Donald Tramp 100 il ərzində ABŞ valyutasında təsvir edilən ilk sağ ABŞ Prezidenti olub. Ölkə Zərbxanası Trampın təsvir olunduğu 1 dollarlıq kolleksiya sikkəsi buraxıb. Trampın üzünün və "Azadlıq" və "Tanrıya güvənirik" sözləri olan sikkə, ABŞ-nin 250 illiyinə həsr edilib.
Zərbxana 25 sikkə dəstini 61 dollara satışa çıxarıb, 100 sikkədən ibarət bir çantanın qiyməti isə 154,50 dollardır. Amma buraxılışdan bir neçə saat sonra Zərbxananın veb saytında sikkələrin "hazırda satışda olmadığı" barədə məlumat verilib.
Zərbxanadan bildirilib ki, Tramp sikkəsi "bu tarixi mərhələnin qeyd edilməsi" üçün buraxılıb və "müasir kolleksiyalara əla bir əlavə" olmaq üçün nəzərdə tutulub. Sikkə qızıl kimi görünsə də, tərkibində qızıl yoxdur. Onun 88,5 faiz mis, qalan hissəsi isə sink, manqan və nikeldir.
Xatırladaq ki, bu ilin may ayında ABŞ maliyyə naziri Skott Bessent ABŞ-nin 250 illiyi şərəfinə üzərində Donald Trampın portreti olan 250 dollarlıq əskinas buraxılacağını da açıqlamışdır. Lakin ABŞ federal qanunu insanların sağlığında təsvir olunduqları pulların bəzədilməsini qadağan edir. O səbəbdən Tramp tərəfdarları Konqresdə onun üçün istisna hal olaraq qanun layihəsi təqdim etsələr də, sənədin qəbulu dayandırılmışdır.
Yeni qanun layihəsinin buraxılması planlarını açıqlayan Skott Bessent ABŞ Prezidentinin portretinin onun sağlığında Amerika valyutasında artıq göründüyünü qeyd edib: ABŞ-nin müstəqilliyinin 150 illiyi münasibəti ilə buraxılan yarım dollarlıq sikkədə iki profil var idi – prezidentlər Kalvin Kulic və Corc Vaşinqton.
D.Trampın şəklinin valyuta üzərində yerləşdirilə biləcəyini iddia edərkən Administrasiya həmçinin ABŞ-nin hazırkı liderinin ilk prezidentliyi dövründə qəbul edilmiş 2020-ci il tarixli “Dövriyyədə olan kolleksiya sikkələrinin yenidən dizaynı” qanununa istinad edir. Bu qanun sikkələrin üz tərəfində deyil, arxa tərəfində canlı şəxslərin şəkillərinin yerləşdirilməsini qadağan edir. Trampın portreti də yeni 1 dollarlıq sikkələrin üz tərəfində yerləşdirilib.
Personaj sağ ikən ABŞ valyutasında portretləri qadağan edən başqa bir qanun da var - 1866-cı ildə qəbul olunmuş Teyyer Düzəlişi. Lakin bu, əskinaslara aiddir, sikkələrə şamil edilmir.
Rizvan CƏFƏROV,
"Azərbaycan"
jpg_1789895578.jpg)
