Azərbaycan dünyanın ən mötəbər və irimiqyaslı beynəlxalq tədbirlərindən biri olan BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına - COP29-a evsahibliyi edir. Tədbirin məhz ölkəmizdə keçirilməsi Azərbaycanın beynəlxalq arenada artan nüfuzunun bariz nümunəsidir.
Belə kütləvi tədbirlər zamanı ölkəyə on minlərlə xarici qonaq və turist gəlir. Təbii ki, belə tədbirlər zamanı insanların sağlamlığının mühafizəsi və tibbi xidmətlərin təşkili də diqqət mərkəzində olur. COP29-la əlaqədar TƏBİB tərəfindən zəruri tibbi xidmətlər təşkil edilib. Qurumun tabeliyində fəaliyyət göstərən tibb müəssisələrinin hər birinə baxış keçirilib və müəssisələr zəruri tibbi xidməti təmin edə bilmək üçün hazır vəziyyətə gətirilib.
Bir müddət əvvəl TƏBİB-in icraçı direktoru Vüqar Qurbanov bununla bağlı brifinqdə bildirmişdi ki, Yeni Klinikanın Təcili və təxirəsalınmaz tibbi yardım, uşaq təcili tibbi yardım, stasionar, reanimasiya şöbələri və əməliyyatxanası tibbi xidmətə zərurət ehtimalını nəzərə alaraq tədbir üçün ayrılıb. Yoluxucu xəstəliklər üçün Sabunçu Tibb Mərkəzinin nəzdində fəaliyyət göstərən Məhəmmədi modul tipli xəstəxanada 4-ü reanimasion olmaqla, ümumilikdə 14 çarpayı, böhran vəziyyətləri üçün 100-ü reanimasion çarpayı olmaqla, ümumilikdə 370 çarpayı ayrılıb. Mərkəzi Neftçilər Xəstəxanasında bütün zəruri tibbi avadanlıqlarla təchiz olunmuş Yanıq şöbəsi yaradılıb. Zəhərlənmə ehtimalları üzrə Kliniki Tibbi Mərkəzin Toksikologiya şöbəsində müvafiq tibbi xidmətin göstərilməsi üçün yerlər ayrılıb.
Bunlarla yanaşı, COP29-un bütün ziyarətçiləri tədbir məkanında ilk və təcili tibbi yardım xidmətlərindən yararlana bilərlər. "mavi zona"da yerləşən ilk tibbi yardım otaqları səhər saat 08:00-dan axşam saat 22:00-a kimi fəaliyyət göstərir. Tibbi yardım otaqlarından biri isə həftənin 7 günü 24 saat ərzində xidmət edəcək. Təcili tibbi yardım xidməti isə gecə saatlarında da təmin olunur.
Mövzu ilə bağlı qəzetimizə açıqlama verən həkim-infeksionist Əminə İsmixanova bildirdi ki, hazırda o da COP29-da təcili və təxirəsalınmaz tibbi yardım məqsədilə tədbirin keçirildiyi ərazidədir: "Mən və həmkarlarımız neçə müddət idi ki, bu qlobal tədbirə hazırlaşırdıq. Bu müddət ərzində bilik və bacarıqlarımızın, habelə dil bilgilərimizin artırılması məqsədilə müxtəlif yüksəksəviyyəli təlimlər keçmişik. COP29 ölkəmizdə keçirilən ilk irimiqyaslı tədbirdir. Buna uyğun olaraq digər müvafiq qurumlar kimi tibb heyəti də gücləndirilmiş iş rejimində işləyir".
Həkim-infeksionist bildirib ki, mövsümlə əlaqədar və son zamanlar xarici vətəndaşların ölkəmizə artan axınını nəzərə alsaq, virus infeksiyalarının yayılması normal haldır: "Əsas məsələ zamanında düzgün müdaxilə edib, lazımi tədbirlər görüb vəziyyətin qəlizləşməsinin qarşısını almaqdır. Artıq bizim COVID-19 təcrübəmiz var. Lakin vaksin və formalaşmış təbii immunitet sayəsində dünya üçün bu xəstəlik indi təhlükəli deyil. Virus infeksiyalarına gəldikdə isə hər hansı simptomlar göründüyü halda xəstələr dərhal müayinə olunur və lazım gəldikdə stasionar müalicəyə cəlb edilirlər. Şükür ki, ölkəmizdə indiyədək bu kimi tədbirlərdə hər hansı neqativ hallar müşahidə olunmayıb".
Əminə İsmixanova bildirib ki, mehmanxana, qonaq evləri və digər ictimai iaşə obyektlərində də epidemik xəstəliklərin yayılmasının qarşısını almaq üçün mütəmadi olaraq dezinfeksiya işləri aparılır. "Əgər insan özünü xəstə hesab edirsə, infeksiyaların əlamətləri varsa, özünü təcrid etməlidir. Üç gündən artıq davam edən yüksək hərarət, ümumi zəiflik, boğaz və oynaq ağrıları kimi əlamətlər müşahidə edilərsə, dərhal ailə həkimi ilə əlaqə saxlamalı, müalicəyə cəlb olunmalıdırlar. Hazırda poliklinikalarda qrip əleyhinə peyvəndlənmə davam etdirilir ki, bu da COP29 tədbiri zamanı vətəndaşlarımız arasında qrip xəstəliklərinin ağırlaşmalarının və yayılmasının qarşısının alınmasına kömək edəcək. Mütəxəssislərin məsləhətlərinə riayət edildiyi təqdirdə virus infeksiyalarına yoluxanların sayında artım müşahidə edilməyəcəyindən əminik", - deyə həkim-infeksionist vurğulayıb.
Ülkər XASPOLADOVA,
"Azərbaycan"
