Qazaxın azad edilən 4 kəndində yaradılan sərhəd zastavaları ölkəmizin etibarlı müdafiə halqasıdır
Vətən müharibəsindəki Şanlı Zəfərimizdən sonra yaranan yeni reallıqlardan biri də ölkəmizin sərhəd toxunulmazlığının təminatıdır.
Prezident İlham Əliyevin yeni dövr üçün müəyyənləşdirdiyi inkişaf konsepsiyasında ən başlıca məqamlardan biri sərhədlərimizin qorunmasıdır. Çünki Azərbaycanın qələbəsini həzm edə bilməyən, uğurlarına sevinməyən dairələr ölkəmizin daxilində öz çirkin ssenarilərini həyata keçirmək və sabitliyi pozmaq üçün bütün vasitələrə əl atırlar.
Hətta bunu Azərbaycanın uğurla evsahibliyi etdiyi COP29 ərəfəsində nə qədər gerçəkləşdirməyə çalışsalar da, bütün planlar bumeranq effekti verdi. Dünya bir daha Azərbaycanın nəyə qadir olduğunu gördü.
Prezident İlham Əliyev bütün çıxışlarında suverenliyini tam təmin etmiş Azərbaycanın sərhədlərinin toxunulmazlığı məsələsinə xüsusi olaraq diqqət çəkir və bununla bağlı çox ciddi tapşırıqlarını verir. Ölkəmizin sərhədləri elə qorunmalıdır ki, ən kiçik təhlükə belə yaşanmasın. Məhz bu səbəbdən də Azərbaycan sərhədlərinin mühafizəsini təşkil edən Dövlət Sərhəd Xidmətinin üzərinə böyük məsuliyyət düşür.
Müzəffər Ali Baş Komandanın rəhbərliyi altında Dövlət Sərhəd Xidməti ən müasir hərbi texnika və avadanlıqlarla təmin olunur. Yeni sərhəd zastavaları tikilir, müasir infrastruktur yaradılır, sərhədçilərin peşəkarlığı artırılır, onların müasir qaydalara uyğun fəaliyyəti üçün böyük tədbirlər görülür. Sərhədçilər yaxşı bilirlər ki, sərhəd hər bir dövlətin rəmzidir, müstəqil dövlətin mühüm amillərindən biridir və onlar Müzəffər Ali Baş Komandanın əmrinə uyğun olaraq sərhədlərimizi göz bəbəyi kimi qoruyurlar. Bunun nəticəsidir ki, Azərbaycanda sabitlik var, ictimai-siyasi asayiş hökm sürür.
Bir sözlə, ölkə daxilində təhlükəsizliklə bağlı heç bir problem yoxdur. Kənardan Azərbaycana təxribat məqsədilə gəlmək istəyən qüvvələrin qarşısı alınıb. Ölkə əhalisinin təhlükəsizliyi təmin olunub.
Ermənistan və Gürcüstanla olan sərhədlərimizin hər bir qarışı termal kameralarla izlənilir
Dövlət Sərhəd Xidmətinin təşkilatçılığı ilə Sərhəd Qoşunları Komandanlığının "Şəmkir" Sərhəd Dəstəsinin və "Qazax" Əlahiddə Sərhəd Diviziyasının xidməti ərazisinə təşkil edilən mediatur zamanı bir daha yuxarıda söylədiyimiz fikirlərə əyani şahidlik etdik.
"Şəmkir" Sərhəd Dəstəsinin fəaliyyəti ilə tanışlıqdan sonra təhlükəsizlik tədbirlərinə riayət etməklə Qazax rayonunun işğaldan azad edilmiş ərazilərinə və şərti dövlət sərhədinə dislokasiya olunan bölmələrdə və sərhəd-döyüş məntəqələrində yaradılan şəraitlə tanış ola bildik. Şəmkirdən yola çıxıb bir neçə dəqiqəyə Dövlət Sərhəd Xidmətinin Sərhəd Qoşunlarının "Qazax" Əlahiddə Sərhəd Diviziyasına yetişdik.
Xatırladaq ki, 2023-cü il avqustun 7-də Prezident İlham Əliyev Qazax rayonuna səfəri çərçivəsində Dövlət Sərhəd Xidmətinin Sərhəd Qoşunlarının "Qazax" Əlahiddə Sərhəd Diviziyasında yaradılan şəraitlə tanış olmuşdur. 20,5 hektar ərazini əhatə edən hərbi hissə kompleksinə qərargah binası, 5 binadan ibarət 146 mənzilli yaşayış kompleksi, yeməkxana, hamam, camaşırxana və tibb məntəqəsindən ibarət əsgər yataqxanası, şəxsi heyətin xidmətinin yüksək səviyyədə aparılması üçün lazımi şəraitlə təmin edilmiş iş otaqları daxildir. Bununla yanaşı, kompleksin ərazisində helikopter meydançası, hərbi texnikaların saxlanması üçün avtomobil parkı, avtomobil yuma və yanacaqdoldurma məntəqələri, silah, ərzaq və əşya-geyim anbarları, içməli su anbarı, qazanxana binası mövcuddur.
Kompleksin idman şəhərciyində hərbi qulluqçuların idmanla məşğul olmaları üçün zəruri avadanlıq quraşdırılıb və voleybol meydançası yaradılıb. İstilik sistemi, daimi su və elektrik enerjisi ilə təmin edilən kompleksdə ehtiyat generatorlar quraşdırılıb. Ərazidə əsaslı tikinti-abadlıq işləri aparılıb, 23 min kvadratmetr sahə asfaltlanıb, geniş yaşıllıq salınıb, ağaclar əkilib.
Xidmətin yüksək səviyyədə aparılması, şəxsi heyətin döyüş qabiliyyətinin təkmilləşdirilməsi, peşəkar vərdişlərinin daha da inkişaf etdirilməsi üçün hərtərəfli şərait yaradılıb.
Burada jurnalistlərə "Qazax" Əlahiddə Sərhəd Diviziyasının xidməti istifadəsinə verilmiş silah arsenalı, döyüş texnikaları, yüksəkkeçidli nəqliyyat vasitələri, zirehli və avtomobil texnikası, tibb avtomobilləri nümayiş etdirildi.
Diviziyada yaradılan müşahidə məntəqəsindən isə Qazax rayonu boyu bütün sərhəd zastavalarındakı durumu müşahidə və müxtəlif komandalarla idarə etmək də mümkündür. Müasir standartlara uyğun HTC tipli kameralarla təchiz olunmuş mərkəzdə Ermənistan və Gürcüstanla olan sərhədlərimizin hər bir qarışı diqqətlə izlənilir.
Həyəcan siqnalı - dronlar havaya qalxır, sərhədçilər itlər və atlarla hərəkətə başlayırlar
Diviziyada yaradılan şəraitlə tanışlıqdan sonra bir güllə atılmadan işğaldan azad edilən Qazaxın kəndlərində yaradılan sərhəd xidmətinin fəaliyyəti ilə maraqlanmaq üçün yola düşürük.
Xatırladaq ki, bu ilin mayında Dövlət Sərhəd Xidməti tərəfindən nəzarətə götürülən Qazax rayonunun Bağanıs Ayrım, Aşağı Əskipara, Xeyrımlı və Qızılhacılı kəndlərində Azərbaycanın Dövlət Bayrağı ucaldılıb, Dövlət himni oxunub.
Bizim də ilk istiqamətimiz Babəkər yüksəkliyidir. O yüksəklik ki, həm Gürcüstan, həm də Ermənistanla sərhəddir.
Zastavaya çatan kimi komandanlıq tərəfindən həyəcan siqnalı verildi. Şərti sərhəd pozucularının zərərsizləşdirilməsi əməliyyatını müşahidə etdik. Sərhədçilərimiz xüsusi itlər və atlarla hərəkət edərək qısa zamanda sərhəd pozucularını yaxalayırlar. Onlara bu işdə havadan müşahidəçilik edən dronlar da yardım edir.
Məlumat verildi ki, son dövrdə dövlət sərhədini 10-20 kilometr məsafədə həm gecə, həm də gündüz mühafizə edə biləcək müasir kameraların tətbiqinə başlanılıb. Eləcə də sərhəd pozucuları aşkarlanarkən, sərhəd axtarışı həyata keçirilərkən həmin müasir dronlardan istifadə olunur. Həmçinin çətin relyef şəraitində sərhəd naryadlarının rahat hərəkət edə bilmədiyi istiqamətlərdə "KS-205" tipli sistemlər vasitəsilə sərhəd pozucuları aşkarlanaraq dərhal yaxalanır.
Sərhəd pozucularına qarşı silahın tətbiqi son vasitədir. Sərhəd pozucuları dövlət sərhədini qeyri-qanuni pozmağa cəhd göstərdikdə, sərhəd naryadlarına silahlı müqavimət göstərdikdə, eləcə də digər təhlükəli hallarda sərhəd naryadı tərəfindən silah tətbiq olunur.
Ermənistanla sərhəddə dalğalanan bayrağımız düşmənə gözdağı verir
"Babəkər" Sərhəd Zastavasının fəaliyyəti ilə tanış olduqdan sonra Qazax rayonunun işğaldan azad olunan Xeyrımlı kəndinə yola düşürük.
Bu kənddə DSX-nin Sərhəd Qoşunlarının hərbçiləri xidmət göstərir. Bir neçə metr irəlidə delimitasiya olunmuş Azərbaycan-Ermənistan sərhədi görünür.
Zastavanın xidmət göstərdiyi ərazidə üçrəngli bayrağımız dalğalanır. Buradan qarşı tərəf daim müşahidə altında saxlanılır. Hər hansı bir hərəkətlənmə qeydə alınarsa, dərhal aidiyyəti üzrə məruzə edilir.
Əvvəllər Ermənistan silahlı bölmələri bu yüksəkliklərdə oturub Məzəm kəndini atəş altında saxlayır, tez-tez təxribatlar törədirdilər. İndi üçrəngli bayrağımız düşmənə gözdağı verir. Zastavada əsgərlər üçün hər cür şərait yaradılıb. Kazarma, anbarlar, istirahət otaqları və sairə.
Modul tipli vasitələrdən ibarət zastavanın yerində gələcəkdə böyük binalar inşa edilə bilər. Dövlət Sərhəd Xidmətinin (DSX) Sərhəd Qoşunlarının komandanı general-leytenant Araz Məmmədov bizimlə söhbətində bildirdi ki, gələn il Qazaxın yeni işğaldan azad olunan Xeyrımlı, Aşağı Əskipara, Bağanıs Ayrım və Qızılhacılı kəndlərində yeni zastavaların inşa edilməsi planlaşdırılır.
Mediaturun son ünvanı "Avey" Sərhəd Zastavası oldu.
Zastavanın xidmət göstərdiyi ərazidə üçrəngli Azərbaycan bayrağı dalğalanır. Buradan qarşı tərəf daim müşahidə altında saxlanılır. Hər hansı bir hərəkətlənmə qeydə alınarsa, dərhal aidiyyəti üzrə məruzə edilir. Burada qədim alban məbədi də sərhədçilərimiz tərəfindən qorunur.
Dövlət Sərhəd Xidmətinin Sərhəd Qoşunlarının hərbi qulluqçusu, polkovnik-leytenant Elnur Abdullayev dedi ki, sərhədçilər xidmət etdikləri ərazidə mədəni abidələri, flora və faunanı da qoruyurlar: "Bu kəndlərdə hazırda sərhədçilər xidməti yüksək səviyyədə təşkil edir. Eyni zamanda sərhədçilər xidmət etdikləri ərazidə mədəni abidələri, flora və faunanı da qoruyurlar. "Avey" Dövlət Tarix-Mədəniyyət Qoruğu yeddinci əsrdə tikilib. Bu qoruq Qazax rayonunun Daşsalahlı kəndində yerləşir. Qoruq DSX-nin Sərhəd Qoşunları və Mədəniyyət Nazirliyi tərəfindən qorunur. Hazırda yerləşdiyimiz yüksəklik Subsaksiz yüksəliyi adlandırılır".
Burada xidmət çəkən sərhədçilərimizlə həmsöhbət olduq. Sərhədçilər onlar üçün yaradılan şəraitdən məmnunluqlarını ifadə edərək ərazi bütövlüyü və suverenliyi tam təmin edilən ölkəmizin sərhədlərinin keşiyində alnıaçıq, başı dik, ayıq-sayıq xidmət etməkdən qürur duyduqlarını bildirirlər.
Vətənin mühafizə xəttini təşkil edən Sərhəd Qoşunlarında yaradılan şərait hər birimizdə xoş təəssürat yaradır. Əmin olursan ki, hava şəraitindən asılı olmayaraq, gecə-gündüz sərhədlərimizin keşiyini çəkən Dövlət Sərhəd Xidmətinin Sərhəd Qoşunları sanki bir qalxandır. Ölkəmizin strateji maraqlarını qoruyan strateji qurumlardan biridir. Sərhəd Xidmətinin hərbi qulluqçuları ölkəmizin qapılarını qoruyan ən önəmli qəhrəmanlardır.
Onlar ölkəmizin müdafiə halqasıdır...
Onlar daim ayıq-sayıq Vətən keşikçisidirlər...
Onlar sülh və təhlükə arasında duran gözəgörünməz güvən divarıdır.
Dövlət Sərhəd Xidmətinin təşkil etdiyi budəfəki mediaturda iştirak edən hər kəs bir daha bütün bunlara canlı şahidlik etdi. Bir daha əmin olduq ki, Vətən sərhədləri etibarlı əllərdədir. Prezident İlham Əliyevin qarşıya qoyduğu strateji tapşırıq uğurla icra olunur.
Rəşad BAXŞƏLİYEV,
"Azərbaycan"
Bakı-Şəmkir-Qazax-Bakı
