Azərbaycanın Müstəqillik Günü Batumi şəhərində təntənəli şəkildə qeyd olunub.
AZƏRTAC xəbər verir ki, Azərbaycanın Batumidəki Baş Konsulluğunun təşkilatçılığı ilə keçirilən rəsmi tədbirdə Acarıstan Muxtar Respublikasının Ali Şurasının sədri, nazirlər, Türkiyə və İranın baş konsulları, Batumidəki diplomatik korpusun təmsilçiləri, Azərbaycan və gürcü ictimaiyyətinin nümayəndələri iştirak ediblər.
Əvvəlcə Azərbaycanın və Gürcüstanın dövlət himnləri səsləndirilib.
Sonra Azərbaycanın Batumidəki Baş konsulu Fuad Əzizov Azərbaycan xalqının müstəqillik uğrunda mübarizə tarixindən danışıb, bu mübarizənin 1918-ci ildə müsəlman Şərqində ilk demokratik respublikanın yaranması ilə nəticələndiyini qeyd edib. Bildirib ki, Azərbaycanda ilk parlament respublikasının yaradılması təkcə xalqımız üçün deyil, bütün müsəlman Şərqi üçün misilsiz hadisə idi.
Diplomat qeyd edib ki, Azərbaycan 1991-ci ildə öz dövlət müstəqilliyini bərpa etdikdə, bu tarixə- 28 May gününə istinad etməsi heç də təsadüfi deyildir. Bu tarix varislik və milli yaddaşın təntənəsi idi.
Müstəqilliyimizin bərpasından ötən dövrdə ölkəmiz regionda və dünyada öz mövqeyini möhkəmləndirib, sabitlik, iqtisadi inkişaf, beynəlxalq əməkdaşlıq sahələrində mühüm uğurlar qazanıb.
Baş konsul, bu uğurların qazanılmasında müasir müstəqil Azərbaycan dövlətinin banisi, Ulu Öndər Heydər Əliyevin xidmətlərini xüsusi qeyd edib. Bildirib ki, xalqın təkidli tələbi ilə hakimiyyətə qayıdan Heydər Əliyev Azərbaycan dövlətini parçalanmaqdan xilas etdi, sabitlik yaratdı və güclü inkişafın təməlini qoydu.
Onun sözlərinə görə, Ulu Öndərin siyasi kursunu uğurla davam etdirən Prezident İlham Əliyevin rəhbərliyi altında Azərbaycan dünya miqyasında öz sözünü deyən, müstəqil siyasət yürüdən güclü bir dövlətə çevrilib.
Azərbaycan-Gürcüstan dostluğu və qardaşlıq münasibətləri barədə danışan Baş konsul deyib ki, ölkələrimiz arasındakı əməkdaşlıq münasibətləri dünyada nümunədir. Strateji tərəfdaşımız olan Gürcüstan ilə münasibətlər bizim üçün xüsusi əməliyyat daşıyır. Bu gün bizim ölkələrimiz təhlükəsizlik, enerji, nəqliyyat, təhsil, kənd təsərrüfatı və digər sahələrdə uğurlu əməkdaşlıq edir.
"Əlaqələrimizin inkişafında Acarıstan Muxtar Respublikası rəhbərliyinin, bu bölgədə yaşayan soydaşlarımızın, Azərbaycan icmasının özünəməxsus xidmətləri var. Burada yaşayan soydaşlarımızın həm Azərbaycanın maraqlarına sadiqliyi, həm də Gürcüstan cəmiyyətinə inteqrasiyası yüksək qiymətləndirilir"- deyə Baş konsul vurğulayıb.
Sonra Acarıstan MR Ali Şurasının sədri David Qabaidze çıxış edərək Azərbaycan xalqını bayram münasibətilə təbrik edib. O deyib ki, Azərbaycan və gürcü xalqları tarixən demək olar ki, eyni taleyi yaşayıblar. Hər iki xalq eyni vaxtda Müstəqil dövlətin əsasını qoyublar. Ölkələrimiz arasında mövcud olan dostluq münasibətləri bu gün daha da möhkəmlənir. Dövlət və hökumət başçılarımız arasında mövcud olan dostluq münasibətləri bizim üçün də bu dostluğu daha da inkişaf etdirməyə imkan yaradır.
Sonra bayram tortu kəsilib və tədbir bədii hissə ilə davam edib.
Baş konsulluğun dəstəyi ilə Tbilisidən gələn "Ceyran" rəqs ansamblının və Batumidəki "Bazar günü" məktəbinin yetirmələri, gənc müğənni Sona Əzizova Azərbaycan və gürcü xalq mahnı və rəqslərini ifa ediblər.
