Bu, Bağanıs Ayrım sakinlərinin yekdil fikridir

Ötən əsrin 90-cı illərinin əvvəlində Ermənistanın işğal etdiyi ərazilərimizdən biri də Qazaxın Bağanıs Ayrım kəndidır. Düşmənin hələ 1988-ci ildən törətməyə başladığı təxribatlar Bağanıs Ayrımı da gözləyirdi. 
Xüsusi strateji əhəmiyyətə malik kənd İcevan-Noyemberyan avtomobil yolu üzərində yerləşdiyindən düşmən gələcəkdə təhlükəsiz hərəkət edə bilməsi üçün bu kəndin işğalını xüsusi plan əsasında həyata keçirməyə başladı. Tarixboyu Azərbaycana qarşı torpaq iddiası irəli sürən və "böyük Ermənistan" xülyası ilə yaşayan düşmənlərimiz 1990-cı ildə martın 23-dən 24-nə keçən gecə böyük bir qüvvə ilə - zirehli texnika və tanklarla kəndə daxil oldular. Əliyalın kənd sakinləri təpədən-dırnağadək silahlanan erməni hərbçilərindən canlarını qurtarmaq üçün qonşu kəndlərə və meşələrə üz tutdular. Evləri talayan ermənilər sonra onlara od vurur, qaçan insanları isə tutaraq oda atırdılar. Kəndin 7 sakini insanlığa sığmayan işgəncələrlə öldürüldü, 2 nəfər güllələndi. Ocaqda yandırılanların ən kiçiyi 2 aylıq körpə, böyüyü isə 70 yaşında idi. 
Bu gün kəndətrafı yüksəkliklərdən baxdıqda Bağanıs Ayrım əsl xarabalığa bənzəyir. Bu xarabalıq 34 il əvvəl ermənilərin kənd sakinlərinə qarşı törətdikləri vəhşiliklərə şahidlik edir. Ailələri bütövlükdə yandıran, dinc əhaliyə rəhm etməyən ermənilərin bu kənddə törətdiklərini bir sözlə ifadə etsək, ona soyqırımından başqa ad vermək mümkün deyil.
Amma bu gün kəndin sağ qalan sakinləri sevinc içindədirlər. Prezident İlham Əliyevin apardığı qətiyyətli siyasət nəticəsində Qazaxın 4 kəndinin, o cümlədən Bağanıs Ayrımın azad edilməsi xəbərini onlar qürur hissilə qarşılamışlar. 
Ələsgər Hacıyev Bağanıs Ayrımın ağsaqqallarındandır. Doğma kəndlərindən didərgin düşəndə övladları hələ ailə qurmamışdılar. Qazax rayonunda salınmış qaçqın şəhərciyində məskunlaşan ailə ötən illər ərzində xeyli böyümüşdür. Ələsgər kişi övladlarını evləndirmiş, baba olmuşdur. 
Doğma kəndinin azad olunması xəbəri ona böyük sevinc bəxş edib. İndi o, böyük arzularla yaşayır. Deyir ki, yurduna dönəcəyi günü səbirsizliklə gözləyir. Həmkəndliləri Valeh Məmmədov, Qələndər Adıgözəlovun da yeganə arzuları yurda dönüb ömürlərini orada başa vurmaqdır. Deyirlər ki, ev-eşikləri dağıdılsa da, onu yenidən bərpa etmək olar: "Əsas odur ki, torpaqlarımız işğaldan azad olur. Bunu isə edən Prezidentimizdir. Bir daha əmin olduq ki, fevralın 7-də  düzgün seçim etmişik, dövlətimizin sükanını etibarlı ələ vermişik".

Sabir ƏLİYEV,
"Azərbaycan"