Birinci vitse-prezident Mehriban Əliyevanın təbriki həm Ülviyyə, həm də digər Azərbaycan şahmatçılarına növbəti qələbələr üçün böyük stimul olacaq.
Bunu “Report”a açıqlamasında Azərbaycan Şahmat Federasiyasının (AŞF) prezidenti, FIDE-nin vitse-prezidenti Mahir Məmmədov deyib.
Qurum rəsmisi Azərbaycanın qadın şahmatçısı Ülviyyə Fətəliyeva Yunanıstanın Rodos şəhərində keçirilən Avropa çempionatının qalibi olması barədə danışıb: “Ülviyyəni təbrik edirəm. Böyük uğurdu. Biz Azərbaycanda dövlətin şahmata və şahmatçılara qayğısını hər an hiss edirik. Federasiya olaraq Gənclər və İdman Nazirliyi ilə sıx əməkdaşlıq edirik. Dünən Azərbaycanın Birinci vitse-prezidenti Mehriban xanım Əliyevanın təbriki bizi çox sevindirdi. Yunanıstandakı uğur Azərbaycan şahmatının növbəti qələbəsidi. Ülviyyənin gözəl üslubda Avropa çempionatında əldə etdiyi nəticə məntiqi prosesdi. Çünki Azərbaycan şahmatı artıq böyük uğurlara hazırdı. İki il əvvəl Ülviyyə bu yarışda bürünc medal əldə etmişdi. Həmin yarışda Günay Məmmədzadə ikinci olmuşdu. Ötən il ancaq təsadüf nəticəsində qadınlardan ibarət şahmat millimiz komanda yarışında Avropa çempionu ola bilmədi, ikinci yeri tutdu”.
M.Məmmədov qadın şahmatçıların hazırlıq prosesinə çox ciddi və intizamla yanaşdıqlarını bildirib: ”Federasiyanın cəlb etdiyi məşqçilərin tövsiyyələrinə həssas yanaşırlar. Bu amil şahmatçıların inkişafında vacib faktordu. Özləri üçün asan yol seçmirlər. Keçmişdə qazanılan uğurun üzərində dayanmırlar. Onlar gecə-gündüz işləyirlər. Ülviyyə həm şəxsi məşqçilər, həm də dəvət olunan mütəxəssislər - Mixail Şereşevski və Yevgeni Tomaşevski ilə hazırlaşıb. Son aylarda Vladimir Çuçelovla işləməkdə maraqlı olduğunu bildirmişdi. Biz bu istəyi reallaşdırdıq. Qadın şahmatçılarımız daha böyük qələbələrə layiqdilər. Ümumiyyətlə, son Avropa çempionatı çox uğurlu alındı. Səbinə İbrahimova birinci qrossmeyster xalı əldə etdi. Xanım Balacayeva sona qədər mübarizə apardı, 10-cu turda qalib gəlsəydi, ilk "beşlik"də yer alacaqdı”.
Qeyd edək ki, Ülviyyə Fətəliyeva Avropa çempionu titulunu qazanan Azərbaycanın ilk qadın şahmatçısı kimi tarixə düşüb. O, həmçinin millinin digər üzvü Günay Məmmədzadə ilə birgə 2025-ci ildə keçiriləcək Dünya Kubokunda iştirak etmək hüququ qazanıb.

“Azərbaycan”