NATO-nun silah və şəxsi heyətlə bağlı yeni hədəflərinə çatmaq üçün Almaniyanın 60 minə qədər əlavə hərbi qulluqçuya ehtiyacı olacaq.
AZƏRTAC xəbər verir ki, bu barədə müdafiə naziri Boris Pistorius bildirib.
“Biz hava hücumundan müdafiə sistemlərimizə sərmayə qoymalıyıq, uzaqmənzilli raketlərimizə sərmayə qoymalıyıq, manevr edə bilən quru qüvvələrimizə, idarəetmə və nəzarət sistemlərimizə sərmayə qoymalıyıq - bütün bunlar baş verməlidir”, - deyə o, jurnalistlərə bildirərək, bunun çox böyük investisiyalar tələb edəcəyini əlavə edib.
Pistoriusun sözlərinə görə, ümumilikdə Almaniya silahlı qüvvələrinə (Bundesver) bütün qoşun növləri üzrə təxminən 60 min əlavə əsgər tələb ediləcək. Bu o deməkdir ki, Almaniya silahlı qüvvələrinin gələcək sayı 250-260 min nəfər təşkil edəcək.
NATO Almaniyadan daha 7 ordu briqadası və ya təxminən 40 min əsgər təqdim etməsini xahiş edəcək. Lakin, on minlərlə əlavə əsgərin toplanması Berlin üçün böyük problem yaradacaq və çox güman ki, 2011-ci ildə ləğv edilmiş hərbi xidmətə çağırışın yenidən tətbiq edilib-edilməməsi ilə bağlı yeni müzakirələrə səbəb olacaq.
Müdafiə Nazirliyinin məlumatına görə, Bundesver hələ 2018-ci il üçün nəzərdə tutulan 203 min hərbçi hədəfinə çatmayıb və hazırda təxminən 20 min nəfərlik şəxsi heyət çatışmır.
Pistorius bildirib ki, hökumət tətbiq etməyi planlaşdırdığı könüllü hərbi xidmətin Bundesverin sıralarını doldurmaq üçün kifayət edib-etməməsinə qərar verməli olacaq. Bununla belə, o, xəbərdarlıq edib ki, ordu kazarma və təlimatçı çatışmazlığı səbəbindən hazırda daha çox çağırışçı qəbul edə bilmir.
jpeg_1766065291.jpeg)
