Azərbaycan "Heydər Əliyev İli"nə bütün sahələrdə uğurlu göstəricilərlə qədəm qoyur

Geridə qoyduğumuz 2022-ci il Azərbaycanın ictimai-siyasi həyatında davamlı quruculuq ili kimi yadda qaldı. 30 ildən sonra düşmən tapdağından azad edilən Qarabağ və Şərqi Zəngəzurda misli görünməyən tikinti-quruculuq işləri Böyük qayıdış planının icrasını reallaşdırdı. Zəngilanın Ağalı kəndinin sakinlərinin həsrətli günləri vüsala yetişdi. 
Bununa yanaşı, ölkə iqtisadiyyatı dayanıqlı inkişafını təmin etdi və dövlətin gələn il üçün büdcəsi tariximizin ən böyük maliyyə sənədi kimi qəbul olundu. Sənədin qəbulu ilə bir daha bəlli oldu ki, 2023-cü ilin dövlət büdcəsi qarşıya qoyulan vəzifələrin yerinə yetirilməsi üçün etibarlı maliyyə təminatı yaradacaq.
Həmçinin ölkə iqtisadiyyatına yerli və xarici sərmayələr yatırıldı. Bu da Azərbaycanın iş adamları, sahibkarlar üçün əsl investisiya məkanı olduğunu bir daha təsdiqlədi. 

Bütün işlər baş plan əsasında gedir

Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə xalqa müraciətində bu məsələlərə bir daha toxunaraq vurğuladı ki, ötən il Qarabağ və Şərqi Zəngəzurda həyat artıq bərpa edilib. Birinci layihə icra edilmiş və zəngilanlılar öz doğma torpağına qayıtmışlar. İlham Əliyev bu prosesi tarixi hadisə adlandırıb: "...Çünki müharibədən iki il keçmədən - cəmi il yarımdan sonra biz artıq birinci keçmiş köçkünləri öz doğma torpaqlarına qaytarmışıq, onlar üçün gözəl şərait yaratmışıq. Bu, bir daha onu göstərir ki, dövlətimiz güclüdür və iradəmiz yerindədir. Eyni zamanda bu, xalqımızın böyüklüyünü göstərir. Onu göstərir ki, bizim vətəndaşlarımız öz dədə-baba torpaqlarına bağlıdır, necə deyərlər, torpaq çəkir. 
Hətta heç vaxt o yerləri görməyən gənclər, uşaqlar, məktəblilər böyük həvəslə Ağalıya qayıdıblar və bu bir daha xalqımızın böyüklüyünü göstərir. Onu göstərir ki, məcburi köçkünlər qayıdış gününü səbirsizliklə gözləyirlər".
Dövlət başçısı Qarabağ və Şərqi Zəngəzurda görülən işlərin ardıcıllığı, miqyası barədə də məlumat verərək dedi ki,  neçə şəhərdə artıq inşaat işləri geniş vüsət alıb. İlk növbədə Şuşa, eyni zamanda Ağdam, Füzuli, Zəngilan, Laçın şəhərlərində geniş quruculuq işləri gedir, xəstəxanalar, məktəblər, yaşayış binaları inşa edilir. Bununla bərabər, 10-dan çox kəndin baş planı təsdiqlənib və bir neçə kəndin təməli şəxsən Prezident tərəfindən qoyulub. 
Bütün işlər baş plan əsasında gedir və qısa zamanda Qarabağla Şərqi Zəngəzur cənnətməkana çevriləcək, yüz minlərlə keçmiş köçkün öz doğma torpağına qayıdacaq.

İqtisadi müstəqilliyini təmin edən ölkə

Ötən illər istər regionda, istərsə də qlobal iqtisadiyyatda baş verən proseslərə baxmayaraq, ölkədə həyata keçirilən heç bir sosial layihə dayandırılmadı. Azərbaycanın təşəbbüsü, iştirakçısı olduğu beynəlxalq əhəmiyyətli layihələrin gerçəkləşməsi istiqamətində atılan addımlar ölkəmizin nüfuzunun daha da yüksəlməsinə səbəb oldu.
Ümumiyyətlə, İlham Əliyev ölkəyə rəhbərlik etdiyi dövr ərzində bütün sahələr öz inkişafını tapıb. Görülmüş genişmiqyaslı işlər, sistemli və ardıcıl tədbirlər, dərin islahatlar nəticəsində hazırda Azərbaycan siyasi və makroiqtisadi baxımdan sabit, təhlükəsiz ölkə, regionun siyasi, iqtisadi və mədəni mərkəzi, irimiqyaslı enerji, nəqliyyat və infrastruktur layihələrinin təşəbbüskarı və fəal iştirakçısı, Avropanın enerji təhlükəsizliyinin təmin edilməsində etibarlı tərəfdaş, dünya kosmos ailəsinin üzvü, mühüm tranzit qovşağıdır.
Əlbəttə ki, bütün bu nailiyyətlərə çatmağı şərtləndirən əsas amil güclü iqtisadiyyatın olmasıdır. Azərbaycan artıq iqtisadi müstəqilliyini çoxdan təmin edib. Bu gün Azərbaycan dünya miqyasında nadir ölkələrdəndir ki, heç kimdən iqtisadi və siyasi cəhətdən asılı deyil. Əgər bu ilin iqtisadi göstəricilərinə nəzər salsaq, görərik ki, postpandemiya dövrü üçün nəticələr qənaətbəxşdir: 
* İqtisadiyyat təxminən 5 faiz artıb;
* qeyri-neft sektoru 9 faizdən çox yüksəlib;
* Ümumi daxili məhsul bu il rekord həddə - 130 milyard manata çatıb. 
Prezidentin də söylədiyi kimi, bu, tarixi nailiyyətdir. Bununla paralel olaraq ölkənin xarici dövlət borcu da xeyli azalıb. Bu vəzifəni bir neçə il bundan qabaq dövlət başçısı hökumət qarşısında qaldırmışdı. Tələb isə xarici borcumuzun ümumi daxili məhsulumuzun 10 faizinin altında olması idi. Keçən il 17 faiz idi, bu ilin son nəticələrinə görə 9,5 faizdir. Müqayisə üçün deyə bilərik ki, bəzi inkişaf etmiş ölkələrdə xarici borc ümumi daxili məhsulun 100, 120, hətta 150 faizini təşkil edir. Yəni Azərbycan tamamilə beynəlxalq maliyyə institutlarından asılı deyil. Ölkəmiz Qarabağ və Şərqi Zəngəzurda reallaşdırdığı layihələri öz iqtisadi qüdrəti hesabına həyata keçirir, özü də heç bir donor, maliyyə təşkilatından maliyyə yardımı almadan. 
Əlbəttə ki, baş verən bu reallıqlar birmənalı şəkildə onu deməyə əsas veriri ki, son 19 ildə yürütdüyü siyasətlə Azərbaycanı tarixinin ən qüdrətli dövlətinə çevirən İlham Əliyev ölkəmizi daha möhtəşəm qələbələrə, zəfərlərə doğru aparır. Azərbaycanın artan maliyyə imkanları, iqtisadiyyatda baş verən keyfiyyət dəyişiklikləri özünü göstərir. Eyni zamanda gələn ilin dövlət büdcəsinin göstəriciləri təsdiq edir ki, büdcə gələn ildə də Azərbaycanın öz milli, iqtisadi və sosial hədəflərinə çatması üçün etibarlı maliyyə təminatı yaradacaq.

Rəşad BAXŞƏLİYEV,
"Azərbaycan"