Avropa İttifaqı ABŞ-nin Beynəlxalq Cinayət Məhkəməsinin (BCM) dörd nümayəndəsinə sanksiya tətbiq etmək qərarına görə “dərin təəssüf” ifadə edib.
Bu barədə Aİ-nin Xarici Əlaqələr və Təhlükəsizlik Siyasəti üzrə ali nümayəndəsi Kaya Kallas Avropa Xarici Fəaliyyət Xidmətinə (EEAS) istinadən məlumat verib.
Kallas, BCM-nin beynəlxalq ədalətin və cəzasızlıqla mübarizənin “məhək daşı” olduğunu, ən ağır cinayətlərə görə məsuliyyət daşıyanların məsuliyyətə cəlb edilməsini təmin etdiyini və qurbanların səsini eşitdiyini vurğulayıb.
Avropa diplomatiyasının rəhbəri qeyd edib ki, Aİ məhkəməyə “güclü dəstək” verməkdə davam edir və xəbərdarlıq edib ki, Vaşinqtonun iki prokuror müavini və iki hakimə qarşı sanksiyaları prokurorluğun işinə və davam edən araşdırmalara mənfi təsir göstərə bilər.
O, BCM-nin müstəqil və qərəzsiz fəaliyyət göstərməsinin vacibliyini vurğulayaraq, məhkəməyə, onun seçilmiş nümayəndələrinə, əməkdaşlarına və tərəfdaşlarına qarşı hücum və təhdidlərin “qəbuledilməz” olduğunu bildirib.
Ali Nümayəndə Aİ-nin BCM-ni və onun əməkdaşlarını xarici təzyiq və təhdidlərdən qorumaq öhdəliyini təkrarlayıb və bütün dövlətləri həbs qərarlarını dərhal icra etmək və könüllü sazişlər bağlamaq da daxil olmaqla, məhkəmə ilə tam əməkdaşlığa çağırıb.
Kallas həmçinin qeyd edib ki, Brüssel Prezident Donald Trampın sanksiya sərəncamının təsirini yaxından izləyir və mümkün gələcək addımları qiymətləndirəcək.
Avqustun 20-də ABŞ-nin dövlət katibi Marko Rubio bəyan edib ki, prezident Trampın sərəncamına əsasən, BCM-nin dörd məmuru “İsrailə qarşı mövqelərinə görə” sanksiyaya məruz qalıb. Onların arasında hakimlər Kimberli Prost və Nicola Giyu, həmçinin prokuror müavinləri Nazhat Şamim Xan və Mam Mandiaye Nianq var.
Rubionun sözlərinə görə, bu şəxslər “ABŞ və İsrail vətəndaşlarını öz dövlətlərinin razılığı olmadan araşdırmaq, həbs etmək və ya mühakimə etmək məqsədi daşıyan ICC fəaliyyətlərində birbaşa iştirak ediblər”. O, BCM-ni “milli təhlükəsizliyə təhdid” və “ABŞ və onun müttəfiqi İsrailə qarşı hüquqi müharibə aləti” adlandırıb.
Rizvan CƏFƏROV,
“Azərbaycan”
