sinəsini qabağa verir, o, ölümə getməyə hazırdır və biz bunu göstərmişik. Ən çətin, əlverişsiz coğrafi vəziyyətdə altı müdafiə zolağını yararaq, döşənmiş bir milyondan artıq minanın üzərindən keçərək, təpələrdə yerləşmiş düşmən mövqelərini məhv edərək, Azərbaycan əsgər və zabiti əsl qəhrəmanlıq və şücaət göstərmişdir. Əziz şəhidlərimizin xatirəsi bizim qəlbimizdə əbədi yaşayacaq və biz bütün dünyaya Azərbaycan xalqının gücünü, iradəsini, əyilməz ruhunu göstərmişdik".
Azərbaycan dövlətinin vətəndaşlarına göstərdiyi diqqət və qayğı cəmiyyətimiz tərəfindən razılıqla qarşılanır. Dövlət başçısının müvafiq sərəncamı ilə 2021-2025-ci illər ərzində şəhid ailələri, müharibə əlilləri və digər həssas qrupa aid olan insanların mənzillə tam təminatının həyata keçirilməsi üçün dövlət proqramı təsdiqlənib. Bu proqrama uyğun olaraq müvafiq işlər aparılır, çox mühüm addımlar atılır. 
Şəhid ailələrinə, müharibə əlillərinə, qazilərə diqqət və qayğı Ümummilli Liderimiz Heydər Əliyevin xalqın təkidli tələbi ilə yenidən ölkə rəhbərliyinə qayıtması ilə başlayıb. Həmin vaxtdan prioritet istiqamətə çevrilən bu xətt dövlətimizin başçısı İlham Əliyevin prezidentlik fəaliyyətinin bütün dövrlərində daim diqqət mərkəzində saxlanılır. Şəhid ailələrinin, müharibə əlillərinin və qazilərin sosial müdafiəsi dövlətimizin başçısının həyata keçirdiyi daxili siyasət kursunun əsas istiqamət meyarıdır.  Bu kateqoriyadan olan insanlara həm dövlət, həm də ictimaiyyət tərəfindən xüsusi qayğı və diqqət göstərilir.  Ali Baş Komandan İlham Əliyev Azərbaycan Respublikası Konstitusiyasının 109-cu maddəsinin 23-cü bəndini rəhbər tutaraq torpaqlarımızın işğaldan azad olunması uğrunda aparılmış döyüş əməliyyatlarında iştirak edərək şəxsi igidlik və şücaət göstərərək şəhid olan Azərbaycan Respublikası Silahlı Qüvvələrinin hərbi qulluqçularını fəxri adlarla təltif etmişdir. 
Vətənə böyük zəfər qazandırmış Azərbaycan gəncliyi bundan sonra da ölkəmizin möhtəşəm nailiyyətləri ilə tariximizin yeni şanlı səhifələrini yaradacaq.

Vahid MƏHƏRRƏMOV

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video