Babək Rayon Prokurorluğunun yeni inzibati binası istifadəyə verilmişdir. Bu münasibətlə keçirilən mərasimdə Naxçıvan Muxtar Respublikasının prokuroru, ikinci dərəcəli dövlət ədliyyə müşaviri Səbuhi Şahverdiyev çıxış edərək prokurorluq orqanlarına göstərilən yüksək diqqət və qayğıya, yaradılan şəraitə görə minnətdarlığını bildirmişdir.
Naxçıvan Muxtar Respublikası Ali Məclisinin sədri Vasif Talıbov Babək Rayon Prokurorluğunun yeni inzibati binasının istifadəyə verilməsi münasibətilə kollektivi təbrik edərək demişdir: "Hüquqi, dünyəvi və demokratik dövlət olan Azərbaycanda sabitliyin və insanların rahatlığının təmin olunmasının əsasında qəbul edilmiş qanunların tətbiqi və icrası dayanır. Əgər hər hansı bir ölkədə qanunların aliliyi təmin olunmursa, qəbul olunan qanunlar icra edilmirsə, deməli, həmin ölkədə sabitliyi və iqtisadi inkişafı təmin etmək mümkün deyildir. Ona görə də ölkəmizdə qəbul olunan qanunların icrasına xüsusi diqqət yetirilir. Bu sahədə prokurorluq orqanlarının da üzərinə mühüm vəzifələr düşür. Azərbaycan Respublikasının prokurorluq orqanları öz fəaliyyətlərində 17 məcəlləni və 14 qanunu rəhbər tutur, bu qanun və məcəllələrin tətbiqində yaxından iştirak edirlər.
Bu sahədə həyata keçirilən ardıcıl islahatlar, beynəlxalq təcrübəyə əsaslanaraq qəbul olunmuş qanunlar və onların icrası Azərbaycanda davamlı sabitliyə və iqtisadi inkişafa təminat verir". Ali Məclisin sədri bildirmişdir ki, son illərdə ölkəmizdə cinayət hadisələrinin azalması, əldə olunan yüksək sosial-iqtisadi inkişaf göstəriciləri, insanların sosial-rifah halının yüksəlməsi dünya birliyində dövlətimizin yerini və rolunu əhəmiyyətli dərəcədə möhkəmləndirmişdir.
Ali Məclisin sədri vurğulamışdır ki, Azərbaycanın qısa vaxtda qazandığı uğurların, əldə olunan iqtisadi inkişafın və davamlı sabitliyin təməlində ulu öndər Heydər Əliyevin siyasi xətti dayanır. Ümummilli liderimizin siyasi kursunu uğurla davam etdirən Prezident İlham Əliyevin səyləri, yüksək diqqət və qayğısı ilə beynəlxalq müstəvidə böyük nüfuz sahibi olan Azərbaycan hüquqi və dünyəvi dövlət kimi öz yerini getdikcə daha da möhkəmləndirir. Həyata keçirilən ardıcıl və məqsədyönlü tədbirlərin nəticəsidir ki, ölkəmiz bütün sahələr üzrə davamlı olaraq inkişaf edir, insan hüquq və azadlıqları təmin olunur, sabitlik uğurların qazanılmasını şərtləndirir.
Qeyd olunmuşdur ki, bu gün yüksək iş şəraiti olan müasir bina prokurorluq əməkdaşlarının istifadəsinə verilir. Burada yaradılan şərait qanunvericiliyin tələblərinin lazımi səviyyədə yerinə yetirilməsinə, sabitliyin daha da möhkəmləndirilməsinə əlavə stimul verəcək. 34 kəndi və bir qəsəbəni əhatə edən Babək Rayon Prokurorluğu hüquqi maarifləndirmə işinin təşkilində, prokuror nəzarətinin həyata keçirilməsində, rayonda yaşayan 68 min əhalinin hüquqlarının qorunmasında öz üzərinə düşən vəzifələri layiqincə yerinə yetirməlidir.
Ali Məclisin sədri əmin olduğunu bildirmişdir ki, Babək Rayon Prokurorluğunun əməkdaşları bundan sonra da qanunların aliliyinin və insanların hüquqlarının qorunmasında səylərini davam etdirəcəklər.
Ali Məclisin sədri açılışı bildirən rəmzi lenti kəsmiş, binada yaradılan şəraitlə tanış olmuşdur.
Məlumat verilmişdir ki, bina zirzəmi ilə birlikdə 4 mərtəbədən ibarətdir. Müasir memarlıq ənənələri əsasında inşa edilən binada əməkdaşların fəaliyyəti üçün lazımi şərait yaradılmış, yeni kompyuter və mebel dəstləri ilə təchiz edilmiş iş otaqları istifadəyə verilmişdir.
