Süni zəka texnologiyalarının geniş miqyasda inteqrasiyası bəzi peşələri yox olma təhlükəsi altında qoyub. Onlardan biri də çağrı mərkəzi (call-center) işçiləridir. Artıq şirkətlərin bəziləri telefon üzərindən həyata keçirilən dəstək xidmətinin işçilərini generativ süni zəka ilə əvəzləməyə başlayıb. Məlumata əsasən, ehtimal ki, bir ildən sonra bu sahədə yalnız süni zəka əsaslı çatbotlar istifadə ediləcək. Bu narahatedici proqnozu “Financial Times” qəzeti ilə “Tata Consultancy Services” şirkətinin rəhbəri K. Krithivasan bölüşüb.
Qeyd etmək lazımdır ki, “Tata Consultancy Services” bazar dəyərinə görə Hindistanın ikinci ən böyük şirkətidir və onun işçi sayı bütün dünya üzrə 616 min nəfərdən çoxdur. K.Krithivasan bildirib ki, süni zəka çağrı mərkəzlərinə tələbatı minimuma endirəcək. O əlavə edib ki, onun şirkəti bu mövzu ilə əlaqəli işçi ixtisarlarını hələ müşahidə etməyib. Lakin onun sözlərinə əsasən, transmilli müştərilər generativ süni zəka sistemlərini inteqrasiya etməyə başladıqları zaman vəziyyət kökündən dəyişəcək və bu öz növbəsində sözügedən sahəyə təsir göstərəcək. Şirkət rəhbərinin fikrincə, süni zəka texnologiyası daxil ola biləcək zəngi öncədən proqnozlaşdırmaq imkanına sahib olmalı və daha sonra problemi aktiv şəkildə həll etməlidir.
Keçən il Hindistanın “Duukan” şirkətinin icraedici direktoru şirkətin dəstək xidməti komandasının 90 faizini işdən azad etmişdi. O bildirmişdi ki, bu addım müştərinin sorğusuna ilk cavabın təqdim olunma müddətini və müştərilərin dəstək xərclərini 85 faiz azaltmağa kömək edib. 

Ülkər XASPOLADOVA,
“Azərbaycan”