Vətən müharibəsinin
gedişatı göstərir ki, Azərbaycan ən qısa müddətdə Ermənistan üzərində qələbə qazanacaq.
Tezliklə torpaqlarımız işğaldan azad ediləcək, ərazi bütövlüyümüz təmin olunacaq.
Azərbaycan bayrağı Qarabağın hər yerində dalğalanacaq, tarixi ədalət bərpa ediləcək.
Bu günlərdə
dünya erməniliyi yenidən Azərbaycana qarşı informasiya müharibəsinə başlayıb. Hər
addımda ölkəmizə qara yaxmağa çalışırlar. Lakin Prezident İlham Əliyev bu informasiya
müharibəsində də düşməni darmadağın edir. İndiyədək dövlətimizin başçısı dünyanın
tanınmış KİV-inə verdiyi müsahibələrdə düşmənin saxta təbliğatına böyük zərbə vurub.
Ən əsası isə
odur ki, bu müsahibələr bir daha Azərbaycan Prezidenti - Silahlı Qüvvələrin Ali
Baş Komandanı İlham Əliyevin fitri istedadını, uzaqgörən müdrik siyasətini bütün
dünyaya nümayiş etdirdi. İlham Əliyev dərin zəkası, zəngin intellektual səviyyəsi
və yüksək mədəniyyəti ilə, dünyanın aparıcı telekanallarına, xüsusilə də əvvəlcədən
öyrədilib göndərilmiş qərəzli müxbirlərə böyük səbir və təmkinlə verdiyi cavabları
ilə əsl liderliyin nümunəsini ortaya qoydu.
Zəngin, siyasi
bilik tələb edən sərrast hazırcavablığı ilə dünyanın diqqətini özünə cəlb edən cənab
İlham Əliyev işğalçı Ermənistanın davamlı hərbi təcavüzünə məruz qalan Azərbaycanın
öz torpaqlarında beynəlxalq hüququn normalarını təmin etdiyini dünyaya göstərdi.
BMT TŞ-nin 30 ildir icra edə bilmədiyi məlum 4 qətnaməsinin tələblərini yerinə yetirdiyini
və bu haqlı mübarizədə müharibə qaydalarını pozmadığını, ermənilərdən fərqli olaraq
dinc əhaliyə təhlükə yaratmadığını bildirərək, işğalçı Ermənistanı faktlarla dünya
ictimaiyyətinin gözü qarşısında ifşa etdi.
Sosializm
sisteminin süqutuna səbəb olan kapitalizmin baş ideoloqu, yeni dünya nizamının əsasnaməsi
sayılan məşhur "Texnotron era” adlı kitabın
müəllifi, siyasi və dövlət xadimi Zbiqnev Bjezinski Ulu Öndər Heydər Əliyev haqqında
bəhs edərkən demişdir: "Heydər Əliyevin ölümü ilə dünya siyasətində bir boşluq yarandı!”
Ancaq dünyada gedən ictimai-siyasi proseslər onu göstərir ki, əgər o, sağ olsaydı,
yəqin deyərdi ki, cənab İlham Əliyevin simasında o boşluq artıq dolmuşdur...
Dağlıq Qarabağ
ətrafında cərəyan edən bütün hadisələri əvvəldən-axıra qədər bizdən də çox izləyən
və həqiqətləri beynəlxalq ictimaiyyətdən gizlədən, erməni feyklərinin yayılmasına
dəstək verən, açıq şəkildə onları müdafiə edərək ədalətsiz qərarlar qəbul edən ermənipərəst
siyasi mərkəzlərin hücumlarına sinə gərmək asan məsələ deyil. Ancaq İlham Əliyev
onların Dağlıq Qarabağ həqiqətləri ətrafında yaratdıqları 30 illik informasiya blokadasını
darmadağın etdi. Əsrlərdir ki, ermənilərin özləri haqqında dünyada yaratdıqları
mifi darmadağın etmək və onları heç vaxt olmadığı kimi beynəlxalq ictimaiyyətin
gözündən salmaq, doğrudan da, iti zəka, fitri istedad, müdrik zəngin siyasi bilik
və hünər tələb edir. İlham Əliyev bunu böyük ustalıqla, yüksək peşəkarlıqla bacardı
və reallıqları dünyaya çatdırdı.
Qədirbilən
müdrik Azərbaycan xalqı bu günlərdə öz liderini bir daha yaxından tanıdı. Bütün
Azərbaycan xalqı bir yumruq kimi rəhbərinin ətrafında birləşdi. Azərbaycan tarixində
misli-bərabəri görünməyən, müharibədə qələbəmizə zəmanət verən və heç vaxt sarsılmayacaq
bugünkü möhtəşəm ümumxalq birliyi yarandı! Vətənini və xalqını sevən bütün Azərbaycan
xalqı bir nəfər kimi cənab İlham Əliyevin, el dili ilə desək, başına and içir. Bu,
hamımızı qələbəmiz qədər sevindirir.
Unutmamalıyıq
ki, cənab İlham Əliyev ən azı beş cəbhədə vuruşur. Birinci - döyüş cəbhəsində, ikinci
- informasiya cəbhəsində, üçüncü - siyasət
meydanında, dördüncü - "beşinci kalon”un
tör-töküntüləri ilə, beşinci - dost kimi
görünən düşmən qüvvələrlə... İlham Əliyev bu cəbhələrin hamısında həmişə qalibdir.
Çünki Azərbaycan Prezidenti haqqın, ədalətin, sülhün, humanizmin tərənnümçüsüdür.
Bu gün Azərbaycan
xalqı xoşbəxtdir ki, onun Prezidenti Ulu Öndər Heydər Əliyev siyasi kursunu davam
etdirən, vətəni və xalqını canından, qanından və bütün varlığından artıq sevən cənab
İlham Əliyevdir. Zahirən kiçik görünən və
daxilən həddən artıq ağır olan bu müharibədə qələbəmizin müəllifi də möhtərəm Prezidentimizdir.
Onu göz bəbəyi kimi qorumağa borcluyuq!
Yaşasın müdrik
Azərbaycan xalqı! Yaşasın əvəzedilməz Ali Baş Komandan cənab İlham Əliyev! Yaşasın
şanlı Azərbaycan Ordusu! Yaşasın bir millət, iki dövlət - Azərbaycan-Türkiyə! Qoy
ədalət zəfər çalsın! Qarabağ Azərbaycandır!
Həsən ŞİRİNOV
