ELSA Azərbaycanın təşkilatçılığı və Gənclər Fondu, Vəkillər Kollegiyası, Gənclər Təşkilatları Milli Şurası, “Dentons Bakı” şirkəti, “Turan Legal and Tax Services” şirkəti, “KPMG Azərbaycan” şirkəti, “PwC Azərbaycan” şirkəti, “Legalize” hüquq şirkəti, “Sirab”, “HARİKA”, “Bergtea”nin dəstəyi ilə Bakı şəhərində keçirilən “Biznes hüququ” mövzusunda 9-cu Beynəlxalq Yay Hüquq Məktəbinin açılış mərasimi keçirilib.
ELSA Azərbaycan təşkilatından AZƏRTAC-a bildiriblər ki, Gənclər Fondunun 7 saylı Bakı "ASAN xidmət" mərkəzində təşkil olunan mərasim Azərbaycanın Dövlət Himninin səslənməsi ilə başlayıb.
Mərasimdə çıxış edən ELSA Azərbaycanın prezidenti Nazim Çələbiyev tədbirin keçirilməsinin əhəmiyyətini vurğulayıb və dəstək göstərən qurumlara təşəkkür edib.
ELSA Azərbaycanın Seminarlar və konfranslar üzrə vitse-prezidenti Tünzalə Mustafazadə layihənin gedişatı və onun hüquq təhsili alan tələbələr üçün əhəmiyyəti barədə danışıb.
Gənclər Təşkilatları Milli Şurasının Beynəlxalq əlaqələr üzrə meneceri Nəriman Əliyev təşkilatın fəaliyyətindən və ELSA Azərbaycanla uğurlu əməkdaşlıqdan bəhs edib.
“Turan Legal and Tax Services” şirkətinin hüquq meneceri Rəşad Cahangirov çıxış edərək şirkətin fəaliyyəti barədə məlumat verib.
Mərasimin sonunda ELSA Azərbaycanın Səhnələşdirilmiş Məhkəmə Müsabiqələri üzrə vitse-prezidenti Ənvər Hüseynov akademik proqram barədə məlumat verib və həmin proqram başlanıb.
Qeyd edək ki, 9-cu Beynəlxalq Yay Hüquq Məktəbi çərçivəsində iyulun 13-dək keçiriləcək silsilə təlimlərdə Belçika, İtaliya, Albaniya, Almaniya, Yunanıstan, Serbiya, Birləşmiş Krallıq və digər Avropa ölkələrindən olan ümumilikdə 50 hüquq təhsili alan tələbə biznes hüququna dair baza biliklər əldə etməklə yanaşı, mədəni və sosial proqramlar vasitəsilə Azərbaycan mədəniyyəti ilə yaxından tanış olacaqlar.
