Azərbaycan Qızıl Aypara Cəmiyyətinin dəvəti ilə ölkəmizdə səfərdə olan Beynəlxalq Qızıl Xaç və Qızıl Aypara Federasiyasının Avropa və Asiya zonası üzrə vitse-prezidenti, Türkiyə Qızıl Aypara Cəmiyyətinin prezidenti Kərəm Kınıkın başçılıq etdiyi nümayəndə heyəti noyabrın 29-da Fəxri xiyabanda xalqımızın ümummilli lideri Heydər Əliyevin məzarına əklil və gül dəstələri qoyub.
Şəhidlər xiyabanı və Azərbaycan torpaqlarının azadlığı və bütövlüyü uğrunda şəhid olmuş türk əsgərlərinin xatirəsinə ucaldılmış abidə də ziyarət edilib, məzarları üzərinə gül dəstələri düzülüb.
AZƏRTAC xəbər verir ki, Türkiyə Qızıl Aypara Cəmiyyətinin prezidenti Kərəm Kınık Azərbaycan Qızıl Aypara Cəmiyyətinin prezidenti, Milli Məclisin deputatı Novruz Aslanovla görüşüb.
Görüşdə cəmiyyətlər arasında dostluq və əməkdaşlıq əlaqələrinin tarixindən söhbət açılıb. İki ölkənin cəmiyyətləri arasında əlaqələr 1992-ci ildən başlanılıb. N.Aslanov qeyd edib ki, 1993-cü ildə Bərdə və Ağcabədi rayonlarında Türkiyə Qızıl Ay Cəmiyyəti tərəfindən məcburi köçkünlər üçün çadır şəhərciyi salınıb və həmin şəhərciyin xərcləri 10 il bu cəmiyyətin hesabına ödənilib. O, iki təşkilat arasında əməkdaşlıq, tərəfdaşlıq, qardaşlıq əlaqələrinin getdikcə daha da genişlənməkdə olduğunu diqqətə çatdırıb və Kərəm Kınıkın Beynəlxalq Qızıl Xaç və Qızıl Aypara Federasiyasının Avropa və Asiya zonası üzrə vitse-prezidenti seçiləndən sonra Azərbaycanın cəbhəyanı bölgələrinə səfər etməsini çox yüksək dəyərləndirib.
Türkiyə Qızıl Aypara Cəmiyyətinin prezidenti Kərəm Kınık ölkəmizə səfərinin onda xoş təəssürat oyatdığını bildirib, ikitərəfli dostluq və əməkdaşlıq əlaqələrinin hər iki təşkilatın fəaliyyət istiqamətlərinin inkişafındakı rolundan bəhs edib, gələcək əməkdaşlıq perspektivləri müzakirə edilib.
Görüşün yekununda xatirə hədiyyələri təqdim edilib, şəkillər çəkilib.
Beynəlxalq Qızıl Xaç və Qızıl Aypara Federasiyasının Avropa və Asiya zonası üzrə vitse-prezidenti, Türkiyə Qızıl Aypara Cəmiyyətinin prezidenti Kərəm Kınık Nazirlər Kabinetində Baş Nazirin müavini Əli Əhmədovla görüşüb. Görüşdə iki qardaş dövlətin arasındakı dostluq və qardaşlıq əlaqələri, Beynəlxalq Qızıl Xaç və Qızıl Aypara Cəmiyyətləri Federasiyası ilə Azərbaycan Qızıl Aypara Cəmiyyəti, eləcə də Türkiyə Qızıl Aypara Cəmiyyəti ilə əməkdaşlıq perspektivləri və digər məsələlər müzakirə edilib.
