Türkiyənin bir sıra dövlət və rəsmi qurumları, o cümlədən bu müəssisələrin rəhbərləri tərəfindən 20 Yanvar faciəsi ilə əlaqədar başsağlığı mesajları yayımlanıb.
AZƏRTAC xəbər verir ki, “X” və Türkiyənin “Nsosyal” sosial media platformalarında yayımlanan mesajlarda 20 Yanvar faciəsinin qurbanları anılıb, bu qanlı hadisənin yaddaşlarda dərin izlər qoyduğu vurğulanıb.
Türkiyənin Xarici İşlər Nazirliyi mesajında “20 Yanvar 1990-cı ildə Can Azərbaycanın istiqlalı uğrunda şəhid olan azərbaycanlı qardaşlarımızı hörmət və rəhmətlə yad edirik” ifadələrinə yer verilib.
Türkiyənin hakim Ədalət və İnkişaf Partiyası sədrinin müavini, Türk Dövlətləri ilə Əlaqələr Baş İdarəsinin rəhbəri Kürşad Zorlu paylaşımında deyib: “20 Yanvar Azərbaycan xalqının azadlıq və müstəqillik mübarizəsində tarixə həkk olunmuş bir gündür. 1990-cı ilin 20 Yanvarında həyatını itirən günahsız insanlar müstəqillik uğrunda canlarını fəda edərək xalqın yaddaşında əbədi yer tutublar. Bu tarix, eyni zamanda təzyiqə boyun əyməyən bir müqavimətin, milli oyanışın və müstəqilliyə aparan yolun rəmzidir. Şəhidlərimizi rəhmət, ehtiram və minnətdarlıqla anırıq”.
Türkiyənin müdafiə sənayesi üzrə flaqmanı “Baykar” şirkətlərinin İdarə Heyətinin sədri Selçuk Bayraktar isə mesajında “Azad yaşamağın bədəlini canları ilə ödəyən azərbaycanlı qardaş və bacılarımıza rəhmət olsun… Qanlı Yanvarı unutmadıq, unutmayacağıq”, - deyə bildirib.
Türk Əməkdaşlıq və Koordinasiya Agentliyinin (TİKA) mesajında isə “Qardaş Azərbaycanın istiqlalı üçün canlarını fəda edən 20 Yanvar şəhidlərini rəhmət və hörmətlə yad edirik” ifadələri yer alıb.
Daha bir paylaşım Türk Ocaqlarının rəsmi səhifəsində edilib. Mesajda deyilir: “1990-cı ilin 19-20 yanvarında sovet qoşunlarının Bakıya girişi zamanı şəhid edilən Azərbaycan türklərini rəhmətlə anırıq”.
Türk Dünyası Araşdırmaları Vəqfi (TDAV) də mesaj yayımlayaraq şəhidlərimizin əziz xatirəsini yad edib: “Azərbaycan türklərinin müstəqillik atəşini qanları ilə alovlandırdıqları 1990-cı ilin 20 Yanvarını unutmur, damarlarındakı nəcib qanla müasir Azərbaycanın təməllərini qoyan şəhidlərimizi ehtiram, sevgi və həsrətlə anırıq. Ruhları şad, məqamları uca olsun…”.
19 (1)jpg_1771885865.jpg)
