Azərbaycanda ən böyük yanacaqdoldurma şəbəkəsinə malik olan "Azpetrol" brendi bu gün önəmli hadisəni qeyd edir. Şirkətin sayca 100-cü yanacaqdoldurma məntəqəsi işğaldan azad olunmüş Füzuli şəhərində istismara verildi. 
Hadisəni önəmli edən həm yanacaqdoldurma məntəqəsinin Zəfər yolunun üzərində yerləşməsi, həm də 2023-cü ilin Azərbaycan xalqının Ümummilli Liderinin anadan olmasının 100-cü ildönümü münasibəti ilə "Heydər Əliyev İli"nin qeyd edilməsidir.
Qurumun Mətbuat xidmətindən verilən məlumata görə, bu gün istismara verilən modul tipli "Füzuli YDM" işğaldan azad olunmuş ərazilərdə "Azpetrol"un sayca 4-cü məntəqəsidir. Yeni yanacaqdoldurma məntəqəsində Aİ-92, Premium və Dizel yanacaq növlərinin satışı həyata keçiriləcək. YDM ərazisində 4 yeni iş yeri yaradılıb. Beləliklə, "Ağalı YDM", "Hadrut YDM" və "Suqovuşan YDM"nin işçilərini nəzərə alaraq, "Azpetrol" şirkəti işğaldan azad edilmiş ərazilərdə artıq 17 daimi iş yerinin açılmasını təmin edib.
"Azpetrol" şirkəti strateji inkişaf planına uyğun olaraq, Azərbaycanın yanacaqdoldurma bazarında lider mövqeyini bundan sonra da möhkəmləndirəcək, yanacaqdoldurma şəbəkəsini və əhatə dairəsini genişləndirəcək, təklif edilən xidmətlərin çeşidi və keyfiyyətini daim artıracaq.    
"Azpetrol" şirkətinin ilk yanacaqdoldurma məntəqəsi - "Spartak", 1997-ci il iyulun 15-də Bakı şəhəri, Nəsimi rayonu, Moskva prospekti, 1013-cü məhəllə ünvanında açılıb. Şirkətin hazırda ölkəmizin əksər iqtisadi zonalarında ümumilikdə 100 yanacaqdoldurma məntəqəsi, 1 maye qazdoldurma (propan-butan) məntəqəsi, ictimai nəqliyyatda sərnişindaşımaya xidmət edən respublikada ən muasir standartlara cavab verən 1 sıxılmış təbii qaz (CNG) terminalı, yanacaq məhsullarının saxlanılması üçün 3 neftbazası, yanacaqdaşıyan maşınlar üçün avtobazası, yanacağın yanacaqdoldurma məntəqələrinə fasiləsiz daşınmasını təmin etmək üçün 100-dən atrıq yanacaq daşıyan avtomobili, minik maşınları üçün avtosahə mövcuddur. Fəaliyyət göstərən yanacaqdoldurma məntəqələrində 4 sıxılmış təbii qazdoldurma postu, 4 maye qazdoldurma postu və 17 elektromobillərin enerji ilə doldurulma postu, 8 motel, eyni zamanda müxtəlif xidmətlərin göstərilməsi üçün əksər məntəqələrdə iaşə obyektləri (kafe, avtoyuma, market) fəaliyyət göstərir.