Hamımız Prezident İlham Əliyevin keçən il iyulun 11-12-də Pakistan İslam Respublikasına dövlət səfərini, dost və qardaş ölkədə necə hərarətlə qarşılandığını xoş təəssüratlarla xatırlayırıq. Cari ilin fevralında isə Pakistanın Baş naziri Məhəmməd Şahbaz Şərif Azərbaycana dövlət səfəri etdi. Bu, son üç ildə Pakistanın Baş nazirinin ölkəmizə üçüncü səfəri idi və Bakıda dediyi sözləri bir daha yada salaq.
Məhəmməd Şahbaz Şərif fevralın 24-də mətbuata bəyanatla çıxış edərkən demişdi: "Pakistan həmişə Azərbaycanı Qarabağ məsələsində dəstəkləmişdir və əlhəmdülillah, Sizin baxışınız, cəsarətiniz və qətiyyətli qərarlarınız bu bölgədə sülhə gətirib çıxardı. Sabah mən Füzuliyə, ondan sonra isə dağlara, Şuşaya getməli idim. Lakin düşünürəm ki, mən qarın yağması ilə bir növ soyuq havanı dünən axşam hiss etdim. Biz belə qərara gəldik ki, yayda sizin gözəl ölkənizə konfransda iştirak etmək üçün gələcəyik, ikinci evimizə yenidən səfər edəndə biz birlikdə oranı ziyarət edəcəyik və Sizin möhtəşəm nailiyyətinizi yüksək dəyərləndirəcəyik".
"Saf arzu qanadlı, xoş niyyət yüyrək olar", - deyiblər. Yəni məqsədin aydın, diləyin səmimidirsə, onlara tez yetişərsən. Dost və qardaş Pakistanın baş nazirinin Qarabağa səfər etmək arzusu hələ dediyi vaxtdan da tez, yaydan əvvəl, yazda yerinə yetdi. Üstəlik, onun təyyarəsi mayın 27-də mübarək Laçın aeroportuna endi. Dövlətimizin başçısının burada Məhəmməd Şahbaz Şəriflə istər ikili formatda, istərsə də qardaş Türkiyənin Prezidenti Rəcəb Tayyib Ərdoğanla birgə - üçlükdə çoxsaylı görüşləri və söhbətləri oldu.
Laçında Prezidentimizin Məhəmməd Şahbaz Şəriflə məhdud tərkibdə görüşündə bu səfərin Pakistanın "Qarabağ Azərbaycandır!" mövqeyinin növbəti təsdiqinin ifadəsi olduğu vurğulandı. Ali qonaq Prezident İlham Əliyevin rəhbərliyi ilə Laçında və ətraf ərazilərdə qısa müddət ərzində həyata keçirilən bərpa və quruculuq işlərinin böyük təəssürat doğurduğunu dedi, bunlara görə dövlətimizin başçısını və Azərbaycan xalqını səmimi-qəlbdən təbrik etdi.
Təbii ki, ali səviyyədə görüşlərin bu dinamikası Azərbaycan-Pakistan əlaqələrinə, o cümlədən iqtisadi əməkdaşlığın genişlənməsinə və güclənməsinə böyük təkan verir. Azərbaycan Prezidentinin və Pakistanın Baş nazirinin iştirakı ilə bir neçə ay əvvəl imzalanmış sənədlərin mübadiləsi də göstərir ki, iki ölkə arasında iqtisadi əlaqələrin yeni səhifələri açılır. Müxtəlif sahələrdə əməkdaşlığın genişləndirilməsinə yol açan həmin sənədlər sırasında enerji sahəsinə aid olanlar da diqqət çəkir. Belə ki, Azərbaycan Respublikası Dövlət Neft Şirkəti (SOCAR) ilə "Frontier Works Organisation" (FWO) və "Pakistan State Oil Company Limited" şirkəti arasında Anlaşma Memorandumu mübadilə edildi. SOCAR-la mübadilə edilən daha bir sənəd "Pakistan Refinery Limited" (PRL) və "Pakistan State Oil Company Limited" şirkəti ilə Anlaşma Memorandumudur. "SOCAR Trading SA" ilə də sənədlər mübadilə edildi. Bunlar "Pakistan LNG Limited" arasında mayeləşdirilmiş təbii qaz yüklərinin alqı-satqısı ilə bağlı Çərçivə Sazişinə 1 nömrəli Əlavə, "Pakistan State Oil Company Limited" şirkəti ilə Anlaşma Memorandumu və "Pakistan State Oil Company Limited"lə neft məhsullarının uzunmüddətli alqı-satqı Sazişidir. Prezident İlham Əliyev dəfələrlə rəsmən bəyan edib ki, Azərbaycan Pakistanda müxtəlif layihələrə minimum 2 milyard dollar sərmayə yatırmağa hazırdır. Hədəflənən layihələr infrastrukturun inkişafını, energetikanı, mədən işini və digər sahələri əhatə edir. Bir sözlə, iqtisadi əlaqələrimiz getdikcə daha çox sahələri əhatə edərək genişlənməkdədir. Əməkdaşlıq enerji və infrastruktur layihələrini, informasiya texnologiyalarını, əczaçılıq, tekstil və digər sahələrə aiddir və həm bu, həm də digər sahələrdə əlaqələrin daha da güclənməsi üçün böyük potensial var. Ekolgiya sahəsində də həmrəyik. Təsadüfi deyil ki, ölkəmizin yaşıllıq ekspertlərindən ibarət heyəti İslamabadın abadlaşdırılmasında çalışır və şəhərin yaşıllaşdırılmasında, eləcə də landşaftla bağlı təqdirəlayiq işlər görür.
İqtisadi əməkdaşlığın genişləndirilməsinin, idxal-ixracın artmasının hər iki ölkəyə dividendlər gətirəcəyinə şübhə yoxdur. İdxal-ixracdan söz düşmüşkən, hədəfdə olan vacib məsələlərdən biri ticarət dövriyyəsinin artırılmasıdır. Bu barədə Məhəmməd Şahbaz Şərif hələ fevral ayında belə demişdi: "Təəssüf olsun ki, bu gün ticarətimiz 14 milyon dollara bərabərdir və bu, qətiyyən bizim siyasi səviyyədə olan münasibətlərimizi əks etdirmir. Bu gün biz artıq bəyan edə bilərik ki, sərmayələri qısa bir zamanda 2 milyard dollar səviyyəsinə çatdıracağıq. Bu, sadəcə, bəyanat deyil. Məsələn, Pakistandan idxal olunan "Basmati" düyüsünə Azərbaycanda əziz qardaşımın tapşırığına əsasən, tətbiq edilən rüsum aradan qaldırılıbdır və əminəm ki, Azərbaycanda istehsal olunan müəyyən məhsullar var ki, biz də onların Pakistanda satışını təşviq edə bilərik. Biz tarifləri aşağı sala bilərik. Bizim kommersiya nazirimiz burada əyləşibdir. Əlbəttə, maye qaz daha bir əmtəədir və bu məsələ də bizim ticarət gündəliyimizə daxil edilə bilər. Əlbəttə, JF17 hərbi qırıcı təyyarəmiz var və Azərbaycanla Pakistan həmin təyyarə ilə bağlı fəal işlər aparır... Biz gündəlik əsasda səylərimizi səfərbər etsək, 2 milyard dollar həcmində ticarət dövriyyəsinə nail ola bilərik".
Qeyd edək ki, Azərbaycanın Ticarət Palatasının İslamabadda nümayəndəliyi təsis olunub. Bu da ikitərəfli ticarətin inkişaf etməsinə imkan verəcək amillərdəndir. Laçında Prezidentimizin Məhəmməd Şahbaz Şəriflə məhdud tərkibdə görüşündə də Azərbaycanla Pakistan arasında iqtisadi-ticari əlaqələrin genişləndirilməsi və bir sıra digər sahələrdə əməkdaşlıq məsələlərinə dair geniş fikir mübadiləsi aparıldı. Azərbaycan Prezidentinin, Türkiyə Prezidentinin və Pakistanın baş nazirinin Zirvə görüşündə isə dövlətimizin başçısı dedi: "Siyasət, iqtisadiyyat, energetika, qarşılıqlı investisiyalar, nəqliyyat, müdafiə, kənd təsərrüfatı, informasiya texnologiyaları və digər sahələrdə əməkdaşlığın birgə layihələr və proqramlar vasitəsilə daha böyük sürətlə inkişaf edəcəyinə inanırıq. Azərbaycan Türkiyə iqtisadiyyatına 20 milyard ABŞ dollarından çox sərmayə qoyub, Pakistan iqtisadiyyatına 2 milyard ABŞ dolları qoymağa hazırdır. Hazırda konkret investisiya layihələri üzrə işlər gedir. Azərbaycan və Türkiyənin əməkdaşlığı nəticəsində yalnız bölgəmizin deyil, geniş coğrafiyanın enerji xəritəsi dəyişib... Bununla yanaşı, Azərbaycan və Türkiyədən keçməklə Asiya ilə Avropanı birləşdirən nəqliyyat yolları strateji əhəmiyyət daşıyır. Multimodal yük marşrutunun inkişafı yolu ilə Pakistanın da bu təşəbbüsdə yaxından iştirakının əməkdaşlığımıza daha da təkan verəcəyinə əminik".
İnam və əminlik olanda isə yüksəliş də, qələbə də olur!
Flora SADIQLI,
"Azərbaycan"
