Muğanlı-İsmayıllı-Qəbələ avtomobil yolunda yenidənqurma işləri davam etdirilir. Bu yol üzərində inşa edilən asma körpü və yeraltı tunel uzunluğuna və hündürlüyünə görə Azərbaycanda bir ilkdir.
AZƏRTAC xəbər verir ki, sözügedən avtomobil yolu paytaxt Bakı ilə İsmayıllı, Qəbələ, Oğuz, Şəki, Qax, Zaqatala və Balakən rayonlarını birləşdirən ən qısa yol olacaq.
Layihə başa çatdıqdan sonra paytaxt Bakı istiqamətindən şimal-qərb rayonlarına doğru hərəkət edən sürücülər Ağsu çayı üzərində hündürlüyü 76 metr, uzunluğu 1135 metr olan asma körpüdən keçəcəklər. Asma körpüdən çıxan avtomobillər 300 metrlik asfalt yolla hərəkət etdikdən sonra, uzunluğu 865 metr, hündürlüyü 9 metr olan dördzolaqlı yola daxil olacaqlar. Sürücülər asma körpüdən, eləcə də yeraltı tuneldən keçməklə həm az məsafə qət edəcək, həm də mənzil başına daha tez və rahat çatacaqlar.
Hazırda dörd ərazidə ümumi uzunluğu 2,6 kilometr olan svay istinad divarlarının, drenaj sistemlərinin tikintisi və digər mühəndis işləri aparılır. Qurğular normalara əsasən, 9 ballıq zəlzələyə davamlı inşa edilir.
Layihə rəhbəri Zahir Həsənov bildirib ki, Muğanlı-İsmayıllı-Qəbələ avtomobil yolunun Muğanlıdan keçən hissəsində, Ağsu çayı vadisində dolamalar mövcuddur. Qışda, xüsusilə qarlı-şaxtalı havalarda hərəkət çətinləşir: “Bu layihə başa çatdıqdan sonra həmin problemlər də aradan qalxacaq. Şamaxıdan çıxan nəqliyyat vasitəsi heç bir dolama olmadan bu vadidən keçəcək və rahat hərəkət edəcək. Digər üstünlük ondan ibarətdir ki, yeni inşa edilən yol dörd zolaqdan ibarətdir. Bu da öz növbəsində hərəkəti asanlaşdıracaq”.
Layihənin icrası nəticəsində həm məsafə qısalacaq, nəqliyyat xərcləri azalacaq, hərəkətin təhlükəsizliyi təmin olunacaq, həm də regionun potensialından istifadə etmək üçün yeni imkanlar yaranacaq, eyni zamanda, turizm inkişaf edəcək.
İsmayıllı sakini Cəmil Xalidoğlu da yeni yolun turistlərin bölgələrə daha çox gəlib-getməyinə səbəb olacağını söyləyib: “Düzdür, turistlər indi də gəlib-gedir, amma çox vaxt qonaqlar yol narahat olduğuna görə bu ərazilərə gəlmirlər. Yeni yol rahat olacaq, məsafəni azaldacaq. Yeraltı tunel, asma körpü də bu yerlərə əlavə gözəllik qatacaq”.
Muğanlı-İsmayıllı-Qəbələ yolu yenidənqurma nəticəsində 9,7 kilometr qısalaraq 76,8 kilometr təşkil edəcək. Mövcud ikizolaqlı yol genişləndirilərək dördhərəkət zolağından ibarət olacaq. Hazırda layihənin ilk 7 kilometrlik hissəsində torpaq işləri, yol yatağının tikintisi aparılır. Həmçinin mühəndis qurğuları, ümumi uzunluğu 180 metrdən çox olan dairəvi düzbucaqlı suötürücülər də inşa edilir. Layihənin əvvəlində mövcud yolla kəsişmədə dairənin inşası nəzərdə tutulur.
