Antiazərbaycançı qüvvələrin tapşırıqlarını həyata keçirən radiostansiya ölkəmizə qarşı düşmənçilik kampaniyası aparır
Müstəqil, azad siyasət yürüdən ölkələrə, xalqlara qənim kəsilən "Azadlıq" radiostansiyası antiazərbaycançı qüvvələrin meydan suladığı platformaya çevrilib. Qərəzsizlik və obyektivlik kimi jurnalistikanın əsas meyarlarını ayaqlar altına atan bu "media orqanı" Azərbaycana qarşı açıq-aşkar düşmənçilik kampaniyası aparır, başdan-başa yalan, iftira, həqiqəti əks etdirməyən "süjetlər" hazırlayır, "rəy sorğuları" keçirir, "araşdırmalar" aparır.
Ölkəmizi beynəlxalq nüfuzdan salmaq, onun imicinə zərbə vurmaq üçün qərəzli Qərb təsisatlarından - yəni ağalarından aldığı tapşırıqları yerinə yetirir.
Adı azadlıq, amma özü azad olmayan bu radiostansiyanın antiazərbaycançı şəbəkədən aldığı son tapşırığı isə ölkəmizdə keçirilən prezident seçkilərinə kölgə salmaqdan ibarətdir. Buna görə də xüsusilə bu ərəfədə daha da aktivlik göstərərək, bir-birinin ardınca faktları təhrif edən, Cənubi Qafqazdakı reallıqları əks etdirməyən yalan və böhtan üzərində qurulmuş verilişlərini işə salıb.
Bu radio qarayaxma kampaniyası aparır
Öz gücünə suverenliyini, ərazi bütövlüyünü tam təmin etmiş Azərbaycana qarşı çirkin vasitələrlə təsir göstərmək istəyən bəzi Qərb ölkələrinin və qurumlarının mənfur əməllərinə media resurslarını qoşmaları birinci dəfə deyil. Həmin media qurumları arasında yer alan "Azadlıq" radiosu hələ 44 günlük Vətən müharibəsi dövründə, eləcə də 23 saatlıq antiterror tədbirləri zamanı da yalnız Azərbaycanı ittiham etməklə məşğul olur, baş verənləri tamamilə yanlış şəkildə çatdırırdı. Radiostansiyada Azərbaycanın torpaqlarını 30 illik erməni işğalından azad etməsi, bayrağını bütün sərhədboyu dalğalandırması, Qarabağda separatizmin kökünü kəsərək suverenliyini tam təmin etməsi tamamilə yanlış yöndə qələmə verilirdi. Sanki Azərbaycan işğala məruz qalmamış, yüz minlərlə azərbaycanlı yurdundan didərgin salınmamışdı...
Bir sözlə, bütün dövrlərdə erməni lobbisinin maraqlarını güdən, onun ağzı ilə danışan "Azadlıq" radiosu hazırda da böhtan xarakterli, həqiqəti əks etdirməyən informasiyalar paylaşaraq Azərbaycana qarşı qarayaxma kampaniyası aparır.
Elə bu "media resursu"nun son günlər apardığı "iqtisadi araşdırmalar"a, keçirdiyi "rəy sorğuları"na diqqət etdikdə də aydın görünür ki, radio Azərbaycanla bağlı feyk xəbərlər yaymaqla məşğuldur.
Qeyri-dəqiq və yanlış müqayisə
Məsələn, radio Cənubi Qafqaz ölkələrində büdcə xərclərinin vəziyyətinə dair yaydığı məlumatda Azərbaycanla bağlı qeyri-dəqiq və yanlış müqayisə aparıb ki, onlar qətiyyən həqiqəti əks etdirmir.
Radio Cənubi Qafqaz ölkələrində büdcə xərclərinin vəziyyətinə dair yaydığı məlumatda iddia edir ki, guya Azərbaycan bölgə ölkələri içərisində adambaşına düşən büdcə xərclərinə görə sonuncudur.
Ümumiyyətlə, Ermənistanın bütün sahələrdə, o cümlədən sosial-iqtisadi sahədə böhran yaşadığı hər kəsə bəllidir. Gürcüstanın da bütün göstəricilərə görə Azərbaycandan çox geridə olması danılmaz faktdır. Bu baxımdan həmin iki ölkənin iqtisadi cəhətdən Azərbaycandan irəlidə olmasını iddia etmək, sadəcə, gülüş doğurur.
"Azadlıq" radiosu Qərbdən aldığı tapşırığa əsasən, bütün çirkin yollarla, böhtan, yalan və iftiralarla Azərbaycanı sonuncu kimi göstərmək istəyir, amma beynəlxalq reytinq təşkilatlarının hazırladıqları illik hesabatlarda da əksini tapıb ki, Azərbaycan ən islahatçı ölkə kimi ilk onluqda yer alıb. Yəni görünən kəndə bələdçi lazım deyil...
"Azadlıq" radiosu Azərbaycanda keçirilən prezident seçkiləri ərəfəsində ölkəmizlə bağlı xeyli sayda uydurma, iftira dolu məlumatlar yaydı, heç bir sosioloji normalara uyğun olmayan "sorğular" keçirdi və yalnız feyk məlumatlar yaymaqla məşğul oldu və bununla da ölkəmizə qarşı qərəzini bir daha nümayiş etdirdi.
Ancaq Qalib Azərbaycanı milli mənafeyinin təminindən heç zaman döndərə bilməyən qərəzli xarici ölkə və təşkilatlar, onlara alət olan "Azadlıq" kimi media qurumları da yaxşı bilirlər ki, ölkəmizin uğurlarına yalan və iftiraları ilə heç zaman kölgə sala bilməyəcəklər.
Azərbaycan bütün parametrlər üzrə Cənubi Qafqazın lider ölkəsidir və milli maraqlarını təhdid edən bütün güclərə qarşı layiqli mübarizə aparmaq qüdrətindədir. Buna görə də yaxşı olar ki, "Azadlıq" radiosu Qərb ağalarına güvənərək ölkəmizə qarşı iftiralardan, feyk xəbərlərdən ibarət biabırçı verilişlərini, qul fəaliyyətini dayandırsın...
Yasəmən MUSAYEVA,
"Azərbaycan"
