Bakıda taekvondo üzrə dünya çempionatı çərçivəsində müxtəlif tədbirlər keçirilir

Bakıda taekvondo üzrə 26-cı dünya çempionatı bu gün başa catır. Yarışın beşinci günündə daha 2 çəki dərəcəsi üzrə mükafatçılar müəyyənləşib.
Qadınlar arasında 46 kq çəki dərəçəsində dünya çempionatının qızıl medalına Lena Stoykoviç (Xorvatiya) layiq olub. O, finalda Siken Kamonçanoku (Tailand) məğlub edib. Üçüncü yeri Ruka Okamoto (Yaponiya) və Vanq Xiaolu (Çin) tutublar.
Kişilər arasında 54 kiloqram çəkidə dünya çempionu titulunu Tae-Joon Park (Cənubi Koreya) qazanıb. Gümüş medala Huqo Arillo Vazques (İspaniya) layiq görülüb. "Üçlüy"ü Omonjon Otajonov (Özbəkistan) və Görkem Polat (Türkiyə) qapayıblar.
Bu çəkidə Azərbaycan millisinin idmançılarından Minayə Əkbərova (46 kiloqram) 1/16 finalda Ruka Okamotoya (Yaponiya), Səyyad Dadaşov (54 kiloqram) isə  özbək Omonjon Otajonova  məğlub olublar.
İyunun 3-də Azərbaycan millisinin daha 2 idmançısı mübarizəyə qoşulub.
62 kiloqram çəki dərəcəsində mübarizə aparan Fatimə Məcidova mundialda debüt görüşünə 1/16 finaldan başlayıb. O, ilk döyüşünü Kristina Kaspaya (İtaliya) qarşı keçirib və iki raundun yekununda məğlub olub.
74 kiloqram çəkidə təmsilçimiz Eltac Qafarovun rəqibi 1/32 final qarşılaşmasının nəticəsinə əsasən bəlli olub. İdmançımız 1/16 finalda Vasili Peruniçiçə (Monteneqro) qalib gəlib və növbəti mərhələyə vəsiqə qazanıb. 1/8 final qarşılaşmasında norveçli Sebastyan Tüneni məğlubiyyətə uğradan taekvondoçumuz medallar uğrunda mübarizəni davam etdirib. Təəssüf ki, 1/4 finalda, medalın bir addımlığında Eltac Qafarov xorvatiyalı Marko Qolubiçə uduzub.
Qeyd edək ki, yarışla bağlı 3000-dən artıq qonağın gəldiyi Bakıda çempionat çərçivəsində müxtəlif tədbirlər keçirilir.
Belə ki, dünya çempionatı çərçivəsində demo şou festivalı baş tutub. Festival Dünya Taekvondosunun (WT) nümayiş komandası tərəfindən Dənizkənarı Milli Parkda keçirilib.
WT-nin prezidenti Çunqvon Ço və Azərbaycan Taekvondo Federasiyasının vitse-prezidenti Nağı Səfərov tədbirdən öncə komanda üzvləri ilə görüşüblər. Çunqvon Ço şəhər sakinləri ilə də söhbət edib, onlarla şəkillər çəkdirib.
Tədbirdə qonaq komandanın Azərbaycan milli rəqslərini də ifa etməsi izləyicilər tərəfindən maraqla qarşılanıb.
Qeyd edək ki, iyunun 4-də başa çatacaq çempionata 145 ölkədən 949 idmançı qatılıb. 
Dünya çempionatı Rusiyadan sonra MDB ölkələri arasında ikinci dəfə Azərbaycanda keçirilir. Ölkəmiz mundialı qəbul edən Avropa dövlətləri arasında Almaniya, Danimarka, İspaniya, Yunanıstan, Rusiya və Böyük Britaniyadan sonra yeddinci kimi tarixə düşüb.
Taekvondo üzrə dünya çempionatını izləyənlər arasında Azərbaycanla Türkiyənin qaziləri və amputant futbolçuları da  yer alıb. Onlar mundialın yarımfinal və final döyüşlərini, xüsusilə 3 qızıl medala yiyələnən türkiyəli taekvondoçuların mübarizələrini həyəcanla izləyiblər.
Yarışdan sonra qazilər və amputant futbolçular təşkilatçı komanda ilə görüşüb və onlara dünya çempionatına dair müxtəlif hədiyyələr təqdim edilib.
Dünən Beynəlxalq Olimpiya Komitəsinin (BOK) prezidenti Tomas Bax, Dünya Taekvondosunun (WT) prezidenti Çunqvon Çu və WT-nin baş katibi Seo Jeonqkanq Azərbaycan Taekvondo Federasiyasının (ATF) qonağı olublar. Onlar Azərbaycan gənclər və idman naziri Fərid Qayıbov, ATF prezidenti Kəmaləddin Heydərov, vitse-prezidentlər Nağı Səfərov və Niyaməddin Paşayevlə görüşüblər.
Görüşdə qonaqlara ölkəmizdə taekvondonun hazırkı durumu barədə məlumat verilib, bu idman növünün daha da inkişafı və kütləviləşməsi istiqamətində fikir mübadiləsi aparılıb. Bildirilib ki, Azərbaycanın taekvondo üzrə dünya çempionatına və Dünya Taekvondosunun 50 illik yubiley tədbirinə evsahibliyi etməsi tarixi hadisədir.
BOK və WT prezidentləri ardınca ATF-nin idman zalında məşq edən taekvondoçularla da söhbət ediblər. Onlara xatirə hədiyyələri təqdim edən qonaqlar komanda ilə xatirə şəkli də çəkdiriblər.
Qeyd edək ki, bu gün - iyunun 4-də başa çatacaq çempionata 145 ölkədən 949 idmançı qatılıb. 

Rizvan CƏFƏROV,
"Azərbaycan"