Qarabağ və Şərqi Zəngəzura köçürülən sakinlərin məşğulluğunu təmin etmək üçün ƏƏSMN tərəfindən ardıcıl tədbirlər görülür
"İşğaldan azad olunmuş ərazilərimizə köçürülən sakinlər üçün aktiv məşğulluq proqramları daim genişlənir. Doğma yurd yerlərinə qayıdan sakinlərin dayanıqlı məşğulluğunun təmin olunmasına xidmət edən bu proqramların icrasında işəgötürənlərlə sıx əməkdaşlıq həyata keçirilir".
Bunu əmək və əhalinin sosial müdafiəsi nazirinin müavini Vüsal Nəsirli nazirlikdə işğaldan azad olunmuş ərazilərdə fəaliyyət göstərən bir qrup işəgötürənlə keçirilən görüşdə bildirib. Nazir müavini həmçinin Qarabağ və Şərqi Zəngəzurda sakinlərin işlə təminatı ilə yanaşı, onların əmək bazarının tələblərinə uyğun peşələr üzrə hazırlıq kurslarına cəlb edilməsi, özünüməşğulluq proqramı üzrə kiçik təsərrüfatlarının qurulması işlərinin aparıldığını qeyd edib.
Görüşdə Qaçqınların və Məcburi Köçkünlərin İşləri üzrə Dövlət Komitəsi, İqtisadi İslahatların Təhlili və Kommunikasiya Mərkəzi, Azərbaycan Dövlət Su Ehtiyatları Agentliyi, "Azərbaycan Hava Yolları" QSC, "Təmiz Şəhər" ASC, "Azərişıq" ASC, "Azərenerji" ASC, SOCAR, Şuşa Şəhəri Dövlət Qoruğu İdarəsi, Ağdam, Füzuli və Xocavənd, Cəbrayıl, Qubadlı və Zəngilan rayonlarında, Laçın rayonunda, Xankəndi şəhərində, Ağdərə və Xocalı rayonlarında, eləcə də Kəlbəcər rayonunda Bərpa, Tikinti və İdarəetmə xidmətlərinin nümayəndələri iştirak ediblər.
Görüşdə işğaldan azad olunan bölgələrdə sakinlərin məşğulluqlarının təmin olması sahəsində işəgötürənlərlə birgə görülmüş işlər və bu sahədə qarşıda duran vəzifələr müzakirə olunub. Bildirilib ki, bu istiqamətdə görülən işlərin sayəsində Xocalı şəhəri və Xocalının Ballıca kəndinə köçürülmüş sakinlərdən artıq 351 şəxs məşğulluq tədbirlərinə cəlb edilib. Onlardan 333 şəxsin rayon ərazisində məşğulluğu təmin edilib (o cümlədən rayona köçürülmüş sakinlərdən 71 nəfər üçün özünüməşğulluq proqramı üzrə kiçik təsərrüfatlar yaradılıb), 18 sakin isə peşə kurslarına cəlb olunub.
Bununla yanaşı, daha bir qrup sakinin məşğulluğuna dəstək verilməsi üçün müəyyən işlər aparılır. Onların məşğulluq imkanları qiymətləndirilir və hansı məşğulluq proqramına cəlb olunacaqları müəyyənləşdirilir.
Nazirlikdə işğaldan azad olunmuş ərazilərdə fəaliyyət göstərən işəgötürənlərlə növbəti görüşdə isə Rəqəmsal İnkişaf və Nəqliyyat, Ekologiya və Təbii Sərvətlər, Kənd Təsərrüfatı, Müdafiə nazirlikləri, Dövlət Sərhəd Xidməti, Qaçqınların və Məcburi Köçkünlərin İşləri üzrə Dövlət Komitəsi, Məcburi Köçkünlərin Sosial İnkişaf Fondu, İqtisadi İslahatların Təhlili və Kommunikasiya Mərkəzi, Tibbi Ərazi Bölmələrini İdarəetmə Birliyi, Minatəmizləmə, Mənzil İnşaatı Dövlət, Azərbaycan Avtomobil Yolları Dövlət, İqtisadi Zonaların İnkişafı agentlikləri, "Polat Yol Yapı Sanayi ve Ticaret Anonim Şirketin"in ölkəmizdəki filialı və "Körpü-Bina-Tikinti" MMC-nin nümayəndələri iştirak ediblər.
Nazir müavini Vüsal Nəsirli Böyük qayıdışa dair dövlət proqramının icrası sayəsində görülən işlərin mühüm bir istiqamətinin işğaldan azad olunmuş ərazilərə köçürülən sakinlərin məşğulluğunun təmin edilməsi olduğunu deyib. Bu məqsədlə aktiv məşğulluq proqramlarının icrasında işəgötürənlərlə sıx əməkdaşlığın mühüm rolu tədbir iştirakçılarının nəzərinə çatdırılıb.
Görüşdə işğaldan azad edilən bölgələrimizdə məskunlaşan və məskunlaşması nəzərdə tutulan vətəndaşların məşğulluqlarının təmin olması sahəsində görülmüş işlər barədə görüş iştirakçılarına ətraflı məlumat verilib, bu istiqamətdə görülən tədbirlərin daha da gücləndirilməsi və səmərəliliyinin artırılması məsələləri nəzərdən keçirilib.
Rüstəm KAMAL,
"Azərbaycan"
