Türkiyənin Qars və İğdır vilayətlərindən, Gürcüstanın azərbaycanlılar yaşayan müxtəlif bölgələrindən olan din xadimlərindən ibarət nümayəndə heyəti iyunun 1-də Bibiheybət məscidini ziyarət edib.
Dini Qurumlarla İş üzrə Dövlət Komitəsindən AZƏRTAC-a verilən məlumata görə, nümayəndə heyətinə ibadətgahın tarixi barədə məlumat verilib. Bildirilib ki, Sovet hakimiyyətinin repressiyasına məruz qalmış dini memarlıq abidəsi Heydər Əliyev dövlət başçısı seçildikdən sonra dini və milli-mənəvi dəyərlərin qorunması sahəsində atılan mühüm addımların davamı kimi yenidən dindarların ixtiyarına verilib. Azərbaycan Prezidenti İlham Əliyevin Sərəncamı ilə məscidin ərazisi genişləndirilib, möhtəşəm kompleks inşa edilib. Vurğulanıb ki, Birinci vitse-prezident, Heydər Əliyev Fondunun prezidenti Mehriban Əliyeva da dini ibadətgaha xüsusi diqqət göstərir.
Azərbaycanda dövlət-din münasibətlərinin inkişafı üçün atılan addımları yüksək qiymətləndirən din xadimləri məscid-komplekslə yaxından tanış olublar.
"Şəhidlər" məscidini ziyarət zamanı bildirilib ki, ibadətgah Türkiyə Diyanət Vəqfi tərəfindən iki ölkə arasında dostluq, qardaşlıq əlaqələrinin simvolu kimi 1990-cı ilin 20 Yanvar hadisələrində və Qarabağ müharibəsində şəhid olanların xatirəsini yad etmək məqsədilə inşa edilib. Məscidin Bakının dini və tarixi əhəmiyyətli məkanlarından biri kimi, həm yerli əhali, həm də turistlər tərəfindən tez-tez ziyarət edildiyi qeyd olunub.
Daha sonra Ulu Öndər Heydər Əliyevin adını daşıyan Heydər məscidini ziyarət edən din xadimlərinə məscidin inşası və fəaliyyəti haqqında geniş məlumat verilib. Bildirilib ki, Prezident İlham Əliyevin Sərəncamına əsasən, 2012-ci ilin sentyabr ayında məscidin tikintisinə başlanılıb. 2014-cü il dekabrın 26-da məscidin açılışı olub. Qonaqların diqqətinə çatdırılıb ki, məsciddə eyni vaxtda 7000-ə yaxın insan ibadət edə bilir. Din xadimlərinə Heydər məscidində təşkil olunan Vəhdət namazı haqqında bəhs edilərək, bu ibadətin artıq ənənə halı aldığı vurğulanıb.
jpg_1766133801.jpg)
