12 Avqust 2022 01:12
199
SİYASƏT

YAP Sədrinin müavini – Mərkəzi Aparatın rəhbəri Tahir Budaqov Çinin Azərbaycandakı səfiri ilə görüşüb

 

Çin Xalq Respublikasının Azərbaycandakı səfiri xanım Qo Minin təşəbbüsü ilə avqustun 11-də Yeni Azərbaycan Partiyasının Mərkəzi Aparatında səfirlə YAP Sədrinin müavini – Mərkəzi Aparatın rəhbəri Tahir Budaqov arasında görüş keçirilib.

Partiyadan AZƏRTAC-a bildirilib ki, görüşdə Yeni Azərbaycan Partiyası ilə Çin Kommunist Partiyası arasında əlaqələrin mövcud vəziyyətindən məmnunluq ifadə olunub, Azərbaycan ilə Çin arasında siyasi, iqtisadi, humanitar sahələrdə münasibətlərin uğurla inkişaf etdiyi vurğulanıb.

Xanım Qo Min Çinin Azərbaycanı dost və tərəfdaş ölkə olaraq gördüyünü, daim Azərbaycanın ərazi bütövlüyünü və suverenliyini dəstəklədiyini bildirib. O, son zamanlar Tayvan ətrafında yaranmış gərgin vəziyyətlə bağlı rəsmi Pekinin mövqeyini çatdıraraq Vahid Çin prinsipinin əhəmiyyətini vurğulayıb.

YAP Sədrinin müavini Tahir Budaqov qeyd edib ki, ərazilərinin bir hissəsi 30 ilə yaxın müddətdə işğal altında qalmış, bir milyondan artıq qaçqın və məcburi köçkün problemi ilə üzləşmiş Azərbaycan beynəlxalq hüququn təməlində dayanan suverenlik və ərazi bütövlüyü prinsiplərinə hər zaman önəm verib. Bu baxımdan, Azərbaycan Çinin ərazi bütövlüyünə, Vahid Çin prinsipinə dəstəyini dəfələrlə ən yüksək səviyyədə ifadə edib və bu gün də eyni mövqedədir. Eyni zamanda, Cənubi Qafqazda sülh və etimad quruculuğu məsələsindən danışan Tahir Budaqov Ermənistanın 10 noyabr 2020-ci il tarixli üçtərəfli Bəyanatın tələblərini, o cümlədən qanunsuz silahlı birləşmələrin Qarabağ bölgəsindən çıxarılması və Zəngəzur dəhlizinin reallaşdırılması ilə əlaqədar öhdəliklərini hələ də yerinə yetirmədiyini vurğulayıb. O, bununla bağlı İrəvana beynəlxalq təzyiqlərin artırılmasının vacibliyini qeyd edib, bu məsələdə Çinin də Azərbaycanın haqlı mövqeyini müdafiə edəcəyinə ümidvar olduğunu bildirib. Bundan əlavə, Azərbaycanın işğaldan azad olunmuş ərazilərində bərpa-quruculuq işlərinin görüldüyünü diqqətə çatdıran YAP Mərkəzi Aparatının rəhbəri Çin şirkətlərinin bu işlərdə fəal iştirakına geniş imkanların olduğunu söyləyib.

Görüşdə Yeni Azərbaycan Partiyası ilə Çin Kommunist Partiyası arasında əməkdaşlıq əlaqələrinin inkişaf perspektivləri də müzakirə olunub.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video