Aİ Azərbaycanı Avropa üçün önəmli hesab edir

Prezident İlham Əliyevin "Avropa Siyasi Birliyi"nin 6-cı Zirvə toplantısına dəvəti ölkəmizin Avropa İttifaqı ilə münasibətlərində yeni mərhələyə qədəm qoymasının göstəricisidir. Dövlət başçısının apardığı müstəqil xarici siyasət ölkəmizə olan inamı, etimadı daha da artırıb.

Bakı Dövlət Universitetinin kafedra müdiri,  professor Kamilə Əliyeva bununla bağlı qəzetimizə açıqlamasında bildirib ki, Azərbaycan öz gücünə ərazi bütövlüyünü və suverenliyini bərpa etdikdən sonra bir sıra Avropa dövlətləri və siyasətçiləri ölkəmizin beynəlxalq hüquqa söykənən bu hərəkəti ilə razılaşa bilmirlər: "Dövlətimizin başçısı dəfələrlə qeyd edib ki, vaxt gələcək, Azərbaycana qarşı olan dövlətlər və siyasətçilər peşman olacaqlar. Səfər çərçivəsində Prezident İlham Əliyevlə görüşə can atan həmin siyasətçilərin həm də peşmanlığını müşahidə etdik. Başda Fransa olmaqla əvvəllər Azərbaycana qarşı olan dövlətlər artıq Prezident İlham Əliyevin Cənubi Qafqaz regionunda yaratmış olduğu reallığı qəbul edir, müstəqil siyasət yürüdə bilməyən, böhran içərisində olan Ermənistana görə Azərbaycanla iqtisadi, siyasi əlaqələri korlamaq istəmirlər. Fransa Prezidenti Makronun qeyri-rəsmi görüşdə Prezident İlham Əliyev ilə səmimi münasibət qurmağa çalışması bunun əyani təsdiqidir. Dövlət başçısı Qərbin Azərbaycana qarşı yürütdüyü siyasətin yanlış olduğunu avropalı siyasətçilərə sübut edib".

Siyasi şərhçi bildirib ki, Azərbaycan Avropanın enerji təhlükəsizliyində mühüm rol oynayan ölkə olmaqla yanaşı, Avropa ilə Asiya arasında kommunikasiya yaradan, birləşdirən bir dövlətdir. Artıq Avropa İttifaqı Azərbaycanın Avropa üçün önəmli və güclü bir ölkə olduğunu qəbul edir. Bu ilin əvvəlindən başlayaraq Avropa İttifaqı Azərbaycanla münasibətlərin normallaşdırılması və inkişaf etdirilməsi istiqamətində addımlar atmağa başlayıb. Yanvar ayında Avropa İttifaqı Şurasının prezidenti Antonio Koşta Prezident İlham Əliyevə zəng edərək Aİ ilə Azərbaycan arasında bir çox məsələdə münasibətlərin möhkəmləndirilməsi haqqında müzakirələr aparıb. Aprel ayında isə Avropa İttifaqının xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallas Azərbaycana səfər edib və Prezident İlham Əliyev ilə görüşüb. Yaxın günlərdə isə Albaniyanın paytaxtı Tiranada keçirilən "Avropa Siyasi Birliyi"nin 6-cı Zirvə toplantısında Prezident İlham Əliyev Antonio Koşta ilə görüşdü və bu görüşdə Avropa Komissiyasının prezidenti Ursula fon der Lyayen də iştirak etdi. Hər iki siyasətçi Azərbaycanın Avropa İttifaqı üçün vacib və etibarlı tərəfdaş ölkə olduğunu vurğuladı. 

K.Əliyeva qeyd edib ki, bu Zirvə görüşündə Prezident İlham Əliyevin yüksək səviyyədə qarşılanması, Avropa dövlət başçılarının və Avropa İttifaqının rəhbər şəxslərinin dövlət başçımızla görüşməyə böyük səy göstərməsi Azərbaycana və dövlətimizin başçısına olan yüksək hörmət və ehtiramın nümunəsidir.

Ə.QARDAŞXANOVA,

"Azərbaycan"