Orta Dəhliz Avropa ilə Asiya arasında ticarət, logistika və nəqliyyat əlaqələrini gücləndirməklə yanaşı, regional turizmin inkişafı baxımından da yeni imkanlar yaradır. Son illər marşrut boyunca infrastrukturun müasirləşdirilməsi, beynəlxalq əməkdaşlığın genişlənməsi və sərnişindaşımaların artması bu dəhlizi turizm sektorunun inkişafını dəstəkləyən mühüm platformaya çevirib.
Bu fikirləri AZƏRTAC-a açıqlamasında türkiyəli turizm eksperti Soner Kılıç bildirib.
Ekspert qeyd edib ki, müasir dövrdə turistlər təkcə istirahət deyil, həm də rahat, təhlükəsiz və sürətli səyahət imkanlarına üstünlük verirlər. Orta Dəhliz bu baxımdan Asiya ilə Avropa arasında yerləşən ölkələr üçün böyük üstünlüklər yaradır. Nəqliyyat əlaqələrinin inkişafı, beynəlxalq hava marşrutlarının genişlənməsi, dəmir yolu və avtomobil yollarının yenilənməsi turistlərin daha qısa müddətdə müxtəlif istiqamətlərə səyahət etməsinə şərait yaradır.
Soner Kılıçın sözlərinə görə, Azərbaycan Orta Dəhlizin əsas iştirakçılarından biri kimi bu imkanlardan səmərəli istifadə edir. Ölkənin coğrafi mövqeyi, sabitliyi, zəngin tarixi-mədəni irsi və müasir infrastrukturu onu regionun aparıcı turizm istiqamətlərindən birinə çevirir.
“Azərbaycan son illərdə turizm sahəsində mühüm nəticələr əldə edib. Müasir hotellər, beynəlxalq standartlara cavab verən hava limanları, rahat avtomobil yolları, yüksək xidmət keyfiyyəti və rəqəmsal həllər turistlərin ölkəyə marağını artıran əsas amillərdir. Dövlət tərəfindən həyata keçirilən ardıcıl siyasət turizmin dayanıqlı inkişafına mühüm töhfə verir”, – deyə ekspert bildirib.
O vurğulayıb ki, Azərbaycanın zəngin mədəni irsi, UNESCO siyahısına daxil edilmiş abidələri, qədim şəhərləri, milli mətbəxi və müxtəlif iqlim qurşaqları ölkəyə gələn turistlər üçün fərqli turizm məhsulları təqdim edir. Bakı ilə yanaşı, Şəki, Qəbələ, Quba, Lənkəran, Naftalan və digər bölgələrdə yaradılmış müasir turizm infrastrukturu daxili və xarici turistlərin sayının artmasına müsbət təsir göstərir.
Soner Kılıç hesab edir ki, işğaldan azad olunmuş ərazilərdə aparılan genişmiqyaslı bərpa və yenidənqurma işləri gələcəkdə Azərbaycanın turizm potensialını daha da artıracaq. Həmin bölgələrdə ekoturizm, dağ turizmi, sağlamlıq turizmi, mədəni və dini turizm istiqamətlərinin inkişafı həm yerli, həm də xarici turistlər üçün yeni marşrutların formalaşmasına imkan yaradacaq.
Ekspert Orta Dəhliz çərçivəsində birgə turizm marşrutlarının hazırlanmasının vacibliyini də qeyd edib. Onun sözlərinə görə, Azərbaycan, Türkiyə, Gürcüstan və Mərkəzi Asiya ölkələrinin ortaq turizm paketləri hazırlaması regionun beynəlxalq turizm bazarında daha güclü tanınmasına şərait yarada bilər. Belə marşrutlar turistlərə bir səfər ərzində bir neçə ölkənin tarixi, mədəniyyəti və təbii gözəllikləri ilə tanış olmaq imkanı verir.
“Rəqəmsal texnologiyaların tətbiqi, elektron xidmətlərin genişləndirilməsi, beynəlxalq sərgilərdə fəal iştirak və birgə marketinq strategiyası Orta Dəhliz boyunca turizm əməkdaşlığını daha da gücləndirəcək. Bu, region ölkələrinin iqtisadiyyatına əlavə gəlir gətirməklə yanaşı, mədəni əlaqələrin möhkəmlənməsinə də xidmət edəcək”, – deyə Soner Kılıç bildirib.
Ekspert əlavə edib ki, qlobal turizm bazarında rəqabətin artdığı bir dövrdə Orta Dəhliz ölkələrinin vahid turizm brendi kimi tanıdılması böyük əhəmiyyət daşıyır. Onun fikrincə, Azərbaycanın bu təşəbbüslərdə fəal iştirakı ölkənin beynəlxalq turizm xəritəsində mövqeyini daha da gücləndirəcək: “Orta Dəhliz gələcəyin yalnız ticarət marşrutu deyil, həm də xalqları yaxınlaşdıran, iqtisadi əməkdaşlığı genişləndirən və turizmi inkişaf etdirən strateji platformadır. Azərbaycan bu prosesdə öz zəngin potensialı və həyata keçirdiyi uğurlu layihələrlə regionun aparıcı turizm mərkəzlərindən birinə çevrilmək imkanına malikdir”.
