BMT-nin Uşaq Hüquqları Komitəsi (CRC) Fransa hökumətini müşayiətsiz miqrant uşaqların hüquqlarını ciddi və sistematik şəkildə pozmaqda günahlandırıb.
AZƏRTAC xəbər verir ki, bu haqda CRC-nin yayımladığı hesabatda qeyd olunub. Komitənin hesabatında deyilir ki, Fransa ərazisində çox sayda uşaq azyaşlı olduqlarını sübut edə bilmədikləri üçün müdafiədən kənarda qalır, küçələrdə yaşayır və insan ləyaqətinə zidd şəraitdə sağ qalmağa çalışırlar. Onlarla yetkin şəxslər kimi rəftar edilir. Həmçinin hesabatda qeyd olunur ki, Fransa qanunvericiliyində müşayiətsiz miqrant uşaqların qorunmağa və qayğıya ehtiyacı olan şəxslər kimi tanınması müsbət qiymətləndirilsə də, praktikada bu, çox vaxt tətbiq olunmur.
Komitənin 18 beynəlxalq eksperti vurğulayır ki, azyaşlı olduqlarını bildirən çox sayda uşaq etibarsız yaş təyini prosedurları səbəbi ilə böyük kimi rəsmiləşdirilir. Bu prosedurlar əsasən xarici görünüşə və ya dəqiqliyi sual altına alınan tibbi testlərə əsaslanır. Üstəlik, bu testlər çox zaman etibarlı hüquqi nümayəndə, qəyyum və ya vəkilin iştirakı olmadan aparılır. Komitə bildirir ki, yaşla bağlı mübahisələr və hüquqi prosedurlar səkkiz aya və ya daha çox müddətə qədər çəkə bilər. Bu müddətdə uşaqlar qorunma hüququndan məhrum olur və təcavüz, insan alveri, istismar, polis zorakılığı kimi ciddi təhlükələrlə üzləşirlər.
BMT ekspertləri Fransa hakimiyyətini azyaşlılıq ehtimalının üstünlüyü prinsipinə ciddi əməl etməyə çağırırlar. Yəni uşaq sübut təqdim olunana qədər uşaq kimi tanınmalı və müvafiq şəkildə müdafiə olunmalıdır.
Komitə, həmçinin vurğulayır ki, yaşları sonradan yenidən qiymətləndirilən uşaqların 50–80 faizinin azyaşlı olduqları qəbul edilir. Bu fakt ilkin qiymətləndirmələrin nə qədər qeyri-dəqiq və zərərli olduğunu göstərir.
BMT Komitəsinin bu hesabatı, Fransa kimi insan hüquqları və uşaq müdafiəsi sahəsində öncül ölkələrdən hesab edilən bir dövlət üçün ciddi narahatlıq siqnalı olaraq qiymətləndirilir. Komitə Fransa hökumətindən qanunla nəzərdə tutulan hüquq və prinsiplərin real həyata keçirilməsini, bütün miqrant uşaqlar üçün təhlükəsiz və ləyaqətli mühitin təmin olunmasını tələb edir.
jpg_1790976482.jpg)
