Daha 165 cəbrayıllı doğma yurduna qovuşdu
44 günlük Vətən müharibəsində qazandığımız Zəfər yüz minlərlə vətəndaşımızın yurd həsrətinə son qoydu. Uzun illər işğal altında qalan ərazilərimizdə yaşayış məntəqələri, sosial-iqtisadi infrastruktur obyektləri dağıdılıb, tarixi, mədəni və dini abidələrimiz məhv edilib, yeraltı və yerüstü sərvətlərimiz talan olunaraq cinayət törədilib. Düşmən tapdağından azad edilmiş ərazilərimizdə müharibədən dərhal sonra başlanılan yenidənqurma və bərpa işləri sayəsində şəhər və kəndlərimiz abadlaşdırılır, keçmiş məcburi köçkünlər mərhələli olaraq əzəli yurd yerlərinə geri dönürlər.
2022-ci il iyulun 19-da 30 il sonra əsarətdən qurtarılmış torpaqlarımız ilk qayıdış karvanını qarşıladı. Böyük qayıdış proqramı çərçivəsində uzun illər doğma yurd xiffəti ilə yaşayan insanların səsi artıq ata-baba ocaqlarından gəlir.
Həsrəti bitən yurd yerlərindən biri də Cəbrayıl şəhəridir. Bu şəhər doğma sakinlərinə ötən il sentyabrın 26-da qovuşub. 2025-ci ilin ilk köçü də məhz Cəbrayıla oldu. Yenidən qurulan şəhərə dünən daha 39 ailə - 165 nəfər qayıtdı.
İşğaldan azad edilmiş digər ərazilər kimi, Cəbrayıl da yeni dövrünü yaşayır. Vahid baş plan əsasında qurulan şəhərdə sakinlərin rahat və firavan yaşaması, işlə təmin olunması üçün hər bir şərait yaradılır. Cəbrayılda çoxsaylı bərpa və quruculuq işləri görülüb, hazırda da bu işlər sürətlə davam etməkdədir.
Böyük qayıdış proqramına əsasən, ilk beşillikdə 34 min 500 ailə azad edilmiş ərazilərə köçürüləcək. Bu istiqamətdə məqsədyönlü tədbirlər həyata keçirilir. İndiyədək 2653 ailə - 10397 nəfər ocağına geri dönüb. 175 ailə (871 nəfər) Zəngilan rayonunun Ağalı kəndində, 20 ailə (90 nəfər) Tərtər rayonunun Talış kəndində, 570 ailə (2090 nəfər) Laçın şəhərində, 823 ailə (3136 nəfər) Füzuli şəhərində, 217 ailə (823 nəfər) Laçın rayonunun Zabux kəndində, 59 ailə (215 nəfər) Laçın rayonunun Sus kəndində, 369 ailə (1388 nəfər) Şuşa şəhərində, 46 ailə (179 nəfər) Xocalı şəhərində, 326 ailə (1334 nəfər) Cəbrayıl şəhərində, 48 ailə (271 nəfər) Xocalı rayonunun Ballıca kəndində məskunlaşıb.
Ən qürurverici hal isə odur ki, Qarabağ və Şərqi Zəngəzurda həyata keçirilən layihələr Azərbaycanın öz gücü hesabına gerçəkləşdirilir. Bu ərazilərdə yeni infrastrukturlar qurulur, yollar salınır, 60 kilometrdən çox tunellər, körpülər, elektrik stansiyaları, su anbarları inşa edilir, kommunikasiya sistemləri yaradılır, hava limanları tikilir. Bu işlər 2025-ci ildə də davam edəcək. Prezident İlham Əliyevin sözlərinə görə, bu ilin sonuna qədər 30-a yaxın yaşayış məntəqəsində keçmiş məcburi köçkünlər məskunlaşacaqlar.
Dağıdılmış, viran qoyulmuş əraziləri yenidən qurmaq böyük güc, potensial və zaman tələb edir. Ölkəmizdə yenidənqurma, abadlıq və quruculuq işlərinin aparılması məqsədilə bütün güclər səfərbər olunub.
İşğaldan azad edilmiş torpaqlarımızda sürətlə həyata keçirilən quruculuq işləri onu deməyə əsas verir ki, 30 ilə yaxın məcburi köçkün həyatı yaşamış vətəndaşlarımızın hamısı tezliklə əzəli yurdlarına qovuşacaqlar.
Ülkər XASPOLADOVA,
"Azərbaycan"
