ABŞ Prezidenti Donald Tramp Rusiyanın NATO ölkələrinə hücumundan rahatsız olmadığını bildirib. Bu onun müttəfiqlərin Mərkəzi Kəşfiyyat İdarəsinin direktoru Con Retkliffin Moskvaya gizli səfəri ilə bağlı nigarançılığına cavabı olub.
Alyans hesab edir ki, Retkliff Kremli NATO ölkələrinə qarşı təxribatlar barədə xəbərdar etmək üçün təcavüzkar ölkəyə səfər edib. Bu barədə "Axios" nəşri jurnalistlərlə Donald Tramp arasında telefon danışığından sonra məlumat verib. Amerika Prezidenti Retkliffin səfər zamanı Moskvaya xəbərdarlıq etdiyini təkzib edib.
D.Trampın sözlərinə görə, Rusiya Şimali Atlantika Alyansının ərazisinə hücum etməyəcək: "Putinin NATO ərazisinə hücum etmək niyyəti yoxdur".
D.Trampın mövqeyi ABŞ-nin Avropa müttəfiqləri arasında artan rahatsızlıq fonunda ortaya çıxıb. Avropa liderləri açıq şəkildə xəbərdarlıq ediblər ki, Moskva NATO-nun üzvlərini müdafiə etməyə hazırlığını, xüsusən də məhdud hücum və ya digər hərbi təxribatlar vasitəsilə sınamağa cəhd edə bilər.
ABŞ Prezidentinin dediyinə görə, MKİ direktoru Rusiya Xarici Kəşfiyyat Xidmətinin direktoru Sergey Narışkin ilə görüşüb. O, MKİ direktorunun səfərini "adi iş" adlandırıb və burada qeyri-adi bir şey görmədiyini bildirib: "Retkliff rusiyalı həmkarı ilə hər altı aydan bir və ya ildə bir dəfə görüşür. Onların çox yaxşı münasibətləri var. Görüş zamanı heç bir xəbərdarlıq olmayıb və qeyri-adi bir şey baş verməyib". Bununla D.Tramp ABŞ-nin Retkliffin səfərindən Rusiyanı NATO ölkələrinə qarşı potensial hərəkətlərdən çəkindirmək üçün istifadə edə biləcəyi barədə məlumatları faktiki olaraq təkzib edib.
Rusiya öz növbəsində ABŞ liderini dəstəkləyib və hadisələrlə bağlı onun versiyasını təsdiqləyib. Sergey Narışkinin sözlərinə görə, danışıqlar "işlərinin adi bir hissəsi" idi və görüş zamanı "qeyri-adi heç bir şey" baş verməyib. S.Narışkin həmçinin tərəflərin "kəşfiyyat məsələlərini" müzakirə etdiyini bildirib. O, danışıqların digər detallarını açıqlamayıb.
Rizvan CƏFƏROV,
"Azərbaycan"
