Qarabağ və Şərqi Zəngəzur qonaqlı-qaralı günlərinə yenidən qovuşub. Hər gün xeyli sayda vətəndaşımız bu yerlərin ziyarətinə yollanır, tarixi əzəməti, təbii gözəllikləri ilə görənlərini valeh edən cənnətməkan ərazilərimizdə həyata keçirilən modern quruculuq işlərinə heyranlıqla tamaşa edirlər. Qarabağ və Şərqi Zəngəzur təkcə azərbaycanlıların deyil, xarici ali qonaqların da üz tutduğu şanlı məkana çevrilib.
Bu yaxınlarda Qarabağın mirvarisi Şuşada keçirilən Türk Dövlətləri Təşkilatının qeyri-rəsmi zirvə toplantısında Qazaxıstan Prezidenti Kasım-Jomart Tokayevin, Özbəkistan Prezidenti Şavkat Mirziyoyevin, Qırğız Prezidenti Sadır Japarovun, Macarıstanın Baş naziri Viktor Orbanın, Türkiyə Respublikasının vitse-prezidenti Cevdet Yılmazın, Şimali Kipr Türk Cümhuriyyətinin Prezidenti Ersin Tatarın, Türk Dövlətləri Təşkilatının Baş katibi Kubanıçbek Ömüralıyevin, ümumiyyətlə, türkdilli dövlətlərdən olan xeyli mötəbər şəxsin iştirak etməsi də buna nümunədir.
Bütün bunlar da göstərir ki, Qarabağ və Şərqi Zəngəzur həm də dünyada qonaqpərvərliyin və dirçəlişin unikal ünvanı kimi ad-sana malikdir.
Mənəvi borcumuz
Düz bir qərinə ərzində səsimiz, ünümüz yetməyən, Yer üzündə yaşayan bütün azərbaycanlıların həsrətini çəkdiyi vətən torpaqlarımız artıq azaddır. İndi könlü Qarabağdan, Şərqi Zəngəzurdan keçən bizlər bu yerlərə gedərək məscidlərində dua edərək Tanrıya şükranlıqlarımızı bildiririk. Şəhidlərimizin qanları ilə suvardığı bu pak torpaqlarda ruhumuzun dinclik tapdığı, müqəddəs arzularımızın gerçəkləşdiyi məqamlar yaşayırıq. İllərlə nisgili ilə alışıb-yandığımız Vətənin başına pərvanələrtək dolanırıq. Əzəmətli dağlarına, gül-çiçəkli çəmənlərinə, zümrüd meşələrinə doyunca baxır, qıvrım-qıvrım yollarına düşüb gözlərimizdən süzülən sevinc yaşları içərisində addım-addım gəzirik hər qarışını...
Ulu yurdumuzun zirvələrinə qalxaraq səsimiz, avazımız gəldikcə hayqırırıq: "Doğma vətən, biz qayıtmışıq!"
Vətən müharibəsinin başa çatmasından 6 gün sonra Müzəffər Ali Baş Komandan İlham Əliyevin iştirakı ilə Füzuli-Şuşa avtomobil yolunun təməlinin qoyulması vətənə uzanan və onilliklər idi ki, yarıda qırılan bütün yolların əbədi açıldığına rəmzi işarə oldu. Çox tezliklə bu yollarla Qarabağ və Şərqi Zəngəzura sarı qayıdış köçləri yola çıxdı, keçmiş məcburi köçkünlərimiz yurdlarına qovuşdular. Vətən həsrətini sona çatdıran qayıdış karvanları indi də davam edir.
Bu torpaqları ziyarət etməyi hər bir azərbaycanlı özünün mənəvi borcu sayır. Buna görədir ki, yaz, qış demədən ilin bütün fəsillərində Qarabağ və Şərqi Zəngəzur qonaq-qaralı olur. İşğaldan azad edilən torpaqlarda tikinti-quruculuq işlərinin aparılmasına baxmayaraq, dövlətimiz vətəndaşlarımıza tarixi ərazilərimizi görmək üçün qısa zamanda imkanlar yaratdı. Prezident İlham Əliyevin tapşırığı ilə ilk olaraq 2022-ci il yanvarın 24-də Bakı-Şuşa-Bakı avtobus reysinin açılması ilə vətəndaşlarımızın Qarabağın mirvarisi, zəfər qalamız Şuşaya mütəmadi səfərləri başladı.
Sözügedən tarixdən Bakı-Ağdam-Bakı müntəzəm avtobus marşrutu da istifadəyə verildi. Bununla "ruhlar şəhəri" adlandırılan Ağdama doğma sakinlərinin, xalqımızın bütün nümayəndələrinin səfərlərinə start verildi. Necə deyərlər, ağ damlı qədim şəhərimizə doğma hənir qaytarıldı.
Füzuli şəhərinə müntəzəm uçuşlar həyata keçirilir
Böyük qayıdış proqramının tərkib hissəsi olaraq Azərbaycan vətəndaşlarının işğaldan azad edilmiş ərazilərə səfərlərinin istiqamətləri genişləndirilir.
Belə ki, bu il aprelin 27-dən etibarən vətəndaşlar fərdi minik avtomobilləri ilə Şuşa şəhərinə və Suqovuşan qəsəbəsinə getməklə bərabər, artıq Laçın şəhərinə də səfər edə bilirlər.
Buna görədir ki, son vaxtlar Şuşa və Laçın şəhərlərinə fərdi avtomobil ilə turist səfərlərinin sayında artım müşahidə olunur.
Adıçəkilən ərazilər üzrə xüsusi nümayəndəliklərdən verilən məlumata əsasən bu il Qurban bayramı ilə əlaqədar qeyri-iş günlərində (15-19 iyun) Şuşa şəhərinə 2650 avtomobil ilə 12 528 nəfər, Laçın şəhərinə isə 2 296 fərdi avtomobil ilə 8 330 nəfər səfər edib.
Göründüyü kimi, Qarabağ və Şərqi Zəngəzuru ziyarət edən vətəndaşlarımızın sayı hər ötən gün durmadan artır.
Təbii ki, azadlığına qovuşdurulan yurdlarımızda dövlətimiz tərəfindən əsaslı quruculuq işlərinin görülməsi, hərtərəfli infrastrukturun yaradılması, dünyasəviyyəli hotellərin inşa edilməsi də bu yerlərə səfərlər üçün mühüm zəmin yaradır. Qarabağ və Şərqi Zəngəzurda qısa zamanda iki beynəlxalq hava limanının (Füzuli və Zəngilan) istifadəyə verilməsi, Laçın Beynəlxalq Hava Limanının sürətli inşasının həyata keçirilməsi bölgəyə səfərlərin daha əlçatan olmasına birbaşa xidmət edən əsaslı işlərdir.
Dünəndən Azərbaycanın milli aviadaşıyıcısı AZAL tarixində ilk dəfə olaraq Qarabağa müntəzəm reyslərə başlayıb.
Bakıdan Füzuli şəhərinə və əks istiqamətdə müntəzəm uçuşlar həyata keçirilir.
Bəli, indi qurudan da, havadan da bütün yollar bizi vətənlə görüşə aparır. Gündən-günə Qarabağ və Şərqi Zəngəzura səfər edən insanların sayının artması isə təkcə buraların təbii gözəlliyinə, səfalı hava və suyuna görə yox, xalqımızın hər bir üzvünün qəlbində bu yerlərin müqəddəs ünvana sahib olmasına, insanlarımızın bu torpaqlara könül bağı ilə bağlı olmasına görədir. Və bütün bunlar həm də Qarabağ və Şərqi Zəngəzurun cənnətməkana çevrilməsini, əzəli sakinlərinin doğma torpaqlarına qayıdışını təcəssüm etdirən qürurverici məqamlardır.
Yasəmən MUSAYEVA,
"Azərbaycan"
jpg_1749076194.jpg)
