Dünya İqtisadi Forumu ilə birgə icra olunan “Tradetech” layihəsinin Azərbaycan üzrə strateji nəticələrinin təqdimatı keçirilir.
AZƏRTAC xəbər verir ki, tədbirdə çıxış edən İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin (4SİM) icraçı direktoru Fariz Cəfərov Mərkəz və layihə barədə məlumat verib.
Fariz Cəfərov qeyd edib ki, 4SİM-in fəaliyyəti çərçivəsində Dünya İqtisadi Forumu (WEF) ilə sıx əməkdaşlıq həyata keçirilir. Bugünkü tədbir ötən ildən başlamış böyük bir layihənin bəhrəsidir və bu prosesdə 28-dən çox tərəf, o cümlədən müxtəlif dövlət qurumları və özəl təşkilatlar aktiv iştirak ediblər.
“Mərkəz olaraq əsas rolumuz texnoloji yeniliklər sahəsində dövlət qurumları, özəl sektor, akademiya və beynəlxalq təşkilatlar arasında körpü rolunu oynamaq, koordinasiyanı təmin etməkdir”, – deyə icraçı direktor vurğulayıb.
Mərkəzin rəhbəri 2021-ci ildə dövlət başçısının müvafiq Fərmanı ilə yaradılan 4SİM-in ötən dövr ərzində gördüyü işlər barədə məlumat verib. Bildirilib ki, qurum ölkənin sosial-iqtisadi inkişaf strategiyası (2022-2026), rəqəmsal iqtisadiyyatın inkişafı strategiyası və digər normativ sənədlərin hazırlanmasında yaxından iştirak edir.
“Hazırda əsas diqqət yetirilən sahələr sırasına bunlar daxildir - “RegTech” və E-ticarət:Ticarət və tənzimləmə texnologiyaları sahəsində araşdırmaların aparılması və hökumətə müvafiq təkliflərin təqdim edilməsi, süni intellekt texnologiyalarının dövlət xidmətlərində və çağrı mərkəzlərində tətbiqi üzrə pilot layihələrin icrası. Eləcə də vahid platformalar - sahibkarlar üçün "One Stop Shop" (Vahid pəncərə) onlayn platformasının inkişaf etdirilməsi”, - deyə F.Cəfərov əlavə edib.
Tədbirdə Dünya İqtisadi Forumunun nümayəndələrinin də təqdimatla çıxış edəcəyini deyən F.Cəfərov, beynəlxalq tərəfdaşlarla birgə hazırlanan metodologiyaların Azərbaycan iqtisadiyyatının rəqabətqabiliyyətliliyini artıracağını qeyd edib. O, prosesdə rəy və təklifləri ilə iştirak edən bütün tərəfdaşlara təşəkkürünü bildirib.
Qeyd olunub ki, tədbir Azərbaycanda ticarət texnologiyalarının cari vəziyyəti, istifadəsi, ehtiyaclarla bağlı öyrənilənləri maraqlı tərəflərə çatdırmaq və bu texnologiyaların istifadəsini təşviq etmək məqsədilə aparılmış təhlilin nəticələrinin aidiyyəti hədəf qruplarının iştirakı ilə vörkşopda işıqlandırılması, eləcə də tədbir iştirakçılarının infrastruktur, ekosistem və insan kapitalı üzrə tövsiyələrin formalaşdırılması və yekun hesabat sənədinə əks olunması məqsədi daşıyır.
jpg_1779004358.jpg)
